قر بعم بالالاردىڭ قۇقىقتارىن قورعاۋ كوميتەتىنىڭ توراعاسى ەسەنعازى يمانعاليەۆ پەن قر ءبىلىم جانە عىلىم ءمينيسترىنىڭ بالالاردىڭ قۇقىقتارىن قورعاۋ ماسەلەلەرى جونىندەگى كەڭەسشىسى رايسا شەر اقتوبە وبلىسىنا بارىپ, بالانىڭ وتباسىمەن كەزدەستى.
مينيسترلىك وكىلدەرى بالانىڭ جاعدايىمەن تانىسىپ, بالا مەن ونىڭ تۋىستارىنا قانداي كومەك قاجەت ەكەنىن سۇراپ ءبىلدى. بالاعا جان-جاقتى كومەك, ونىڭ ىشىندە پسيحولوگيالىق كومەك كورسەتىلەدى.
«اقتوبە وبلىسى اكىمدىگىنىڭ ءبىلىم باسقارماسى ءبىلىم جانە عىلىم مينيسترلىگىنە وقۋشىنىڭ اتا-اناسىنىڭ ءوتىنىشى تۋرالى ۋاقىتىلى حابارلامادى. مەكتەپ اكىمشىلىگى قاجەتتى جۇمىستى جۇرگىزبەي, تۋىستارىنىڭ ۇندەۋىنە ءتيىستى نازار اۋدارماعان. اكىمدىكتەر جانىنداعى بارلىق ءبىلىم باسقارماسى مەكتەپتەردە نە بولىپ جاتقانىن باقىلاۋدا ۇستاۋعا جانە وڭىرلەردە نە بولىپ جاتقانىن ءبىلۋى ءتيىس. مەكتەپتە ءار بالا ءۇشىن ىڭعايلى بولاتىن جاعداي جاساۋ كەرەك. نەمقۇرايلىلىققا جول بەرىلمەيدى», دەدى بالالار قۇقىعىن قورعاۋ كوميتەتىنىڭ توراعاسى ەسەنعازى يمانعاليەۆ.
سونداي-اق قر بعم وكىلدەرى اقتوبە وبلىسى اكىمىنىڭ ورىنباسارى, اقتوبە وبلىسى اكىمدىگىنىڭ ءبىلىم باسقارماسى باسشىلىعى, قۇقىق قورعاۋ ورگاندارى مەن قامقورشىلىق كەڭەسىنىڭ قاتىسۋىمەن كەڭەس وتكىزدى. وندا بولعان وقيعاعا بايلانىستى جاعداي تولىق انىقتالعانعا دەيىن مەكتەپ ديرەكتورى مەن ديرەكتوردىڭ ورىنباسارىن قىزمەتىنەن شەتتەتۋ تۋرالى شەشىم جاريا ەتىلدى.
جەرگىلىكتى اتقارۋشى ورگاندارعا كامەلەتكە تولماعاندارعا قاتىستى قاۋىپسىزدىك شارالارىن كۇشەيتۋ, وسى باعىتتاعى الدىن الۋ جۇمىستارى جانە ءبىلىم بەرۋ ۇيىمدارىنداعى بەينەباقىلاۋ كامەرالارىنىڭ جۇمىسىنا مۇقيات تەكسەرۋ جۇرگىزۋ بويىنشا تاپسىرمالار بەرىلدى.
وبلىس اكىمىنىڭ ورىنباسارى توراعالىق ەتەتىن اقتوبە وبلىسىنىڭ كامەلەتكە تولماعانداردىڭ ىستەرى جونىندەگى كوميسسياسىنا كامەلەتكە تولماعاندار اراسىنداعى زورلىق-زومبىلىققا قارسى كۇرەس بويىنشا الدىن الۋ جۇمىستارىن جۇرگىزۋ جۇكتەلدى.
بۇعان كەيىن اقتوبە وبلىسىنىڭ ءبىلىم سالاسىندا ساپانى قامتاماسىز ەتۋ دەپارتامەنتى مەكتەپ قىزمەتكەرلەرىنە قاتىستى تەرگەۋ جۇمىستارىن باستادى. قازىرگى ۋاقىتتا اتالعان فاكتى بويىنشا تەرگەۋ امالدارى جۇرگىزىلىپ جاتىر.
