وندا سەناتور قايرات قوجامجاروۆ قازاقستان پرەزيدەنتىنىڭ ادام قۇقىقتارىن قورعاۋ تەتىكتەرىن نىعايتۋعا باعىتتالعان باستاماسىمەن قولعا الىنعان رەفورمالارمەن ارىپتەستەرىن تانىستىردى. ول اتاپ ايتقاندا «قازاقستان رەسپۋبليكاسىنداعى ادام قۇقىقتارى جونىندەگى ۋاكىل تۋرالى» زاڭ جوباسىنا ەگجەي-تەگجەيلى توقتالدى.
«قۇجاتتا ادام قۇقىقتارى جونىندەگى ۋاكىل مارتەبەسىنە, سايلاۋ تارتىبىنە جانە ونىڭ قىزمەتىنىڭ پرينتسيپتەرىنە ەرەكشە ءمان بەرىلدى. ازاماتتىڭ بۇزىلعان قۇقىقتارىن قالپىنا كەلتىرۋ جونىندە ۋاكىلدىڭ وكىلەتتىكتەرى ايتارلىقتاي كەڭەيتىلۋدە, سونداي-اق ادام قۇقىقتارى مەن بوستاندىقتارىنىڭ بۇزىلۋى تۋرالى اقپاراتتى زەرتتەۋ جانە تالداۋ فۋنكتسياسى ەنگىزىلۋدە», دەدى قايرات قوجامجاروۆ.
سەناتور عۇمار دۇيسەمباەۆ كەلەسى كۇنى ەكونوميكالىق ماسەلەلەر, عىلىم, تەحنولوگيالار جانە قورشاعان ورتا جونىندەگى جالپى كوميتەت وتىرىسىنىڭ جۇمىسىنا قاتىستى.
دەپۋتات ءوز سوزىندە قورشاعان ورتانىڭ جاي-كۇيىن جاقسارتۋ جانە «جاسىل ەكونوميكاعا» كوشۋ قاجەتتىگى ماسەلەلەرىن قوزعادى جانە قازاقستاننىڭ وسى باعىتتا قابىلداپ جاتقان شارالارى تۋرالى ايتىپ بەردى.
«قازاقستان پرەزيدەنتى قاسىم-جومارت توقاەۆ «جاسىل» ەكونوميكا رەفورماسىن جۇزەگە اسىرىپ كەلەدى. ەلىمىزدە جاڭا ەكولوگيالىق كودەكس قابىلداندى. بۇل رەفورمالاردىڭ ءبارى ەكولوگيالىق وزەكتى پروبلەمالاردى شەشۋگە جانە قازاقستاندىق زاڭنامانى ەىدۇ ەلدەرىنىڭ تالاپتارىمەن ۇيلەستىرۋگە باعىتتالعان», دەدى عۇمار دۇيسەمباەۆ.
ول سونداي-اق بۇۇ قاۋىپسىزدىك كەڭەسىنە ەسەپ بەرەتىن بيولوگيالىق قاۋىپسىزدىك جونىندەگى حالىقارالىق اگەنتتىكتى قۇرۋ جونىندەگى قازاقستاننىڭ باستاماسىنا قاتىسۋشىلاردىڭ نازارىن اۋداردى, دەپ حابارلادى سەناتتىڭ ءباسپاسوز قىزمەتى.
