«جۋسان» وپەراتسياسىنىڭ ايتىلماعان تۇستارى

ەرلان قارين،

قازاقستان رەسپۋبليكاسى پرەزيدەنتىنىڭ كومەكشىسى،
سايا­ساتكەر:

«بۇل ما­سەلەدە قارسى شىق­قاندار دا، جاق­تاۋشىلار دا بولدى. بىراق ماسەلە وڭ شەشىلدى. باستى ەرەكشەلىگى – گۋمانيتارلىق جاعىنان اۋقىم­دىلىعى، بالالار تاعدىرى، ولار اكە-شەشەسىنىڭ قاتەسى ءۇشىن جاۋاپ بەر­مەيدى. ءبىز قايتارماساق، بۇل بالالاردى ەرتەڭ ءوز ەلىمىزگە قارسى شى­عارۋى دا مۇمكىن ەدى. بالالار – ءبىزدىڭ بولاشاعىمىز، الدىمەن سولاردىڭ جاعدايىن ويلادىق. بۇل وتە ماڭىزدى، قاۋىپسىزدىك تۇر­عىسىنان جاسالعان وپەراتسيا بولدى. ءبىزدىڭ بۇل ارەكەتىمىزدى شەتەلدەر دە باعالاپ جاتىر. ۋاقىتىندا جۇزەگە اسىرىلعان وپەراتسيا بولدى. مەنىڭشە، جۇرتتىڭ باسىم كوپشىلىگى تۇسىنەدى، قولدايدى. ەل ارالاپ جۇرگەندە وسى وپە­را­تسياعا بايلانىستى كوپ سۇ­راق قويىلادى. قاۋىپتەنەتىندەر دە، كۇمان­دا­ناتىن ادامدار دا بار. دۇرىس پا، دۇرىس ەمەس پە دەگەن سۇراق تۋىنداۋى ورىن­دى. كەيبىرەۋلەر ولار­دى قاي­تارساق، قاۋپى جوعارى دەپ ويلايدى. ولاردى سول جاقتا باسىم كۇشتەر پايدالانىپ وتىر. ولار – بىرەۋدىڭ قولىنداعى قارۋ. قايتارماساق، ولاردى بولاشاقتا وزىمىزگە قارسى قارۋ رەتىندە پايدالانبايتىنىنا كىم كەپىل؟ سوندىقتان ولاردى قاي­تارۋ ار­قىلى ءبىز ۇلكەن قاۋىپتىڭ ال­دىن الدىق. بۇل گۋمانيتارلىق جا­عىنان دا، قاۋىپسىزدىك جاعىنان دا وتە دۇرىس قادام بولدى».

ءبىرىنشى كەزەڭدە 47 ادام (6 ەر ادام، 11 ايەل، 30 بالا)، ەكىنشى كەزەڭدە 231 ادام (16 ەر ادام، 59 ايەل، 156 بالا، ونىڭ ىشىندە 18 جەتىم)، ءۇشىنشى كەزەڭدە 246 ادام (8 ەر ادام، 67 ايەل، 171 بالا، ونىڭ 9 جەتىم)، ءتورتىنشى كەزەڭدە 71 ادام (3 ەر ادام، 19 ايەل، 49 بالا، ونىڭ 5 جەتىم)، بەسىنشى كەزەڭدە 12 ادام (4 ەر ادام، 1 ايەل، 7 بالا، ونىڭ 2 جەتىم)، جالپى جيىنى 607 ادام (37 ەر ادام، 157 ايەل، 413 بالا، ونىڭ 34 جەتىم) ەلگە قايتارىلدى. 

وپەراتسيانىڭ باستاپقى كەزەڭى 2019 جىلعى قاڭتاردا وتكىزىلدى، ال سوڭعى بەسىنشى كەزەڭى كوروناۆيرۋس ىندەتىنە قاتىستى شەكتەۋ­لەرگە بايلانىستى بىرنەشە رەت شەگەرىلىپ، 2021 جىلعى اقپان ايىن­دا ىسكە اسىرىلدى.

