الماتىدا كۆي-ءدىڭ تارالۋىن بولدىرماۋ جونىندەگى جەدەل شتابتىڭ دەرەكتەرى بويىنشا اعىمداعى جىلدىڭ 9 ءساۋىرى مەن 1 شىلدەسى ارالىعىندا Ashyq ءموبيلدى قوسىمشاسىنىڭ كومەگىمەن QR-كودىن سكانەرلەۋ ناتيجەلەرى بويىنشا 1449 تۇرعىننىڭ «قىزىل» مارتەبەسى راستالدى. تاعى 370 تۇرعىن «سارى» مارتەبەگە يە.
Ashyq جوباسى بويىنشا جۇمىس ىستەيتىن كاسىپكەرلىك نىساندارىنىڭ كىرە بەرىستەرىندەگى سكانەرلەۋ ناتيجەسى 716 تۇرعىننىڭ «قىزىل», 189 تۇرعىننىڭ «سارى» مارتەبەسىن راستادى. ايتا كەتەرلىگى «قىزىل» مارتەبەسى بار 157 جانە «سارى» مارتەبەسى بار 40 تۇرعىن فيتنەس ورتالىقتارى مەن باسسەيندەرگە كىرۋگە تىرىسقان. مونشا مەن ساۋنادا «قىزىل» مارتەبەسى بار 39 ادام, «سارى» مارتەبەسى بار 9 ادام انىقتالدى. كينوتەاترلاردىڭ كىرە بەرىستەرىندە «قىزىل» مارتەبەسى بار 71 تۇرعىن, «سارى» مارتەبەسى بار 34 ادام انىقتالدى. قوعامدىق تاماقتانۋ ورىندارىندا «قىزىل» مارتەبەسى بار 286 جانە «سارى» مارتەبەلى 56 تۇرعىن انىقتالدى. ال الماتىنىڭ اۋەجايىنا «قىزىل» مارتەبەدەگى 89 جانە «سارى» مارتەبەلى 21 ادام كىرۋگە تىرىسقان.
الايدا, نىسانعا بارماي, سكانەرلەۋ ناتيجەسىندە, ياعني ۇيدە وقشاۋلانعانداردىڭ ىشىندە 733 تۇرعىننىڭ «قىزىل», 181-ءىنىڭ «سارى» مارتەبەلەرى راستالدى. انىقتالعانىنداي, ولار قوعامدىق ورىندارعا, ونىڭ ىشىندە باسسەيندەرگە, ساۋنالارعا,كافەلەر مەن مەيرامحانالار بارۋعا تىرىسقان.
بۇگىندە ۇيدە امسك جانە تەلەمەديتسينا ورتالىعىنىڭ ءموبيلدى توپتارىنىڭ باقىلاۋىندا 2306 ناۋقاس بار, ولاردىڭ 291-ءى سيمپتومسىز, 1970-ءى جەڭىل, 45-ءى ورتاشا اۋىرلىق دارەجەسىندە.
ايتقانداي, ۆاكتسينالاۋ قۇجاتى Ashyq قوسىمشاسىمەن بىرىكتىرىلگەن. وسىلايشا, كوروناۆيرۋستان ۆاكتسينانىڭ ەكى كومپونەنتىن العان تۇرعىندار «جاسىل» مارتەبەگە يە بولادى.
الماتى
