inform.kz
سالتاناتتى شارادا قر مەملەكەتتىك حاتشىسى قىرىمبەك كوشەرباەۆ, قر مادەنيەت جانە سپورت ءمينيسترى اقتوتى رايىمقۇلوۆا, نۇر-سۇلتان قالاسىنىڭ اكىمى التاي كولگىنوۆ, تانىمال كۇيشى ايگۇل ۇلكەنباەۆا د. نۇرپەيىسوۆا ەسكەرتكىشىنە گۇل شوقتارىن قويدى. بيىل دارىندى ونەر يەسىنىڭ دۇنيەگە كەلگەنىنە 160 جىل تولادى.
«قارا سوزدەن قۇرىش قۇيعان قادىر مىرزا الىدەن قالعان ءسوز بار: «ناعىز قازاق قازاق ەمەس, ناعىز قازاق – دومبىرا» دەگەن. ارينە, اقىننىڭ تۇتاس حالىقتى ءبىر عانا اسپاپقا تەڭەپ, ۇلتتىڭ مىنەزى مەن بولمىسىن ءدال وسىلاي سيپاتتاۋىندا تەرەڭ ءمان جاتىر. ويتكەنى, جۇرتىمىزدىڭ مۇڭى مەن جىرى, قۋانىشى مەن جاقسىلىعى دومبىرانىڭ شاناعىنان توگىلىپ ءتۇسىپ, شارتاراپقا جايىلىپ جاتتى. حالقىمىزدىڭ جالاڭ اياق جار كەشىپ, قىزىل اياق قار كەشىپ, اقتابان شۇبىرىندى, القاكول سۇلاما كەزەڭدەرىن باستان وتكەرىپ, زاماننىڭ جاۋىنى مەن داۋىلىنان امان قالعان شاقتارىن, بەيبىت تە بەرەكەلى قوي ۇستىنە بوزتورعاي جۇمىرتقالاعان باراقاتتى ساتتەرىن قارا دومبىرانىڭ ءتىلى مەن ءۇنى تاريح بەتىنە تاسپالادى. قۇلاگەر اقىن ءىلياس جانسۇگىروۆتىڭ «دومبىرا سەندە ءمىن بار ما, ءمىنسىز بولساڭ ءتىل بار ما, ءتىل جوق دەۋگە بولا ما, تىلدەن ارتىق ءۇن باردا» دەپ جىرلاۋى دا سوندىقتان بولسا كەرەك.
قازاق پەن دومبىرا – ەگىز ۇعىم. حالقىمىز ءۇشىن قاستەرلى قاسيەتتى اسپاپتىڭ قادىرىن ارتتىرا ءتۇسۋ ءۇشىن قازاقستاننىڭ تۇڭعىش پرەزيدەنتى ەلباسى – نۇرسۇلتان نازارباەۆ ءوز جارلىعىمەن ارنايى دومبىرا كۇنىن بەلگىلەگەنىن جاقسى بىلەسىزدەر. بۇل – بۇگىنگى ۇرپاقتىڭ ۇلتتىق قۇندىلىققا كورسەتكەن ۇلكەن قۇرمەتى. بيىلعى دومبىرا كۇنى قارساڭىندا مەملەكەت باسشىسى قاسىم-جومارت توقاەۆتىڭ شەشىمىمەن داۋلەسكەر كۇيشى, ەل ىشىندە كۇي اناسى اتانىپ كەتكەن دينا نۇرپەيىسوۆاعا تاۋەلسىزدىكتىڭ 30 جىلدىعى اياسىندا ەلوردا تورىنەن ەڭسەلى ەسكەرتكىش اشىلىپ وتىر. سوندىقتان, بۇگىنگى شارانىڭ ۇلكەن سيمۆولدىق ءمانى بار», دەدى قىرىمبەك كوشەرباەۆ ەسكەرتكىشتىڭ سالتاناتتى اشىلۋىندا.