كەزەڭ-كەزەڭىمەن وتكىزىلگەن وپە­راتسيانى ىسكە اسىرۋعا تەرىس پيعىل­دى كۇشتەر دە، الەمدى جاي­لاعان ىندەت تە كەدەرگى بولا الما­دى. سەبەبى ۇلتتىق قاۋىپسىزدىك ور­گاندارىنىڭ قىزمەتكەرلەرى الدىندا ءوز ازاماتتارىمىزدى ەلگە قايتارۋ مىندەتى تۇردى. ولار ءوز ومىرلەرىن قاتەرگە تىگە وتى­رىپ، ەلىمىزدەن جىراقتا جۇر­گەن قورعانسىز جەسىرلەر مەن قام­قورسىز جەتىمدەردى امان-ەسەن تۋعان جەرگە جەتكىزدى.

وسى ۋاقىت ىشىندە بوگدە ەل­دە قيىن جاعدايعا تاپ بولعان قان­شاما وتانداسىمىز ەلگە قايتا­رىلدى. قايتارىلىپ قانا قويعان جوق، ولاردى قالىپتى ومىرگە ورالتۋ ءۇشىن كەشەندى تۇردە وڭالتۋ ءىس-شارالارى دا جۇيەلى تۇردە جۇزەگە اسى­رىلدى. وسىنداي ۇيىمداسقان يگى ءىستىڭ ارقاسىندا قاقتىعىستار وشا­عىنان قايتارىلعان ازاماتتارىمىز بەيبىت ومىرگە وڭاي بەيىم­دەلىپ، ءوز جولدارىن تابا ءبىلدى.

ەرلان قارين: «بۇل شىنىندا دا كۇردەلىلىگى جاعىنان وتە اۋقىمدى وپەراتسيالاردىڭ ءبىرى بول­دى. ارينە، تاۋەلسىزدىك جىلدارى قازاقستان ءوزىنىڭ ۇلتتىق قاۋىپ­سىزدىگىن قامتاماسىز ەتۋ باعىتىندا ءار كەزەڭدە قيىن دا كۇردەلى ءىس-شارالاردى قابىلدادى. ءدال قازىرگى تاڭدا «جۋسان» وپە­­­راتسياسى – قاۋىپسىزدىك قىز­مەتتەرىنىڭ تاريحىنداعى ەڭ كۇر­دەلى، اۋقىمدى ءىس-شارالاردىڭ ءبىرى بولىپ قالاتىنى ءسوزسىز. ءبىزدىڭ ەلدىڭ قاۋىپسىزدىگى تاريحىندا عانا ەمەس، حالىقارالىق دەڭگەيدە دە. قازىرگى ۋاقىتتا سي­ريا­دا احۋالدىڭ، ونداعى كۇش­تەردىڭ ارا-قاتىناسىنىڭ وزگەرۋىنە باي­لانىستى مۇنداي وپەراتسيالاردىڭ ەن­دى ورىندالۋى ەكىتالاي. بۇل وپەراتسيانىڭ كۇردەلىلىگى، ەڭ الدىمەن، اۋقى­مىندا. ەرەكشەلىگى – ءتۇرلى ەل­دەردىڭ مۇددەلەرىنىڭ ارالاسىپ كەتۋىندە، ءارتۇرلى گەوساياسي توپ­تار دا ارالاسىپ، قاقتىعىس جاع­دايىن تۋعىزىپ جاتقانىندا.

بىرىنشىدەن، قازاقستان جاعى سيريا­مەن جاۋلاسۋشى جاقتارمەن كەلىسىمگە كەلدى، ەكىنشىدەن، سي­رياداعى پروتسەسكە ارالاسىپ وتىر­عان باسقا دا ءتۇرلى كۇشتەرمەن كە­لىسىمگە كەلە الدى. قازاقستان باسشى­لىعىنىڭ، ۇلتتىق قاۋىپ­سىزدىك قىزمەتتەرىنىڭ ساياسي بەدە­لىنىڭ اسەرى بولدى. وسى وپەراتسيا ارقىلى ءوزىمىزدى رەسەي، امەريكا، تاياۋ شىعىس ەلدەرىنە سەنىمدى ارىپ­تەس رەتىندە كورسەتتىك».

