«قايرات» – «ماككابي» (حايفا)
شۆەيتساريانىڭ نون قالاسىندا تارتىلعان چەمپيوندار ليگاسىنىڭ ءبىرىنشى كۆاليفيكاتسيالىق كەزەڭىنىڭ جەرەبەسى بويىنشا «قايرات» ەكىنشى جىل قاتارىنان حايفانىڭ «ماككابيىمەن» كەزدەسەتىن بولدى. الماتىنىڭ كومانداسى بىلتىر يزرايل كلۋبىمەن ەۋروپا ليگاسىنىڭ ءبىرىنشى ىرىكتەۋ كەزەڭىندە جولىعىپ, سىرت الاڭدا 2:1 ەسەبىمەن جەڭىلىپ قالعان بولاتىن. پاندەمياعا بايلانىستى بىلتىرعى باسەكەلەردە تەك ءبىر عانا ماتچ وتكىزىلگەن ەدى.
1913 جىلى قۇرىلعان «ماككابي» يزرايل چەمپيوناتىندا 12 مارتە باس جۇلدەنى ولجالادى. ول بيىلعى ماۋسىمنىڭ قورىتىندىسى بويىنشا ءوز ەلىنىڭ تەڭدەسسىز كلۋبى دەپ تانىلدى. ەل كۋبوگى جولىنداعى جارىستا التى رەت توپ جاردى. «ماككابي» – يزرايل فۋتبولى تاريحىنداعى ۋەفا چەمپيوندار ليگاسىنىڭ توپتىق كەزەڭىندە ونەر كورسەتكەن تۇڭعىش كوماندا (2002/2003). سول جارىستا ول جەتى ۇپاي جيىپ, ءۇشىنشى ورىنعا تابان تىرەدى. ەۋرودوداداعى ەڭ ۇزدىك كورسەتكىشى – كۋبوك يەگەرلەرى كۋبوگىنىڭ (1998/1999) شيرەك فينالى جانە ۋەفا كۋبوگىنىڭ (2006/2007) 1/8 فينالىنا دەيىن جەتۋى. بۇل كۇندەرى باراك باحار جاتتىقتىراتىن كوماندا نەگىزىنەن جەرگىلىكتى فۋتبولشىلاردان جاساقتالعان. سونداي-اق «ماككابيدىڭ» ساپىندا اۋستراليا, اقش, گامبيا, نيدەرلاند, سەربيا, كامەرۋن, يسپانيا, سۋرينام سەكىلدى مەملەكەتتەردىڭ دە وكىلدەرى بار.
قازاقستاندىق فۋتبول ساراپشىسى سەرگەي ۆولگين Vesti.kz ينتەرنەت باسىلىمىنا بەرگەن سۇحباتىندا «قايرات» قيىن قارسىلاسقا تاپ بولعانىن, الماتىلىق ۇجىمنىڭ كەلەسى كەزەڭگە ءوتۋ مۇمكىندىگى از ەكەنىن ايتقان ەدى.
– «ماككابي» – ءبىرىنشى ىرىكتەۋ كەزەڭىندە «قايراتقا» ءتۇسۋى مۇمكىن بولعان ەڭ ىڭعايسىز قارسىلاستىڭ ءبىرى. بۇل تۋرالى مەن بىلتىرعى جەرەبە تارتۋ راسىمىنەن كەيىن دە ايتقان بولاتىنمىن. ستاتيستيكاعا قارايتىن بولساق, يزرايل كلۋبى «قايراتتان» باسىم بولىپ تۇرعانىن بايقايمىز. بىراق ستاتيستيكانى كەز كەلگەن ۋاقىتتا بۇزۋعا بولادى. قارىمتا كەزدەسۋدىڭ الماتىدا وتەتىنى «قايراتقا» ازداعان ۇستەمدىك سىيلايدى, – دەگەن ەدى ول.
