قوعام • 12 شىلدە، 2021

كەشە – ءانشى، بۇگىن – باسشى...

523 رەت كورسەتىلدى

ەرتەرەكتە اجەپتاۋىر اتى شىققان تەاتر رەجيسسەرى ءبىر وڭىردە جاڭادان اشىلعان وبلىستىق قازاق دراما تەاترىنىڭ ديرەك­تورلىعىنا تاعايىندالدى. ول ءاۋ باسىندا جاس ارتىستەر ۇجىمىن العا جەتەلەپ، ءبىر­شاما شىعارماشىلىق جەتىستىككە قول جەت­كىزگەنىمەن، كوپ ۇزاماي جاماناتى ەستى­لە باستادى.

سەبەبى باسشىلىق تىزگىندى ءوز قاراماعىندا شارۋاشىلىق مەڭگەرۋشىسى بولىپ ىستەيتىن زايىبىنا ۇستاتىپ، ءتىپتى سپەكتاكلدەگى رولدەردى سونىڭ كەڭەسىمەن بولۋگە كوشىپتى. ايەلىنە ۇناعان ارتىستەر  عانا باستى رولدەرگە يە بولىپ، الالاۋ بەلەڭ العان. بويلارىندا قۇداي بەرگەن قۇدىرەتتى دارىنى بار، ار-نامىسى بيىك جالىندى جاستار مۇنداي قورلاۋعا شىداسىن با – باس بىرىكتىرىپ، كەڭەسە كەلە، وبلىس اكىمىنىڭ اتىنا ارىز جازۋدى ۇيعارادى.

جاس ارتىستەردىڭ شاعىمىن قاراۋ ءۇشىن ءوڭىر باسشىسى جەرگىلىكتى زيالى قاۋىمنىڭ بىرنەشە بەدەلدى وكىلىن شاقىرىپ، اقىل­داسۋدى ءجون كورەدى. وبلىستىق قازاق دراما تەاترىنىڭ ديرەكتورىنىڭ ءتارتىبىن سولاردىڭ قاتىسۋىمەن قارايدى. مۇندايدى كۇتپەي، القالى توپتىڭ الدىندا قىسىلىپ-قىمتىرىلىپ وتىرعان ديرەكتورعا اكىم: «بالەنشەكە، ءسىزدىڭ ايەلىڭىز تەاتردىڭ شارۋاشىلىق مەڭگەرۋشىسى بولعا­نىمەن، تالانتتى ۇيىمداستىرۋشى كورىنەدى. ءسىزدىڭ ورنىڭىزعا سول كىسىنى ديرەكتور ەتىپ قويساق، ال ءسىزدى باس رەجيسسەر قىلىپ قال­دىرساق قارسى ەمەسسىز بە؟» دەيدى سۇراقتى توتە­سىنەن قويىپ. ساسقالاقتاپ قالعان ديرەكتور: ء«يا-ءيا، ايەلىم تەاتردى باسقارا الادى. قارسى ەمەسپىن...»، دەيدى مىڭگىرلەپ. سوندا اكىم: «مەن ءسىزدى سىنايىن دەپ ادەيى ايتىپ ەدىم. ايەلىڭىزدىڭ ءسوزىن تىڭداپ، ارتىستەردى الالايتىنىڭىزعا كوزىم جەتتى. ەرتەڭنەن باس­تاپ، ونى وبلىستىق ورىس دراما تەاترىنداعى ارىپتەسىمەن اۋىستىرامىز. ايەلىڭىز ەندى قازاق تەاترىنان اۋلاق ءجۇرسىن جانە ءسىزدىڭ جۇمىسىڭىزعا ارالاسپاسىن. ال ۇجىمداعى احۋالدى قالپىنا كەلتىرۋ ماقساتىندا تەاتر­دىڭ جانىنان كوركەمدىك كەڭەس اشىپ، ونىڭ قوعام­دىق نەگىزدەگى توراعاسى ەتىپ، باسقا شىعار­ماشىلىق ۇجىمنىڭ تاجىريبەلى باسشىسىن بەكىتەمىز. ءسىز رولدەردى بولگەندە سول كىسىمەن مىندەتتى تۇردە اقىلداسىپ  وتىرۋىڭىز كەرەك»، دەپ شەشەدى. وسىنداي ساليقالى شەشىمنىڭ ارقاسىندا وبلىستىق قازاق دراما تەاترىنداعى  شىعارماشىلىق احۋال قالپىنا كەلتىرىلگەن.

تاعى ءبىر وڭىردە وبلىس اكىمى وزىنە اسا­بالىق ونەرىمەن ۇناعان شاعىن كلۋب مەڭگەرۋشىسىن ەشكىممەن اقىلداسپاستان، بىردەن وبلىستىق مادەنيەت باسقارماسىنىڭ باسشىسى ەتىپ تاعايىندادى. بۇعان اڭ-تاڭ بولعان جەرگىلىكتى حالايىق: «كوشەدە جۇرگەن پاقىردى اكىم بول دەپ شاقىردى...» دەگەن وسى»، دەپ ك ۇلىسكەن. «حالىق ايتسا، قالىپ ايتپايدى» عوي، بۇعان دەيىن مەملەكەتتىك قىزمەتتىڭ ماڭىنا جولاپ كورمەگەن ازامات ۇلكەن كرەسلوعا كەزدەيسوق وتىرعاندىقتان، وڭىردەگى مادەنيەت پەن ونەر ۇجىمدارىنا باسشىلىق جاساپ جارىتپاي، اياق- استىنان تالاي داۋ-داماي تۋعىزىپ، اقىرى ءبىر جىلعا جەتپەي ورنىنان الىندى.