ەرجان اشىقباەۆ،

سىرتقى ىستەر ءمينيسترىنىڭ بۇرىنعى ورىنباسارى،
قازاق­ستان رەسپۋبليكاسىنىڭ اقش-تاعى توتەنشە جانە وكىلەتتى ەلشىسى:

«ارينە، «جۋسان» وپەراتسياسى – قازاقستان تاريحىندا دا، جالپى، جاڭا قالىپتاسىپ وتىر­عان جاعدايدا دا بىرەگەي وپەراتسيالاردىڭ ءبىرى دەپ تولىق­تاي ايتۋعا بولادى.

تەرروريزم فەنومەنىمەن حا­لىق­ارالىق قوعامداستىق عاسىر­لار بويى تانىس بولعانىمەن، ءبىز تەك وسى عاسىرلار توعىسىندا، XXI عاسىردان باستاپ قانا ءجيى كەزدەسەتىن بولدىق. سوندىقتان قازاقستان دۇنيەجۇزىلىك قوعام­داستىقتىڭ جاۋاپتى مۇ­شەسى رە­تىندە ءوز ۇلەسىن قوسىپ وتىردى. ءبىز، ايتالىق، بىرىك­كەن ۇلتتار ۇيىمىنىڭ قاۋىپسىزدىك كەڭەسىندەگى ەكى جىل­دىق مەرزىمىمىز كەزىندە دە تەرروريزمگە قارسى باعىتتالعان ءىس-ارەكەت­تەردى ۇيلەس­تىرۋگە، ۇيىمداس­تىرۋعا قاتىسىپ وتىردىق. بۇل ماسەلەلەر، ارينە، قازاقستاننىڭ عانا ەمەس، بۇكىل دۇنيەجۇزىلىك قوعام­داستىقتىڭ نازارىندا بول­دى. سوندىقتان ءبىز دە وسى ماسەلەلەرگە تولىقتاي اتسالىستىق.

ال «جۋسان» وپەراتسياسىنا كەلەتىن بولساق، بۇل ءۇشىن پراك­تيكالىق تۇرعىدان، ارينە، قازاق­ستاننىڭ ءبىر عانا ەلمەن ەمەس، كوپتەگەن ەلدەرمەن، كوپتەگەن حالىق­ارالىق ۇيىمدارمەن ارە­كەت­تەسۋىنە تۋرا كەلدى. ايتا كەتەر­لىك جايت، وسى وپەراتسيا كەزىندە سيريا مەن يراك مەم­لەكەتتەرىنىڭ تەرريتورياسىندا قۇرىلعان يگيل، دايش توبىنىڭ قاراماعىندا بولعان جەرلەرىنەن ازات ەتىلگەن جەرلەردەن ءبىزدىڭ قازاقستان ازا­مات­تارىن الىپ كەلۋگە باعىت­تالعاندىعى ءمالىم. سوندا ءبىز، ارينە، اتالعان مەملەكەتتەرمەن، امەريكا قۇراما شتاتتارىمەن وتە تىعىز ىنتىماقتاستىقتا جۇ­مىس ىستەدىك. سونداي-اق حالىق­ارا­لىق ۇيىمدارمەن، سونىمەن قاتار سول ايماقتاردا گۋمانيتارلىق ميسسيامەن جۇرگەن بەيرەسمي مەملەكەتتىك ەمەس ۇيىم­دارمەن دە جۇمىس ىستەدىك. ارينە، كەيبىر مەملەكەتتەر، كەيبىر ۇيىمدار قاۋىپسىزدىك تۇرعىسىنان ءالى كۇنگە دەيىن ءوز رولدەرىن ال­دىڭ­­عى قاتارعا شىعارماۋعا تى­­رىسۋدا. ءبىز بۇل ۇستانىمعا تولىقتاي قۇرمەتپەن قارايمىز، قابىلدايمىز. سوندىقتان بۇل وپەراتسياعا بىزگە كومەكتەسكەن، ءتىپتى ءوز اۋماعى ارقىلى ۇشاق­تارى­مىزعا ۇشۋ قۇقىقتارىن بەر­گەن كەم دەگەندە 20-دان استام مەملەكەت پەن حالىقارالىق ۇيىم قاتىستى دەسەم، ارتىق بولماس. ارقايسىسىمەن جەكە-جەكە كەلىسسوزدەر جۇرگىزىپ، ولاردىڭ تاراپىنان قول ۇشىن سوزعان جاقسى قاتىناستارمەن عانا كەزدەسىپ وتىردىق. بارلىق ارىپتەسىمىزگە ريزامىز. ارينە، بۇل تەرروريزمدى جەڭۋ – ءبىر مەملەكەتتىڭ قو­لىن­دا ەمەس. تەك ءبىر مەملەكەت تەرروريزمدى ەشقاشان جەڭە ال­­­مايدى. تەك ۇجىمدىق ىن­تىماق­تاستىق ارقىلى، وسىنداي بىرلەس­كەن ءىس-ارەكەتتەر ارقىلى عانا بۇل ماسە­لەنىڭ شەشىمىن تابۋعا بولدى.

