قوي ەكسپورتىنا تىيىم سالىنا ما؟

ۇلتتىق ستاتيستيكا بيۋروسى­نىڭ دەرەكتەرىنە سۇيەنسەك، جىل باسىندا ەلدەگى قويدىڭ باسى 20،05 ملن-دى قۇراعان. 2020 جىلدىڭ قورىتىندىسى بويىنشا ءوسىم 902 مىڭ باسقا (4،7 پايىزعا) تەڭ. بۇل سوڭعى 10 جىلداعى ەڭ جوعارى كورسەتكىش. وسى جىلدىڭ باسىنان بەرى ءتول ەسەبىنەن قويدىڭ باسى 7،1 ملن-عا ۇلعايدى. وسىلايشا، 1 ماۋسىمداعى دەرەككە سايكەس قازاقستانداعى قويدىڭ سانى 27،1 ملن-عا جەتتى.
جىل سايىن ەلىمىزدە 172،4 مىڭ توننا قوي ەتى وندىرىلەدى. ىشكى نارىقتى قامتاماسىز ەتۋ كور­سەتكىشى – 100،7 پايىز. وسى جىلدىڭ ءتورت ايىندا بىرىك­كەن اراب امىرلىكتەرىنە، وزبەك­ستان، باحرەين جانە رەسەي مەملەكەتتەرىنە 538 توننا قوي ەتى ەكسپورتتالدى.
«الايدا قوي شارۋاشىلىعى سالاسىنداعى باسقا قوعامدىق ۇيىمدار قوي ەكسپورتىنا تى­يىم سالۋ ماسەلەسى فەرمەرلەردىڭ قارجىلىق جاعدايىنا تەرىس اسەر ەتۋى مۇمكىن ەكەنىن جەتكىزىپ، تى­يىم سالۋدى ەنگىزبەۋ جونىندە ءوز ۇستانىمدارىن ءبىلدىردى»، دەپ حابارلادى اۋىل شارۋاشىلىعى مينيسترلىگى.
ۆەدومستۆو بيىل قۇرعاق اۋا رايى جاعدايىنا بايلانىستى وڭتۇستىك وڭىرلەردە ازىق باعا­سىنىڭ ءوسۋى بايقالىپ وتىر­عا­نىن العا تارتتى. ءشوپتىڭ ازدى­عىنا بايلانىستى فەرمەرلەر ۇلكەن اۋماقتان جەم جيناۋعا ءماج­بۇر. بۇل جانار-جاعارماي شىعىندارىن جانە جەم باعاسىن ارتتىرادى. وسىلايشا، جەم-ءشوپتى ۋاق­تىلى دايىنداۋ جانە ساتىپ الۋ ماقساتىندا فەرمەرلەر تولدەرىن جازعى، كۇز­گى كەزەڭدەردە وتكىزۋگە ءماجبۇر بولادى. بۇدان بولەك، پان­دەمياعا بايلانىستى ەكس­پورتتىق نارىق­تار تو­لىق قالپىنا كەلتىرىلمەدى. اۆيا­تاسىمالداۋ قۇنى 2 ەسە ءوستى. بارلىق وڭىردە ارتىق قوي ەتىن ەكسپورتقا شىعارۋعا مۇم­­كىندىك بەرەتىن زاماناۋي سەر­تي­­فيكات­تالعان ەت وڭدەۋ كا­سىپ­ورىن­­دارى جوق.
«فەرمەرلەر مۇنداي قيىن جاعدايدا ءتىرى قويدىڭ ەكسپورتىنا تىيىم سالۋ ولاردىڭ قار­جىلىق جاعدايىنا تەرىس اسەر ەتەدى دەپ سانايدى. ساتىپ الۋ باعاسىنىڭ تومەن بولۋىنا بايلانىستى فەرمەرلەردىڭ مال باسىن كۇتىپ-باعۋعا جۇمساعان شىعىندارى وتەلمەيدى جانە ولار مال باسىن ۇلعايتۋعا مۇد­دەلى بولمايدى. قازىرگى ۋا­قىتتا قازاقستاندا اۋىل شا­رۋا­شىلىعى جانە قارجى مينيسترلىكتەرىنىڭ بىرلەسكەن بۇيرىعىنا سايكەس انالىق ۇساق مال باسىن شىعارۋعا تىيىم سالىنعان»، دەپ حابارلادى ۆەدومستۆو.
بۇعان دەيىن اۋىل شا­رۋاشى­لىعى مينيسترلىگى قوي شارۋاشىلىعىن دامىتۋ ءۇشىن ارنايى مەملەكەتتىك كومەك كورسەتىلەتىنىن حابارلاعان بولا­تىن. اسىلداندىرۋ جۇمىس­تارى، اسىل تۇقىمدى مال باسىن ساتىپ الۋ، بورداقىلاۋ الاڭ­دارىنا نەمەسە ەتتى قايتا وڭدەۋ كاسىپورىندارىنا وتكىزىل­گەن قوشقارلاردىڭ قۇنى، سون­داي-اق شارۋاشىلىقتاردا جانە اۋىل شارۋاشىلىعى كووپەرا­تيۆتەرىندە انالىق مال باسىن قولدان ۇرىقتاندىرۋ جونىندەگى قىزمەتتەر سۋبسيديالانادى.
ءسويتىپ، تاراپتاردىڭ پىكىر­لەرىن ەسكەرە وتىرىپ، ۆەدومستۆو­ارالىق كوميسسيا ءتىرى قويدىڭ ەكسپورتىنا تولىق تىيىم سالۋ ءالى جەتىلىپ-پىسپەگەن ماسەلە دەگەن تۇجىرىمعا كەلدى. تالقىلاۋ قورىتىندىسى بويىنشا اۋىل شارۋاشىلىعى مينيسترلىگىنە وسى كۇزدە قوي ەتىن ءوندىرۋ جانە ساتۋ سەكتورىنىڭ تەڭدەستىرىلۋىن قامتاماسىز ەتۋ ماقساتىندا ءتىرى مالدى ەكسپورتتاۋدى كۆوتالاۋ تەتىگىن ەنگىزۋ تاپسىرىلدى.