«ازىرلەنگەن ستاتيستيكالىق بولجامعا سايكەس شىلدە ايىندا اقتوبە وبلىسىنىڭ (نۇرا, ىرعىز), قوستاناي (قارامەڭدى, امانگەلدى), اتىراۋ (قۇلسارى) جانە ماڭعىستاۋ وبلىسىنىڭ (اققۇدىق) جەكەلەگەن پۋنكتتەرىندە ەكسترەمالدى قۋاڭشىلىق جاعدايلار كۇتىلەدى» دەپ حابارلادى قازگيدرومەت.
اقمولا (ەسىل, جاقسى, اتباسار), اقتوبە (نوۆوروسسيسكوە, قارابۇتاق, باسقۇدىق, نۇرا, ىرعىز), قوستاناي (پرەسنوگوركوۆكا, ارشالى, توبىل, ارالكول, تورعاي), سولتۇستىك قازاقستان (تايىنشا) جانە ماڭعىستاۋ وبلىسىندا (سام) دا قاتتى قۋاڭشىلىق بولۋى مۇمكىن.
قازگيدرومەت بولجامىنا ساي, اقمولا (بالكاشينو), اقتوبە (كومسومولسكوە, تەمىر), قوستاناي (ميحايلوۆكا, قاراسۋ, جىتىقارا, قۇسمۇرىن, ديەۆسكايا, جەلەزنودوروجنىي), سولتۇستىك قازاقستان (ياۆلەنكا, سەرگەەۆكا جانە رۋزاەۆكا), شىعىس قازاقستان (لەنينوگورسك), جامبىل (قورداي), الماتى (4-ءشى اۋىل), قىزىلوردا (قازالى) جانە اتىراۋ وبلىسىندا (اتىراۋ) ورتاشا دەڭگەيدەگى قۋاڭشىلىق بولادى.
«ماۋسىم ايىنىڭ سوڭعى ونكۇندىگىندە وتكەن مول جاۋىن-شاشىننىڭ ارقاسىندا, ورتاشا ىلعالدى جاعدايلار باتىس قازاقستان وبلىسىندا (جالپاقتال, جانىبەك, وردا), شىعىس قازاقستان وبلىسىندا (باقتى) جانە ماڭعىستاۋ وبلىسىندا (بەينەۋ) بولجانادى. قالعان اۋماقتاردا ىلعالدانۋ شارتتارى قالىپتى جاعدايعا جاقىن بولادى دەپ كۇتىلۋدە» دەپ جازادى ءباسپاسوز حابارلاماسىندا.
ايتا كەتەيىك, شىلدە ايىندا ەلىمىزدىڭ سولتۇستىك-شىعىس جارتىسىندا جاۋىن-شاشىن مولشەرى نورماعا جۋىق بولادى دەپ كۇتىلۋدە.