اۋقىمىنا قاراعاندا دايىن­دىق جۇمىستارى جەدەل تۇردە، شۇعىل تۇردە وتكىزىلدى. وعان قوسا، سوعىس قاقتىعىستارى بولىپ جاتقان ايماققا بارۋدىڭ ءوزى قيىن­عا سوقتى. سوعان قارا­ماستان، وتە از ۋاقىت ىشىندە ءبىز ءوز ازامات­تارىمىزدى تاۋىپ، ءتيىستى سايكەستەندىرۋ جۇمىستارىن جۇر­گىزدىك. قازاقستان – جالپى وسى سوعىس ايماقتارىنان ءوز ازا­ماتتارىن العان العاشقى مەم­­­لەكەتتەردىڭ ءبىرى بولدى. ال بىر­نەشە ايلار، جىلدار بويى قاق­تىعىس ايماعىندا ءومىر كەش­­كەن جاندار، اسىرەسە، بالالار مەن انالار كومەككە ءزارۋ ەدى. ونى وپەراتسياعا تىكەلەي قاتىسقان ارىپتەستەرىمىز ءوز كوزىمەن كور­دى. سوندىقتان كەيبىر كورشىلەس مەملەكەتتەردىڭ ازا­ماتتارى دا ء«بىز – قازاقستاندىقتارمىز، ءبىزدى دە الا كەتىڭىزدەر»، دەپ جاعدايلارىن ايتۋعا تىرىستى، بىراق ءبىز تەك قازاقستان ازاماتتارىن عانا الىپ كەلدىك. ول ءۇشىن ءتيىستى جۇمىستار جۇرگىزىلدى. ءتىپتى اكەسىز، اناسىز قالعان جە­تىم بالالارعا قاتىستى دنك تەستتەرىنە دەيىن جۇرگىزىپ، كوزىمىز جەتكەندە عانا، ياعني بۇل بالالار قازاقستان ازاماتتارىنان تۋعان بالالار، ياعني قازاقستان رەسپۋبليكاسىنىڭ ازاماتتارى ەكەندىگىنە كوزىمىز جەتكەندە عانا الىپ كەلىپ وتىردىق.

بۇل جۇمىستى ءبىز بارلىق مەم­لەكەتتىك ورگانداردىڭ قاتى­سۋى­مەن جۇرگىزدىك. قاجەت بولعاندا جەرگىلىكتى پوليتسيا قىزمەتكەرلەرى ءوز دەرەكتەرىنەن مالىمەتتەر تا­ۋىپ بەردى. ارينە، وسى  جۇمىستا ءبىز قازاقستاندىق مەملەكەتتىك ەمەس ۇيىمداردىڭ دا كومەگىن كوردىك. قاقتىعىس ايماعىنا كە­تىپ قالعان ازاماتتاردىڭ اتا-انا­لارى دا ءوز بالالارىن ىزدەپ، وز­دەرىندە بار اقپاراتتى ءبولىسىپ وتى­ردى. «جۇمىلا كوتەرگەن جۇك جەڭىل» دەگەندەي،  بۇل جۇمىسقا كوپتەگەن مەملەكەتتىك ورگاندار مەن ازاماتتارىمىز  اتسالىستى. دارىگەرلەرىمىز، پسيحياترلارىمىز، ءدىن وكىلدەرى – ءبارى دە ەلگە رەپا­ترياتسيالانعان ادامداردى ساۋىق­تىرۋعا جاردەمدەرىن اياعان جوق.