ومىردە ءوزىمىز كۋا بولعان وسىنداي مىسالداردى ەسىمە تۇسىرگەن جايت – كەيىنگى كەزدە ەلگە بەلگىلى انشىلەردىڭ كوروناۆيرۋس پاندەمياسىنا بايلانىستى ۋاقىتشا جابىلعان ساحنادان كەتىپ، ءارتۇرلى ونەر ۇجىمدارىنا – وڭىرلىك فيلارمونيانىڭ ديرەكتورلىعىنان باستاپ، مادەنيەت باسقارماسىنىڭ باسشىسى لاۋازىمىنا دەيىنگى باسشىلىق قىزمەتتەرگە تاعايىندالىپ جاتقاندىعى. ارينە، وڭىرلەر باسشىلارىنىڭ قاتەرلى ىندەت سالدارىنان قيىن جاعدايدا قالعان ونەر يەلەرىنە قام­قورلىق تانىتىپ، ولارعا سالماقتى قىزمەت ۇسىن­عاندىعىنا ريزاشىلىق بىلدىرۋگە بولادى. تەك مادەنيەت جانە ونەر ۇجىمدارىنىڭ باسشىلىعىنا جەتكىلىكتى دايىندىقسىز كەلگەن، ءتىپتى بۇعان دەيىن ءبىر ادامعا دا باسشىلىق جاساپ كورمەگەن انشىلەردىڭ ءبارىنىڭ بىردەي وزدەرىنە سەنىپ تاپسىرىلعان جاۋاپتى قىز­مەتتەردى ويداعىداي اتقارىپ كەتۋى نەعايبىل. قازىردىڭ وزىندە كەيبىرەۋى «كوتەرە المايتىن شوقپاردى بەلىنە بايلاعانىن» ءتۇسىنىپ، قىزمەتىنەن كەتكەنى ءمالىم بولىپ جاتىر.

دەمەك، ۇلكەن ساحنالاردا ءان شىرقاپ، ەل قوشەمەتىنە بولەنگەن دارىندى انشىلەرىمىزگە قازىرگى قيىن-قىستاۋ كەزەڭدە الەۋمەتتىك قولداۋ كورسەتۋدىڭ باسقا  جولدارى ىزدەستىرىلسە، قۇبا-قۇپ. ماسەلەن، مادەنيەت جانە سپورت مينيسترلىگى  بەلگىلى ونەر يەلەرىنە قابىلەت-قارىمدارىنا ساي قىزمەت تاۋىپ بەرۋ ماسەلەسىن قاراستىرسا، ارتىق بولماس ەدى. بۇل رەتتە مەتسەنات كاسىپكەرلەردىڭ مۇمكىندىكتەرى دە ەسكەرىلسە، يگى. سونداي-اق ەل قازىناسى ەسەبىنەن رەسپۋبليكالىق تەلەراديوكومپانيالارعا بەرىلەتىن مەم­لەكەتتىك تاپسىرما بويىنشا دارىندى ان­شىلەرگە قوماقتى قالاماقى تولەپ، جەكە كون­تسەرتتەرىن  رەسپۋبليكالىق تەلەۆيزيا جانە راديو ارنالارىندا جازعىزىپ،  ەفيردەن جيىرەك بەرۋدى نەگە قولعا الماسقا؟ ەسەسىنە، تەلەكورەرمەندەر مەن راديوتىڭداۋشىلار اۋە تولقىنىن كۇنى-ءتۇنى جاۋلاپ العان  انشىسىماقتاردىڭ  قۇلاقتى سارسىتاتىن انسىماقتارىن تىڭداۋدى دوعارىپ، ناعىز ونەرگە دەن قويىپ، رۋحاني باي تۇسەر ەدى.

 

سوڭعى جاڭالىقتار

الماتىدا ەپيداحۋال كۇردەلەنىپ بارادى

كوروناۆيرۋس • بۇگىن، 11:00

«سارى» ايماقتا تۇركىستان وبلىسى تۇر

كوروناۆيرۋس • بۇگىن، 09:10

كوروناۆيرۋس قايتا كۇشەيدى

كوروناۆيرۋس • بۇگىن، 08:54

وڭتايلىسى – ونلاين وقۋ

ايماقتار • بۇگىن، 08:53

ساپا ارتپايىنشا، سۋبسيديا جوق

ايماقتار • بۇگىن، 08:45

كوروناۆيرۋس قايتا ءورشىدى

الەم • بۇگىن، 08:42

ۆيرۋس جۇقتىرۋ ازايماي تۇر

كوروناۆيرۋس • بۇگىن، 08:30

اسىعىس شەشىم

قازاقستان • بۇگىن، 08:15

كومەك كورسەتىلەدى

قوعام • بۇگىن، 08:10

قور ستراتەگياسى ازىرلەنەدى

قازاقستان • بۇگىن، 08:00

ۇقساس جاڭالىقتار