وبلىس اكىمىنىڭ ءبىرىنشى ورىنباسارى ءلاززات تۇرلاشوۆ جينالعان قاۋىمدى ەلوردا كۇنىمەن قۇتتىقتاي وتىرىپ, حالىقتى قولجەتىمدى باسپانامەن قامتاماسىز ەتۋ ءۇشىن وڭىردە اتقارىلىپ جاتقان جۇمىستار تۋرالى ايتىپ بەردى.
«بيىل تالدىقورعاندا 120 مىڭ شارشى مەتردەن استام تۇرعىن ءۇي پايدالانۋعا بەرىلەدى. اعىمداعى جىلى تۇرعىن ءۇي ماسەلەسىن شەشۋ ءۇشىن رەسپۋبليكالىق بيۋدجەتتەن بارلىعى 5,6 ملرد.تەڭگە ءبولىندى. سونداي-اق, 155 كوتتەدجدىڭ قۇرىلىسىنا جەرگىلىكتى بيۋدجەتتەن 1,5 ملرد تەڭگە ءبولىندى. مۇنىڭ ءبارى ءاربىر قازاقستاندىقتىڭ ءال-اۋقاتىن ارتتىرۋعا باعىتتالعان سىندارلى مەملەكەتتىك ساياساتتىڭ كورنەكى ناتيجەسى. مەرەكە قارساڭىندا قابىلدانىپ جاتقان شارالاردىڭ ارقاسىندا 55 جەتىسۋلىق وتباسى تالدىقورعاندا قونىس تويىن تويلادى. بۇل ءبارىمىز ءۇشىن ۇلكەن جانە قۋانىشتى وقيعا. بارشاڭىزدى ەلوردا كۇنىمەن جانە قونىس تويىمەن شىن جۇرەكتەن قۇتتىقتايمىن! ءار شاڭىراقتىڭ استىندا, ءار وتباسىندا ءاردايىم جايلىلىق, وركەندەۋ جانە ءوزارا تۇسىنىستىك بولسىن!», دەدى ءلاززات تۇرلاشوۆ.
جاڭا قونىس يەلەرى اتىنان № 4 بالاباقشانىڭ تاربيەشىسى كۇلاش بەكەنوۆا ءسوز سويلەپ, قالالىق تكش ءبولىمى قىزمەتكەرلەرىنىڭ ءتۇسىندىرۋ جۇمىستارىنىڭ ارقاسىندا تۇرعىن ءۇي مەملەكەتتىك باعدارلامالارىنىڭ بارلىق باعىتتارى تۋرالى ءبىلىپ, «شاڭىراق» باعدارلاماسى اياسىندا جەكە باسپاناعا قول جەتكىزە العانىن اتاپ ءوتتى. ول ءوز مىندەتتەرىن ورىنداۋعا جاۋاپكەرشىلىكپەن قارايتىن ماماندارعا العىسىن ءبىلدىرىپ, حالىقتى قولجەتىمدى تۇرعىن ۇيمەن قامتاماسىز ەتۋ بويىنشا وڭىردە جۇرگىزىلىپ جاتقان شارالاردىڭ بەلسەندىلىگىن ەرەكشە اتاپ ءوتتى.
ءلاززات تۇرلاشوۆ «اسار» وڭالتۋ ورتالىعىنىڭ باسشىسى ەلدوس بايالىشباەۆ پەن «سەنىم» مەكتەبى ديرەكتورىنىڭ وقۋ ءىسى جونىندەگى ورىنباسارى رايگۇل بەكوۆانىڭ جاڭا وشاعىنا بارىپ, گۇل شوقتارى مەن ەستەلىك سىيلىقتارىن تابىس ەتتى.
ايتا كەتسەك, كوپپاتەرلى تۇرعىن ءۇيدىڭ قۇرىلىسى وتكەن جىلدىڭ مامىر ايىندا باستالعان بولاتىن. باس مەردىگەر – «وا نيپي ترانسنەفت» جشس. ءۇيدىڭ جالپى اۋدانى - 5 مىڭ شارشى مەتردەن استام. پاتەرلەردىڭ جالپى سانى – 55, ونىڭ ىشىندە 20 ءۇش بولمەلى, 15 ءبىر جانە ەكى بولمەلى, 5 ءتورت بولمەلى پاتەرلەر.
ەلوردا كۇنىنە وراي ىلە اۋدانىندا 60 پاتەرلى, قاپشاعاي قالاسىندا 50 پاتەرلى جانە ەڭبەكشىقازاق اۋدانىندا 30 پاتەرلى تۇرعىن ءۇي پايدالانۋعا بەرىلدى. كوپتەن كۇتكەن قونىس تويىن تويلاعاندار اراسىندا كوپبالالى وتباسىلار, جەتىم بالالار, مۇگەدەكتەر, حالىقتىڭ الەۋمەتتىك وسال توپتارى ساناتىنداعى وكىلدەر مەن مەملەكەتتىك قىزمەتكەرلەر بار.