ال سپورت ءجۋرناليسى ايدىن قوجاحمەت الماتىلىق ۇجىمنىڭ بۇل جولى «ماككابيدەن» باسىم تۇسەتىنىنە سەنىمدى. ونىڭ ايتۋىنشا, «قايرات» يزرايل كلۋبتارىمەن بۇگىنگە دەيىن بىرنەشە رەت ويناپ, ولاردى ابدەن جاتتاپ العان. سوندىقتان بىلتىرعى ەل چەمپيوندارى بۇل جولى قارسىلاستارىنىڭ وسال تۇسىن تابادى. «ماككابي» مەن «قايرات» اراسىنداعى قارىمتا كەزدەسۋ 14 شىلدەدە الماتىداعى ورتالىق ستاديوندا وتەدى.
«استانا» – «اريس»
التى جىلدان بەرى تەك چەمپيوندار ليگاسىنىڭ ىرىكتەۋ كەزەڭىندە ونەر كورسەتىپ جۇرگەن ەلوردانىڭ «استانا» كلۋبى بىلتىر ەل چەمپيوناتىندا كۇمىس جۇلدە العاندىقتان ۋەفا كونفەرەنتسيا ليگاسىندا باق سىنايتىن بولادى. جەرلەستەرىمىز اتالعان ءتۋرنيردىڭ ەكىنشى ىرىكتەۋ كەزەڭىندە گرەكيانىڭ «اريسىمەن» كەزدەسەدى.
«اريس» بىلتىرعى گرەكيا سۋپەرليگاسىندا «وليمپياكوس» جانە پاوك كلۋبتارىن العا جىبەرىپ, ءۇشىنشى ورىن يەلەنگەن بولاتىن. 1914 جىلى قۇرىلعان كلۋب بۇگىنگە دەيىن ءوز ەلىنىڭ ءۇش دۇركىن (1928, 1932 جانە 1946) چەمپيونى سانالادى.
وتكەن ماۋسىمدا «اريس» قولا جۇلدە ولجالاپ, 40 جىلدان كەيىن العاش رەت جۇلدەگەرلەر قاتارىنان كورىندى. ۋەفا-نىڭ كلۋبتىق رەيتينگىندە 237-ورىندا تۇر, ال «استانا» قازىرگى ۋاقىتتا 64-ساتىعا ورنالاسقان. بىراق ەكى كوماندانىڭ ترانسفەرلىك باعاسى شامالاس. ماسەلەن, ەلوردالىق كلۋبتىڭ جالپى قۇنى – 15,95 ميلليون ەۋرو بولسا, «اريس» فۋتبولشىلارى 15,7 ميلليون ەۋروعا باعالانعان.
«اريس» كلۋبىندا 2015/16 جىلعى ماۋسىمدا «لەستەرمەن» بىرگە انگليا چەمپيونى اتانعان يوان بەنالۋان وينايدى. كوماندادا كوبىنە شەتەلدىك لەگيونەرلەر دوپ تەبەدى. ال كلۋبتا بارلىعى سەگىز گرەكيالىق فۋتبولشى وينايدى.
ەلوردالىق ۇجىم بىلتىرعى ماۋسىمداعى ساتسىزدىكتەن ءتيىستى قورىتىندى شىعارىپ, بيىل ەل چەمپيوناتىندا ءتاۋىر ويىن كورسەتىپ ءجۇر. قازاقستاندىق فۋتبول مامانى بولات ەسماعامبەتوۆتىڭ ايتۋىنشا, «استانا» ءۇشىن «اريس» قيىندىق تۋدىرماۋى مۇمكىن.
ەكى ۇجىم اراسىنداعى ءبىرىنشى ويىن 22 شىلدەدە ەلوردادا, قارىمتا كەزدەسۋ 29 شىلدەدە گرەكيادا وتەدى.
