وسلو قالاسىنداعى ادەبيەت ۇيىندە وتكەن جاڭا جيناقتىڭ تۇساۋكەسەرىندە قازاقستاننىڭ نورۆەگياداعى ەلشىسى ەركىن احينجانوۆ: «قازاقستان پرەزيدەنتى قاسىم-جومارت توقاەۆ اباي مۇراسىنا ۇلتىمىزدىڭ بىرلىگى مەن وركەندەۋىنە جول اشاتىن قۇندى بايلىق رەتىندە جۇگىنۋگە شاقىرادى. ءبىز اباي شىعارمالارىنىڭ نورۆەگ تىلىندە جارىق كورۋىن قازاقستان تاۋەلسىزدىگىنىڭ 30 جىلدىعىنا ارنايمىز, – دەدى.
اباي جايلى ومىرباياندىق تاراۋدى نورۆەگ عالىمى, باسپاگەر ءارى كىتاپتىڭ باس رەداكتورى وسحيلد كيۋلوس جازعان. ول ءوز سوزىندە: «اباي دارا قوعامدىق سىنشى بولدى, بىراق ونى ءبىرىنشى كەزەكتە ەكزيستەنتسيالدىق ماسەلەلەر تولعانتتى. ابايدىڭ «قارا سوزدەرى» الەمدىك ادەبي مۇرانىڭ ماڭىزدى بولىگى سانالادى. اباي شىعارمالارىن نورۆەگ تىلىنە اۋدارۋ – قازاقستاندى نورۆەگياعا تانىستىرۋدىڭ بىرەگەي مۇمكىندىگى. بۇعان قوسا, بۇل جالپى ادامزات تاجىريبەسىنە ۇلى ويشىلدىڭ كوزقاراستارىمەن ءبولىسۋ مۇمكىندىگى دە بولىپ تابىلادى. ءبىزدىڭ باسپا بۇل جوبانى جوعارى باعالادى, – دەدى.
ال اۋدارماشى حاكىم مۇراسىنىڭ ەشقاشان ەسكىرمەيتىنىن, كەرىسىنشە ۋاقىت وتە كەلە وعان سۇرانىس كۇشەيە بەرەتىنىن ايتتى. «اقىن شىعارمالارى قوعامنىڭ كونە, ءتۇپ-تامىرى شابىلماعان ماسەلەلەرىن ناقتى سۋرەتتەيدى, ەلگە باعىت-باعدار سىلتەيدى. ابايدىڭ وسيەت سوزدەرىن ءار ادام ءبىلىم, ادامگەرشىلىك پەن سىپايىلىق ساباقتارىن الا الاتىن ءومىر مەكتەبى دەۋگە بولادى. اباي وتباسى نەگىزدەرىنە, بالا تاربيەلەۋگە, تىلدەردى وقۋ مەن وزگە مادەنيەتتەرمەن تانىسۋعا كوڭىل بولەدى. سونىمەن قاتار اباي ادەبيەت بىلگىرى بولعان. ونى شابىتتاندىرعانداردىڭ اراسىندا فيرداۋسي, نيزامي جانە ناۋاي سياقتى شىعىس كلاسسيكتەرىنەن باستاپ ورىستىڭ كوركەمسوز شەبەرلەرى – لەرمونتوۆ, تولستوي مەن پۋشكين, باتىستىڭ اقىندارى – گەتە مەن گەينە بولدى. ول 120-150 جىل بۇرىن دا, بۇگىنگى تاڭدا دا وزەكتى, ۋاقىتتان تىس ماسەلەلەر تۋرالى جازعان. نورۆەگيا وقىرماندارى اباي شىعارمالارىنان كوپتەگەن پايدالى تاعىلىمدار الا الاتىنىنا سەنىمدىمىن, – دەپ اتاپ ءوتتى ل.بوبويوروۆا.
نورۆەگتەر الەمدەگى كىتاپتى ەڭ كوپ وقيتىن حالىقتاردىڭ ءبىرى ەكەنىن ەسكەرىپ, اۋدارمانىڭ جوعارى ساپاسىنا عانا ەمەس, كىتاپتىڭ قالىڭ وقىرمانعا قولجەتىمدىلىگىن قامتاماسىز ەتۋگە دە نازار اۋدارىلىپ وتىر. جاڭا جيناق نورۆەگ كىتاپحانالارىنان بولەك, تسيفرلى پلاتفورمالاردا تاراتىلدى. بۇل باسىلىم قازىر لوندونداعى كىتاپ كورمەسىندە دە تانىستىرىلۋدا.
