قوعام • 07 شىلدە، 2021

قىزمەت كورسەتۋ سالاسىنداعى الاياقتتىق تىيىلار ەمەس

جيھازداردى جوندەۋ قىزمەتتەرىن «ۇسىنعان»، بىراق ءوز مىندەتتەمەلەرىن ورىنداماعان قوستانايلىققا قاتىستى پوليتسيادا 24 ارىز تىركەلدى. ءتارتىپ ساقشىلارى جابىرلەنۋشىلەردىڭ ارىزدارىن الۋدى جالعاستىرۋدا، دەپ حابارلايدى Egemen.kz.

بوتاكوز باقبەرگەن

«اۋليەكول اۋدانىنىڭ 27 جاستاعى تۋماسى وبلىس ورتالىعىندا جەكە كاسىپپەن اينالىسۋعا شەشىم قابىلداعان. سول ماقساتپەن ول اعاسىنىڭ اتىنا جك تىركەپ، جالعا كەڭسە العان. كاسىپتىڭ ءمانى جۇمساق جيھازدى تارتۋ جانە جوندەۋ قىزمەتتەرى بولدى. كليەنتتەردەن تۇسكەن 20، 30، 50 مىڭ تەڭگە از بولىپ كورىنىپ، ەڭ ۇلكەن مامىلە 300 مىڭ تەڭگەنى قۇراعان»، دەپ حابارلادى پوليتسيادان.

كۇدىكتى ديۆاندار مەن كرەسلولاردى جالعا الىنعان كولىكپەن الىپ كەتىپ، الاياقتىققا تۋىستارى مەن تانىستارىن تارتقانى بەلگىلى بولدى.

«ناتيجەسىندە الدانعانداردىڭ سانى 24 ادامدى قۇرادى. كەيبىرەۋلەرى باق پەن الەۋمەتتىك جەلىلەردە وبلىستىق پوليتسيا دەپارتامەنتىنىڭ حابارلاماسى شىققاننان كەيىن پوليتسياعا جۇگىنگەن. ازاماتتارعا جالپى سوماسى ءبىر جارىم ميلليون تەڭگەدەن استام ماتەريالدىق زالال كەلتىرىلگەن. الاياق تاپسىرىس بەرۋشىلەردىڭ مىندەتتەمەلەرىن قارجىلىق قيىندىقتار سەبەبىنەن ورىنداماعانىن ايتتى. قازىرگى ۋاقىتتا قىلمىستىق ىستەر وڭتۇستىك پوليتسيا بولىمىنەن سوتقا جولداندى»، دەپ ءتۇسىندىردى پوليتسيا دەپارتامەنتىندە.

پوليتسيا قىزمەتكەرلەرى جابىرلەنۋشىلەر سانى ودان دا كوپ بولۋى مۇمكىن ەكەنىن ايتۋدا.

سونداي-اق قوستاناي پوليتسەيلەرى تاعى ءبىر الاياقتىق تۋرالى ەسكەرتەدى.

«وڭتۇستىك پوليتسيا ءبولىمىنىڭ ءىس جۇرگىزۋىندە قوستانايدىڭ 29 جاستاعى تۇرعىنىنا قاتىستى قىلمىستىق ىستەر قوزعالدى. ول ازاماتتاردان «سەپتيك دايىنداعانى» ءۇشىن اقشا جيناعان. بۇگىنگى تاڭدا جابىرلەنۋشىلەردىڭ التى ءوتىنىشى تىركەلدى»، دەپ تولىقتىردى ۆەدومستۆودان.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز