سەنات سپيكەرى سوڭعى جىلداردا الەۋمەتتىك كاسىپكەرلىكتىڭ ەكونوميكالىق دامۋداعى ءرولى ارتىپ, مەملەكەت تاراپىنان بۇل سالانى جەتىلدىرۋگە ەرەكشە كوڭىل ءبولىنىپ جاتقانىن ايتتى.
«الەۋمەتتىك كاسىپكەرلىك – ەلىمىزدەگى جاڭا باعىتتاردىڭ ءبىرى. ونىڭ بولاشاعى زور. بۇل سالا تابىس تابۋمەن قاتار, ازاماتتاردىڭ وزەكتى الەۋمەتتىك ماسەلەلەرىن شەشۋگە مۇمكىندىك بەرەدى. سوندىقتان پرەزيدەنتىمىز قاسىم-جومارت كەمەل ۇلى توقاەۆ كاسىپكەرلىكتىڭ بۇل تۇرىنە باسا ءمان بەرىپ كەلەدى», دەدى ماۋلەن اشىمباەۆ.
سونداي-اق ول مەملەكەت باسشىسىنىڭ تاپسىرماسى بويىنشا الەۋمەتتىك كاسىپكەرلىكتى دامىتۋدى كوزدەيتىن زاڭ ازىرلەنىپ, قابىلدانعانىن تىلگە تيەك ەتتى. ايتا كەتسەك, اتالعان قۇجات سەناتورلاردىڭ باستاماسىمەن دايارلانعان.
«بۇل زاڭدا العاش رەت الەۋمەتتىك كاسىپكەرلىككە زاڭنامالىق تۇرعىدان تۇسىنىك بەرىلگەن. وسى زاڭ ارقىلى الەۋمەتتىك كاسىپكەرلەردى قولداۋعا ارنالعان ناقتى شارالار دا انىقتالدى. اتاپ ايتقاندا, سالىقتىق جەڭىلدىكتەر مەن نەسيەنىڭ ۇستەمە اقىسىن سۋبسيديالاۋ جانە جالداۋ قۇنىن تولەۋ سياقتى قارجىلاي قولداۋلار قاراستىرىلعان. مەملەكەت مەنشىگىندەگى عيماراتتاردى جەڭىلدىكپەن جالعا بەرۋ مۇمكىندىگى دە نازارعا الىندى. ودان بولەك, مەملەكەت تاراپىنان الەۋمەتتىك ماڭىزى بار جوبالاردى ىسكە اسىرۋ ءۇشىن گرانتتار بولىنەتىن بولادى», دەپ ءتۇسىندىردى سەنات توراعاسى.
ساپار بارىسىندا سەنات سپيكەرى اگرارلىق باعىتتا تابىستى جۇمىس ىستەپ كەلە جاتقان كوپ سالالى «بايسەركە-اگرو» كومپانياسىنىڭ جۇمىسىمەن تانىستى.
شارۋاشىلىققا ارنايى كەلگەن ماۋلەن اشىمباەۆ كومپانيانىڭ عىلىمي-وندىرىستىك وقىتۋ ورتالىعىنا ات باسىن بۇرىپ, زەرتتەۋ جۇمىستارىنا ەرەكشە نازار اۋداردى. اگروحولدينگتىڭ دەمونستراتسيالىق القابى مەن اۋىلشارۋاشىلىق تەحنيكالارىنىڭ جۇمىسىنا دا كوڭىل ءبولدى. ودان بولەك, سەنات توراعاسى اگروونەركاسىپ كەشەنىنىڭ عىلىمي جانە تەحنيكالىق جەتىستىكتەر كورمەسىمەن, سەلەكتسيالىق جولمەن اسىل تۇقىمدى مال الۋ جۇمىستارىمەن جانە ءسۇت, جىلقى ونىمدەرىن الۋدىڭ روبوتتاندىرىلعان تاسىلىمەن تانىستى.
«پرەزيدەنتىمىزدىڭ باستاماشى بولۋىمەن جەر قاتىناستارىنا قاتىستى ارنايى زاڭ جوباسى ازىرلەنىپ, قابىلداندى. سوعان سايكەس اۋىل شارۋاشىلىعى ماقساتىنداعى جەرلەردى شەتەلدىكتەرگە ساتۋعا جانە جالعا بەرۋگە ءبىرجولا نۇكتە قويىلدى. سونداي-اق مەملەكەت باسشىسىنىڭ تاپسىرماسىمەن جەر رەفورماسى جونىندەگى كوميسسيا قۇرىلىپ, تابىستى جۇمىس ىستەپ جاتىر. كوميسسيانىڭ ۇسىنىستارى ناتيجەسىندە اۋىلشارۋاشىلىق جەرلەرىن جەكەمەنشىككە بەرۋگە موراتوري ۇزارتىلدى. اۋىل شارۋاشىلىعى ماقساتىنداعى جەرلەردى جالعا الۋ قۇقىعىن ساتۋعا مۇمكىندىك بەرىلدى. بۇل نورما اۋىلشارۋاشىلىق جەرلەرىن نارىقتىق اينالىمعا ەنگىزۋگە مۇمكىندىك بەرەدى», دەدى ماۋلەن اشىمباەۆ.
ەلدى الاڭداتىپ وتىرعان قۋاڭشىلىق پەن مال شىعىنى ماسەلەسى دە نازاردان تىس قالمادى.
«مەملەكەت باسشىسى رەفورمالار جونىندەگى جوعارى كەڭەستىڭ سوڭعى وتىرىسىندا مال شارۋاشىلىعىنا ايتارلىقتاي سالدارىن تيگىزىپ وتىرعان قۋاڭشىلىق ماسەلەسىنە نازار اۋداردى. قازىرگى تاڭدا بۇل – بۇكىل ەلدى الاڭداتىپ وتىرعان پروبلەما. سوندىقتان ءتيىستى مينيسترلىك وسى ماسەلەنى شەشۋ ءۇشىن بار كۇش-جىگەرىن جۇمساۋى كەرەك. بۇل جولدا جۇيەلى قادامدار قاجەت. اۋىل شارۋاشىلىعى مينيسترلىگى جەدەل تۇردە احۋالدىڭ سالدارىن تالداپ, جاعدايدى جان-جاقتى ساراپتاپ, ماسەلەنى شەشۋ جولدارىن ۇسىنۋعا ءتيىس», دەپ تولىقتىردى سەنات توراعاسى.
سەنات سپيكەرى كەزدەسۋگە قاتىسقان اۋىل شارۋاشىلىعى ۆيتسە-مينيسترىنە بۇل باعىتتا بەلسەندىلىك تانىتۋ كەرەكتىگىن ايتتى.
