كۇنى بۇگىنگە دەيىن وڭىردەگى ۆاكتسينا الۋعا ءتيىس حالىقتىڭ 118 587-ءى ءبىرىنشى كومپونەنتتى الىپ ۇلگەردى. بۇل ورايداعى كورسەتكىش 29 پايىز عانا. دەنساۋلىق ساقتاۋ سالاسىنىڭ قىزمەتكەرلەرى ءتۇسىندىرۋ جۇمىستارىن تياناقتى جۇرگىزىپ, اۋرۋحانا, ەمحانالاردا عانا ەمەس, حالىق كوپ جينالاتىن ءىرى ساۋدا ورىندارىندا دا پۋنكتەرىن ۇيىمداستىرىپ جاتقانىمەن, كورسەتكىش كوڭىل كونشىتپەيتىن سىڭايلى. وسى ورايدا ەل ىشىندەگى قيلى قاۋەسەتتىڭ, الەۋمەتتىك جەلىلەردەگى الىپقاشپا ءسوزدىڭ كەسىرىن تيگىزۋى ابدەن مۇمكىن.
كەيبىر ناۋقاس ادامدار جۇرتقا كەسىرىن تيگىزەتىنىن بىلگەنىمەن, ءۇي كارانتينىنىڭ شارتتارىن بۇزىپ, حالىق كوپ جينالاتىن جەرلەرگە بارۋىن توقتاتاتىن ەمەس. ءبىر دەرتكە قۋاتى ASHYQ جوباسى مۇنداي نەمقۇرايدىلىقتىڭ جولىن كەسىپ تۇر. جوبا وڭىردە ءساۋىردىڭ 21-ىنەن جۇزەگە اسىرىلا باستادى. بۇگىنگە دەيىن 640 ءوتىنىم ءتۇستى. ونىڭ ىشىندە 510 نىسان رەسمي تۇردە جوبا اياسىندا جۇمىس ىستەيتىن بولىپ, QR-كودىن الدى. جوبانىڭ تيىمدىلىگى انىق بايقالۋدا. ءسوزىمىز دالەلدى بولۋى ءۇشىن دەرەك كەلتىرە كەتەلىك. جوبا جۇزەگە اسىرىلا باستاعاننان بەرى جۇقپالى اۋرۋدى تاراتۋى مۇمكىن قوعامدىق ءتارتىپتى بۇزۋدىڭ 109 فاكتىسى انىقتالعان. الدىن الا ەسكەرتىلگەنىنە قاراماستان 34 «قىزىل», 75 «سارى» مارتەبەلى ادامدار قوعامدىق ورىندارعا كىرمەكشى بولىپ ارەكەتتەنگەن. مۇنداي وقيعالار وبلىس ورتالىعىندا عانا ەمەس, اۋدانداردا دا ءجيى كەزدەسەدى. ماسەلەن, بۋراباي اۋدانىندا 32, كوكشەتاۋ قالاسىندا 29 وقيعا ورىن العان. سونداي-اق ستەپنوگورسك قالاسى مەن اتباسار اۋدانىندا دا بىرنەشە فاكتى انىقتالعان. ءبىر ايتا كەتەرلىگى, ۇزاق ۋاقىت «قىزىل ايماقتىڭ» ساناتىندا بولىپ كەلگەن نۇر-سۇلتان قالاسىنان كەلەتىن جولاۋشىلار دا ىندەت تاسىمالداۋشىلاردىڭ قاتارىندا. جوعارىدا ايتىلعان اۋىرىپ جۇرسە دە قوعامدىق ورىندارعا بارعان ادامداردىڭ 20-سى نۇر-سۇلتان قالاسىنىڭ تۇرعىندارى بولىپ شىقتى. ولاردىڭ 13-ءى بۋراباي اۋدانىندا ورىن العان, قالعاندارى كوكشەتاۋ قالاسى مەن اتباسار اۋدانىنا تيەسىلى.
