ىزگى نيەت ويىندارى

ماسكەۋدە وتكەن دوداعا 79 مەملەكەتتەن كەلگەن 3 مىڭنان اسا سپورتشى قاتىستى. ولار سپورتتىڭ 18 ءتۇرى بويىنشا سايىسقا ءتۇسىپ, بارلىعى 187 جۇلدە جيىنتىعىن ساراپقا سالدى. بۇل – 10 جىلعا جۋىق ۋاقىتقا سوزىلعان ۇزىلىستەن كەيىن جەر شارىنداعى ەكى ۇلى دەرجاۆا – كسرو مەن اقش قۇرامالارىنىڭ اسا ءىرى كەشەندى جارىستاردا العاش رەت شەبەرلىك بايقاسۋى ەدى. ونىڭ الدىندا امەريكالىقتاردىڭ ماسكەۋ وليمپياداسىنا (1980 جىل) بويكوت جاريالاعانى, ال كەڭەس وداعى لوس-اندجەلەسكە (1984 جىل) بارۋدان باس تارتقانى بەلگىلى.

قوس جۇيە – سوتسياليستىك جانە كاپيتاليستىك باعىتتاعى مەم­لەكەت­تەردىڭ ءوزارا تارتىسى ال­عاش­قىلاردىڭ پايداسىنا شەشىلدى. اسىرەسە, جارىس قوجايىندارىنىڭ قارقىنى كۇشتى بولدى. كسرو قۇ­را­ماسى 241 (118 التىن+80 كۇمىس+43 قولا) جۇلدە الىپ, جال­پى­­كوماندالىق ەسەپتە جەكە-دارا كوش باستادى. امەريكالىقتار باس­تى قار­سىلاستارىنان كوپ قا­لىپ قويدى. اقش سپورتشىلارى 142 (42+49+51) مەدالدى مو­يىندارىنا ءىلدى. قوس الپاۋىتتان كەيىنگى ورىندارعا گدر (7+11+10), رۋمىنيا (6+6+6), بول­گاريا (4+7+20) جانە پولشا (2+3+6) سپورتشىلارى جايعاستى. بۇل ەلدەردىڭ بارلىعى دا سول كەزدەرى سوتسياليستىك باعىتتا ەدى. تەك سودان كەيىنگى ساتىلارعا كانادا (2+0+2), جاپونيا (1+0+3), اۋستراليا (1+0+2) جانە ۇلى­بريتانيا مەن پور­تۋگاليا (1+0+1) جايعاستى. سونداي-اق باس جۇلدە العانداردىڭ قاتا­رىندا ەفيوپيا مەن شۆەيتساريا (1+0+0) بار. بارلىعى بۇل جارىستا 32 كوماندا مۇشەلەرىنە جەڭىس تۇ­عى­رىنا كوتەرىلۋ باقىتى بۇيىردى.

جەكەلەگەن سپورتشىلار جايىندا ايتار بولساق, گيمناسشىلار سايىسىندا يۋري كورولەۆ بەس التىن الىپ, بارشا جانكۇيەردىڭ قوشەمەتىنە بولەندى. ۆالەنتين موگيلنىي مەن ەلەنا شۋشۋنوۆا ءتورت رەت تەڭدەسسىز دەپ تانىلسا, ۆەرا كولەسنيكوۆا ءۇش مارتە توپ جاردى. كوركەم گيمناستيكا­دان تاتيانا درۋچينينا دارا تا­لانتىمەن وق­شاۋلاندى. مىڭ بۇرالعان ارۋ ءتورت جاتتىعۋ بويىنشا جەڭىمپاز اتاندى. جۇزۋشىلەر جارىسىندا امەريكالىق اندجەلا ماەرس پەن لەسلي دەلاند ءۇش رەتتەن التىننان القا تاقتى. جەڭىل اتلەتتەردىڭ 100 مەترلىك باسەكەسىندە كانادانىڭ جەلاياعى بەن دجونسون شاشاسىنا شاڭ جۇقتىرمادى. ول اتاعى جەر جارعان كارل ءليۋيستىڭ ءوزىن ارتقا تاس­تادى. اقش-تىڭ داڭقتى سپرينتەرى قولا مەدالدى قاناعات تۇتسا, ەكىنشى ورىندى نيگەريانىڭ «قارا مارجانى» چيدي ۋمو يەلەندى. بيىكتىككە سەكىرۋدە كوپشىلىك بولگاريالىق ستەفكا كوستادينوۆا مەن ولگا تۋرچاكتىڭ ءوزارا تارتىسىن تاعات­سىزدانا كۇتتى. بۇل سايىس ال­عاش­قىسىنىڭ پايداسىنا شەشىلدى.

