مۇحتار تىلەۋبەردى ءوز سوزىندە ستوكگولم باستاماسىنىڭ كوپتەگەن ءىس-شارالارى قازاقستاننىڭ يادرولىق قارۋسىزدانۋ جانە تاراتپاۋ سالاسىنداعى ىلگەرىلەتۋىمەن سايكەس كەلەتىنىن اتاپ ايتتى. بيىل سەمەي يادرولىق پوليگونىنىڭ جابىلۋىنا 30 جىل جانە يادرولىق قارۋدان ازات ورتالىق ازيا ايماعىن قۇرۋ تۋرالى شارتقا قول قويىلعانىنا 15 جىل تولۋىن اتاپ ءوتىپ, يادرولىق قاۋىپسىزدىك پەن يادرولىق قارۋدان ازات الەم ءۇشىن جاھاندىق كوشباسشىلار اليانسىن قۇرۋ جونىندەگى قازاقستاندىق باستامالاردى قولداۋعا جانە يادرولىق قارۋسىز الەمگە قول جەتكىزۋ جونىندەگى جالپىعا ورتاق دەكلاراتسيا تۋرالى بۇۇ باس اسسامبلەياسىنىڭ كەزەكتى قارارىن قابىلداۋعا شاقىردى.
ستوكگولم توبىنىڭ مينيسترلىك كەزدەسۋى اياسىندا مۇحتار تىلەۋبەردى ەقىۇ-نىڭ قازىرگى توراعاسى – شۆەتسيا سىرتقى ىستەر ءمينيسترىنىڭ م.ا. انن كريستين ليندەمەن ەكىجاقتى كەلىسسوزدەر وتكىزدى. تاراپتار ستوكگولمدە وتەتىن ۇيىمنىڭ مينيسترلىك كەزدەسۋى كونتەكسىندە قازاقستاننىڭ ەقىۇ-مەن ءوزارا ءىس-قيمىل ماسەلەلەرىن جانە قازاقستان مەن شۆەتسيا اراسىنداعى ىنتىماقتاستىقتى نىعايتۋ جولدارىن قاراستىردى. اتاپ ايتقاندا, جوعارى دەڭگەيدەگى ساياسي ديالوگ, ساۋدا-ەكونوميكالىق جانە ينۆەستيتسيالىق ىنتىماقتاستىق, «جاسىل ەكونوميكا» جانە COVID-19 سالدارىمەن كۇرەس ماسەلەلەرى تالقىلاندى.
سونداي-اق مۇحتار تىلەۋبەردى گەرمانيا سىرتقى ىستەر ءمينيسترى حايكو مااس جانە يوردانيانىڭ سىرتقى ىستەر جانە ەكسپاتريانتتار ىستەرى ءمينيسترى ايمان اس-سافاديمەن كەزدەستى. تاراپتار ەكىجاقتى ىنتىماقتاستىقتى ودان ءارى دامىتۋ جانە كوپجاقتى فورماتتاعى ءوزارا ءىس-قيمىل ماسەلەلەرىن تالقىلادى.
«ەگەمەن-اقپارات»