«توبىل» – «حايدۋك»
ۋەفا كونفەرەنتسيا ليگاسىنىڭ ەكىنشى ىرىكتەۋ كەزەڭىندە قوستانايدىڭ «توبىلى» حورۆاتيانىڭ «حايدۋك» كلۋبىمەن كەزدەسەدى. بىلتىرعى ەل چەمپيوناتىنىڭ كۇمىس جۇلدەگەرى ەۋروكۋبوك باسەكەسىندە ەڭ قيىن قارسىلاسقا تاپ بولدى. دەگەنمەن «حايدۋك» سوڭعى ەكى جىلدا ەۋرودودا ويىندارىندا كوزگە تۇسە الماي ءجۇر. چەمپيوناتتاعى جاعدايى دا اسا ءماز ەمەس. ەڭ كەيىنگى رەت 2005 جىلى حورۆاتيا چەمپيونى اتانعان. ال بىلتىر 60 ۇپاي جيناعان «حايدۋك» تۋرنير كەستەسىندە 4-ورىنعا تابان تىرەدى.
حورۆاتيالىق كلۋبتىڭ ترانسفەرلىك قۇنى «توبىلدان» ءۇش ەسە جوعارى. Transfermarkt مالىمەتى بويىنشا, «حايدۋك» فۋتبولشىلارىنىڭ باعاسى – 31,43 ميلليون ەۋروعا باعالانعان. «توبىل» كلۋبىنىڭ باعاسى – 11,78 ميلليون ەۋرو.
«حايدۋك» قازاقستاندىق كلۋبپەن العاش رەت كەزدەسەيىن دەپ تۇرعان جوق. حورۆاتيالىق كلۋب بۇعان دەيىن 2014/15 جىلعى ەۋروپا ليگاسىنىڭ ىرىكتەۋ كەزەڭىندە قاراعاندىنىڭ «شاحتەرىمەن» ويناپ, ەكى ماتچتىڭ قورىتىندىسى بويىنشا (4:2, 3:0) كەلەسى كەزەڭگە شىعىپ ەدى.
ەكى ۇجىم اراسىنداعى ءبىرىنشى ويىن 22 شىلدەدە حورۆاتيادا, قارىمتا كەزدەسۋ 29 شىلدەدە قوستانايدا وتەدى.
«شاحتەر» – «ستياۋا»
بيىل «شاحتەر» اراعا جەتى جىل سالىپ العاش رەت ەۋروكۋبوك ويىندارىنا قاتىسپاق. جەرەبە قورىتىندىسى بويىنشا, قاراعاندىنىڭ كومانداسى بۋحارەستتىڭ «ستياۋاسىمەن» كەزدەسەدى. ءدال قازىر فۋتبول ماماندارى ەۋروكۋبوك تۋرنيرىنە قاتىسىپ جاتقان قازاقستاندىق كوماندالاردىڭ ىشىندە ەڭ قيىن قارسىلاس «شاحتەرگە» ءتۇستى دەپ وتىر.
«ستياۋا» بىلتىرعى رۋمىنيا چەمپيوناتىنىڭ سوڭعى سەگىز ويىنىنىڭ تەك بىرەۋىندە عانا جەڭىسكە جەتكەن. بىراق قۇرام بويىنشا «شاحتەر» قارسىلاسىنان الدەقايدا ءالسىز بولىپ تۇر. ماسەلەن, Transfermarkt.com «ستياۋا» كلۋبىن 30 ميلليون ەۋروعا باعالاپ وتىر. ال «شاحتەر» فۋتبولشىلارىنىڭ باعاسى – 6,4 ميلليون ەۋرو.
بولات ەسماعامبەتوۆ «شاحتەردىڭ» كەلەسى كەزەڭگە شىعۋ مۇمكىندىگىن 20 پايىزعا باعالاپ وتىر. ايتا كەتەيىك, ەكى كلۋب اراسىنداعى ءبىرىنشى كەزدەسۋ 22 شىلدەدە رۋمىنيادا, قارىمتا كەزدەسۋ 29 شىلدەدە قاراعاندىدا وتەدى.
