اقتوبەلىك مەتاللۋرگتەر كۇن سايىن ۆاكتسينا قابىلداپ جاتىر. 4 مىڭنان اسا ادام جۇمىس ىستەيتىن اقتوبە فەرروقورىتپا زاۋىتىندا قىزمەتكەرلەردىڭ 40,6% نەمەسە 1676 ادام العاشقى كومپەنەنتتى السا, ەكىنشى كومپونەنتتى 27,4% نەمەسە 1132 ادام قابىلدادى. ال ءدوڭ كەن-بايىتۋ كومبيناتىندا العاشقى كومپونەنتتى 10,1% نەمەسە 720 ادام سالدىردى, ەكىنشىسىن – 5,8% نەمەسە 414 ادام الدى.
اقتوبە فەرروقورىتپا زاۋىتىنىڭ ءبىرىنشى بالقىتۋ تسەحىندا رەكوردتىق كورسەتكىشكە قول جەتكىزدى. مۇندا قىزمەتكەردىڭ 77% ۆاكتسينا العان. اقتوبە فەرروقورىتپا زاۋىتىنداعى جاقسى كورسەتكىش ءوز ناتيجەسىن بەرىپ جاتىر. مۇندا كوروناۆيرۋس جۇقتىرعاندار سانى تومەندەدى.
«COVID-19-عا قارسى ۆاكتسينا الۋ نەمەسە الماۋ – بۇل اركىمنىڭ جەكە شارۋاسى. بىراق زاۋىت قىزمەتكەرلەرىنىڭ بۇل ماسەلەگە جاۋاپكەرشىلىكپەن قاراپ, ەكپە الىپ جاتقاندارىنا ريزامىن. اركىم ءوزىنىڭ جانە جاقىندارىنىڭ دەنساۋلىعىنا جاۋاپتى. مۇنى ەستەن شىعارماعان ءجون», دەيدى «قازحروم» تۇك» اق پرەزيدەنتى ارمان ەسەنجولوۆ.
جۇمىسشىلار مەديتسينا ورتالىعىندا جانە زاۋىت اۋماعىنداعى مەديتسينا بولمەسىندە ۆاكتسينا الىپ ءجۇر.
سونداي-اق كومپانيا باسشىلىعى 22-ماۋسىمنان باستاپ ەكپە العان قىزمەتكەرلەردىڭ ەڭبەك دەمالىسىنا 1 كۇن قوسۋعا شەشىم قابىلدادى. مەديتسينا ورتالىعىنىڭ قىزمەتكەرلەرى تۇراقتى تۇردە تسەحتاردى ارالاپ, ۇجىمدارىمەن كەزدەسەدى, ەكپە الۋدىڭ قاجەتتىلىگى مەن سىرقاتتىڭ سالدارى تۋرالى ايتىپ تۇسىندىرۋدە.