قازاقستان كوپتەگەن مەملەكەتتەرگە ۇلگى بولىپ وتىر. قازاق ەلى – 30 جىل بويى تۇبەگەيلى تۇردە بەيبىت مەملەكەت ەكەندىگىن ايعاق­تادى. بىزدە قارۋلى قاقتى­عىستار بولعان جوق. ءبىز ەل رە­تىندە شيرەك عاسىردان استام قان­داستارىمىزدى ەلگە شاقىرىپ، قولدان كەلگەن كومەگىمىزدى كور­سەتىپ كەلەمىز. ءبىر ميلليوننان استام قانداسىمىز ەلگە ورالدى. سونشا حالقىمىزدى  قۇشاق جايا قارسى العان ەل رەتىندە ءبىز ومىر­دە ءبىر رەت سۇرىنگەن 500-600 كىسىگە دە ورىن تاپپايمىز با، مۇمكىندىگىمىز كەلمەي مە؟ ارينە، كەلەدى. بۇل –  اعىلشىن تىلىندەگى identity – ءبىز كىمبىز دەگەن سۇراققا جاۋاپ بەرۋ. بۇل سۇراق ۇلكەن فيلوسوفيالىق تۇرعىدان دا، جەكە تۇلعا رەتىندە دە، ەل رەتىندە دە، حالىق رەتىندە دە ماڭىزدى سۇراق دەپ ويلايمىن. 

ءبىز – تەك سيريا جونىندەگى استانا پروتسەسى دەگەن اتپەن تانىل­عان ساياسي ءىس-شارالارمەن، بۇۇ قاۋىپسىزدىك كەڭەسىندەگى ەكى جىل­دىق جۇمىسىمىزبەن شەكتەلمەي، پراكتيكالىق تۇرعىدان  ناقتى ىستەرىمىز ارقىلى تەرروريزم سياقتى قاۋىپتى جا­ھاندىق فەنومەندى جەڭۋگە اتسالىسىپ وتىرعان مەملەكەتتەردىڭ ءبىرى­مىز. سول تۇرعىدان، ارينە، بۇل ءبىز­دىڭ عانا قاۋىپسىزدىگىمىزگە ەمەس، كوپتەگەن كورشىلەس، الىس، جاقىن مەملەكەتتەردىڭ قاۋىپسىزدىگىنە قوسقان ۇلەسىمىز دەپ بىلەمىن».

ايدا بالاەۆا،

اقپارات جانە قوعامدىق دامۋ ءمينيسترى:

ء«بىز – جاقىنىن جاماندىققا قيماعان، جاۋعا بەرمەگەن حالىق­پىز عوي. سوندىقتان «جۋسان» وپەراتسياسى سول تەك قا­نا سوعىس بولىپ جاتقان جەردەن ادام­داردى الىپ كەلۋ دەگەن عانا ماسەلە ەمەس، بۇل – ۇلكەن، جۇيەلى، تاجىريبەلى مامانداردىڭ، قۇزى­رەتتى ورگانداردىڭ بىرلەسە ىسكە اسىرعان جۇمىسىنىڭ ناتي­جەسى. ال وسى «جۋسان» وپەراتسيا­سى­نىڭ شەڭبەرىندە ەلگە الىپ كەل­­گەندەردىڭ باسىم بولىگى – بالالار. ەگەر بۇل وپەراتسيا ءساتسىز وتكەن جاع­دايدا سول بالالاردىڭ ءومىرى باستالماي جاتىپ قيىلدى دەگەن ءسوز ەمەس پە؟!