ىزگى نيەت ويىندارىندا بىر­نەشە رەت الەمدىك رەكورد جا­ڭار­دى. سولار­دىڭ اراسىنان سەر­گەي بۋبكانى ەرەكشە اتاپ وتسەك, ەش ايىبى جوق. دونەتسكىدەن كەل­گەن سپورتشى 6 مەتر 01 سان­تيمەترلىك كورسەتكىشپەن باس جۇل­دەنى قانجىعاسىنا بايلادى. لە­نينگرادتىق ۆلاديمير سالنيكوۆ ەكى رەت جەڭىس تۇعىرىنىڭ ەڭ بيىك ساتىسىنا كوتەرىلۋمەن شەكتەلىپ قالماي, ەركىن ءتاسىل بويىن­شا 800 مەترلىك قاشىقتىقتى 7:50, 64 سەكۋندتا ءجۇزىپ ءوتتى. امە­ريكالىق دجەسسي دجوينەر-كەرسي ونسايىستا 7148 ۇپاي جيسا, جەلكەندى سپورتتىڭ جامپوزدارى گەرمانيالىق ميحاەل حيۋبنەر مەن ەستونيانىڭ ماقتانىشى ەريكا سالۋمياە دا الەمدىك رەكوردقا وزگەرىس ەنگىزدى.

كەڭەس وداعى قۇراماسىنىڭ جالپى ەسەپتە ايقىن جەڭىسكە قول جەتكىزۋىنە قازاقستاننىڭ سپورت­شىلارى دا سۇبەلى ۇلەس قوس­تى. اتاپ ايتساق, بوكسشىلار باسە­كەسىندە يگور رۋجنيكوۆ (63,5 كيلو) بارلىق قارسىلاسىن بەت قا­راتپاي ۇتتى. جارتىلاي في­نالدا جەرلەسىمىز كەيىننەن كاسىپ­قوي بوكستىڭ شوقجۇلدىزىنا اي­نالعان روي دجونستى جەڭسە, اقتىق سىندا ۆەنەسۋەلالىق ان­حەل پەدروسانى ابدەن سابادى. كارىم­جان ءابدىراحمانوۆ (48 كيلو) پەن الەكساندر ميروشنيچەنكو (+91 كيلو) كۇمىس مەدالدى مويىندارىنا ءىلدى. شەشۋشى تۇستا كارىمجان ارمەنيالىق نشان مۋن­چياننان ۇتىلسا, الەكساندر قيىر شىعىستان كەلگەن ۆياچەسلاۆ ياكوۆلەۆكە جول بەردى. ال ەرىك حاكىموۆ قولاعا قول سوزدى. دزيۋ­دوشىلار دوداسىندا 65 كيلو سالماق دارەجەسىندە بەلدەسكەن ءالي حامحوەۆ الدىنا جان سالمادى. سپورتتىق گيمناستيكادان قولدى تىرەپ جاسايتىن جاتتىعۋدا ۆالەري ليۋكيننىڭ مىقتىلىعى ەش كۇمان تۋعىزبادى. سول سەكىلدى باسقا دا سپورت تۇرلەرى بويىنشا ورەلى ونەرلەرىمەن كوزگە تۇسكەن قازاقستاندىقتار از بولعان جوق.

ارادا ءتورت جىل وتكەن سوڭ ەكىنشى ىزگى نيەت ويىندارىن اقش-تىڭ سيەتل قالاسى قابىلدادى. بۇل جارىستا كسرو مەن اقش قۇرامالارى ءبىراز تىرەسكەنىمەن, بۇل جولى دا كوماندالىق سايىستا وداقتىڭ ورەندەرى وزدى. سودان كەيىن دە ايتۋلى دودانىڭ جالاۋى تاعى ءۇش مارتە جەلبىرەدى. بۇل باسەكەلەر كسرو ىدىراعان سوڭ (1994 جىلى سانكت-پەتەربۋرگ, 1998 جىلى نيۋ-يورك جانە 2001 جىلى بريسبەن قالالارىندا) ءوتتى.