ءبىزدىڭ مەملەكەتىمىزدىڭ ەڭ باس­تى قۇندىلىعى – ادام. سوندىق­تان «جۋسان» وپەراتسياسىنىڭ ەڭ باستى ناتيجەسى – ادام ءومىرى، ادامدار­دىڭ بولاشاعى. ول ءار قازاق­ستاندىق ازاماتتىڭ ءومىرى وسى مەم­لەكەتتىڭ مۇددەسى ەكەنىن كورسەتتى.

قازىر وسى وپەراتسيانىڭ تا­جىري­بەسىن باسقا ەلدەر دە وتە مۇ­قيات زەتتتەپ، قاراپ وتىر. ءبىزدىڭ ەلى­مىزدىڭ كونستيتۋتسياسىندا ەڭ باستى قۇندىلىق ادام رەتىندە بەكىتىلگەننەن كەيىن، ادام قاي جەردە، الەمنىڭ قاي تۇكپىرىندە جۇرسە دە ونىڭ ءومىرى ءبىز ءۇشىن وتە قۇندى. ول ادام قاشان دا مەملەكەتتىڭ قورعاۋىندا بولادى. سوندىقتان الىپ كەلۋ ءبىر جۇمىس بولسا، ءبىز الىپ كەلگەن ادامدار كەزىندە تەرىس ءدىني اعىمداردىڭ جەتەگىندە كەتكەن ادامدار بول­عاندىقتان، ولاردى راديكالدى ءدىني كوزقاراسىنان ايى­رۋ ءۇشىن كەشەندى جۇمىس جۇرگىزۋ – ءبىز ءۇشىن ەڭ باستى ماقسات بولدى. ەندى بۇگىن سول جۇمىستىڭ ناتيجەسىندە قايتارىلعان ازامات­تاردىڭ 95 پايىزى راديكالدى سەنىمنەن باس تارتىپ وتىر. بۇل – ۇلكەن ناتيجە، ونىڭ سىرتىندا «اقنيەت» وڭالتۋ ورتالىعىنىڭ، بىلىكتى تەو­لوگتاردىڭ، پسيحولوگتەردىڭ، جالپى مامانداردىڭ جۇمىسى جاتىر. بۇگىنگى كۇنى ورتالىقتىڭ قازاقستاننىڭ بارلىق ايماعىندا وكىلدىگى بار. راديكالدى ءدىني سەنىم­نەن باس تارتۋ – ۇلكەن جۇ­مىستىڭ باسى عانا. ەلگە قايتارىلعان ايەل­دەردىڭ كوپ­شىلىگىنىڭ بەلگىلى ءبىر ءبىلىمى، ما­ماندىعى جوق. كۇيەۋلەرى سول جاقتا قازا بولعان. جاس بالالارى بولۋىنا بايلانىستى جۇمىس جاساۋعا مۇمكىندىكتەرى جوق. وسى ماسەلەلەر جانە ولاردى جاڭا قوعام­عا قايتا بەيىمدەۋ، مامان­دىق­قا دايارلاۋ جۇمىستارىن ۇنەمى نازاردا ۇستاپ وتىرمىز. بۇگىنگە دەيىن 45 ايەل تۇراقتى جۇمىسقا ورنالاستىرىلدى. 70 ايەل تىگىن تىگۋ شەبەرلىگى، بۋحگالتەريا، شاشتاراز سياقتى ءتۇرلى بىلىكتىلىكتى ارتتىرۋ كۋرستارىنان ءوتتى. 5 ايەل جوعارى جانە ارنايى وقۋ ورىندارىنا ءتۇسىپ، زايىرلى ءبىلىم الىپ جاتىر.

كەيبىر ايەلدەر قايتا دايارلاۋ، ماماندىققا ۇيرەتۋ كۋرس­تارىنا بەلسەنە قاتىسىپ، نۇر-سۇلتان، شىمكەنت قالالارىندا جانە قاراعاندى وبلىسىندا تىگىن شەبەرحانالارىن، كونديتەرلىك تسەح جانە ازىق-ت ۇلىك دۇكەندەرىن اشىپ، جۇمىس ىستەۋدە. ناتيجەسى دە جوق ەمەس. بىلتىرعى پاندەميا كەزىندە ولار اۋرۋحانالارعا ازىق-ت ۇلىك، ءدارى اپارۋعا، تەگىن ماسكا تىگۋ جانە ونى تاراتۋ جۇمىس­تارىنا بەلسەنە اتسالىستى. ءتۇرلى الەۋ­مەتتىك جەلىلەر ارقىلى ۇيىمداس­تىرىلعان باستامالارعا، مادەني ءىس-شارالارعا قاتىستى. مۇنىڭ بارلىعى ولاردىڭ قوعامنان بولىنگىسى كەلمەيتىنىن كورسەتەدى. ينتەرنەتتى، زايىرلى قوعامدى جاۋ كورمەي، قايتا ورالۋعا دەگەن ىنتالارىن بىلدىرەدى.

ءبىرىنشى كەزەكتە مەكتەپ جا­سىن­داعى بالالارمەن جۇ­مىس، كەل­گەندەردى العاشقى مە­دي­­­تسي­نالىق تەكسەرۋ جۇرگىزۋ، ءتيىستى ەمدىك ءىس-شارالارىن جاساۋ ماسەلەلەرى تۇردى. ودان كەيىن جەكە كۋالىكتەرىن جوعالت­قانداردىڭ قۇجاتتارىن قال­پىنا كەلتىرۋ، سول جاقتا تۋ­عان بالالاردىڭ تۋىستىعىن انىق­­تاۋ ءۇشىن گەنومدىق ساراپتاما جۇرگىزۋ دە تىڭعىلىقتى جۇ­مىس­تى تالاپ ەتكەنى تۇسىنىكتى. وسىن­داي كەڭ اۋقىمدى ماسەلەنى شە­شۋدە ءبىز ەلىمىزدىڭ ءتيىستى مي­نيستر­لىكتەرىمەن، جەرگىلىكتى اكىم­دىكتەرمەن ءوزارا تىعىز، قويان-قول­تىق جۇمىس ىستەدىك.

اسىرەسە، سوعىس ءجۇرىپ جاتقان ەلدەردە تۋعان بالالارعا جاڭادان قۇجات راسىمدەۋ، قايتىس بولعان اتا-انالاردىڭ مارتەبەسىن انىق­تاۋ ماسەلەلەرى ءالى دە قيىندىقتار تۋ­عىزۋدا. قازىر بۇل پروبلەمالار­دى شەشۋ ءتيىستى ورگانداردىڭ قاتىسۋىمەن ۇكى­مەتتىك دەڭگەيدە پىسىقتالىپ جاتىر. ول ءۇشىن وسىنداي ماسەلەلەردى رەتتەيتىن ءتيىستى نور­­­ماتيۆتىك-قۇقىقتىق اكتى­لەر قا­بىلداۋ قاجەت.

ال جالپى ءبىزدىڭ ازاماتتىق زاڭدارىمىز ولار تەرىس ءدىني يدەيا­دان تولىق باس تارتقان سوڭ، قايتادان قوعامدىق ومىرگە ارالاسۋلارىنا، ەڭبەك ەتۋلەرىنە، بالالارىنىڭ ءبىلىم الۋىنا جانە باسقا دا قۇقىقتارىنا ەشقانداي شەكتەۋ قويمايدى.

ۇلتتىق قاۋىپسىزدىك دەگەن – ەڭ باستىسى، قوعامنىڭ دا­مۋى، قوعامنىڭ وركەندەۋى، ءار ازا­ماتتىڭ قاۋىپسىز ءومىر ءسۇرۋى. سوندىقتان وسى ۇلكەن ساۋا­بى مول قىزمەتتى اتقارىپ جۇر­گەن ازاماتتاردىڭ  جاۋاپتى قىز­مەتتەرىندە ارقاشاندا ناتيجەلى بولۋىنا تىلەكتەسپىن. ءار قىزمەت­كەرگە دەنساۋلىق، وتباسىنا امان­دىق تىلەيمىن!».