بۋراباي باۋرايىندا قاۋىپ-قاتەردىڭ كوبەيۋى جازعى دەمالىسقا بايلانىستى بولۋى دا ابدەن مۇمكىن. دەمەك كۋرورتتى وڭىردە قاۋىپ-قاتەردىڭ الدىن الۋعا بايلانىستى شارالاردىڭ مەيلىنشە كۇشەيتىلە تۇسكەنى ءلازىم. «قىزىل» مارتەبەلى سىرقات ادامداردىڭ ەكەۋى – الماتى قالاسىنان كەلگەن مەيماندار, سونداي-اق پەتروپاۆل مەن قاراعاندى قالاسىنىڭ «قىزىل» مارتەبەلى بىرنەشە ادامى وبلىس ورتالىعىنا كەلگەن. كەلىمدى-كەتىمدى جولاۋشىلار اعىنى تىيىلماعاننان كەيىن دەرتتىڭ الدىن الۋ قيىنداي تۇسپەك. جالعىز كەلۋشىلەر عانا ەمەس, از عانا ۋاقىت «جاسىل ايماقتىڭ» ساناتىندا بولعان اقمولا ءوڭىرىنىڭ «قىزىل» مارتەبەلى تۇرعىندارى دا ەلىمىزدىڭ وزگە وڭىرلەرىنە ساپار شەگۋدە. ايتالىق, نۇر-سۇلتان قالاسىنداعى حالىقارالىق اۋەجايداعى تەكسەرىس بارىسىندا «قىزىل» مارتەبەلى – 5, «سارى» مارتەبەلى 9 ادام انىقتالعان. تەكسەرە كەلگەندە ولاردىڭ ءبارى اقمولا وبلىسىنىڭ تۇرعىندارى بولىپ شىقتى.
– «جاسىل ايماقتا» بولعان كەزىمىزدە ASHYQ جوباسىنىڭ ارقاسىندا جولعا شىققان «قىزىل» مارتەبەلى 4 ادام انىقتالدى. بۇگىن ولاردىڭ ەكەۋى اكىمشىلىك جاۋاپكەرشىلىككە تارتىلىپ وتىر. كوكشەتاۋ قالاسىندا «قىزىل» مارتەبەلى ادامنىڭ تەلەفونىن پايدالانۋ وقيعاسى ورىن الدى. ءبىز ىلە تەكسەردىك, سويتسەك اۋرۋحانادا جاتقان ادامنىڭ تەلەفونىن ەكىنشى بىرەۋ پايدالانعان. سوندىقتان ءبىز اركىمنىڭ ءوز دەنساۋلىعىنا مۇقيات بولۋ كەرەك ەكەنىن ەسكەرتەمىز, – دەيدى وبلىستىڭ باس سانيتارلىق دارىگەرى ايناگۇل مۋسينا.
جالپىعا ورتاق ءتارتىپتى بۇزعان 10 كاسىپكەرلىك نىسانى جوبادان شىعارىلعان. 22-27 ماۋسىم ارالىعىندا ASHYQ جوباسى ارقىلى جۇمىس ىستەيتىن نىسانداردا 8 كارانتينگە بايلانىستى ءتارتىپ بۇزۋشى انىقتالعان. بۋراباي اۋدانىندا حالىققا قىزمەت كورسەتۋ ورتالىعىنا كەلۋشىلەردىڭ اراسىنان «قىزىل» جانە «سارى» مارتەبەلى بىرنەشە ادام بەلگىلى بولعان. مۇنداي وقيعا جارقايىڭ اۋدانىندا دا ورىن الىپ وتىر. قوعامدىق تاماقتاندىرۋ ورىندارىنا كەلگەن, نۇر-سۇلتان قالاسىنىڭ ەكى تۇرعىنىنىڭ بويىندا دەرت بار ەكەنى انىقتالدى. وبلىستىڭ باس سانيتارلىق دارىگەرى ا.مۋسينانىڭ ايتۋىنا قاراعاندا, شەكتەۋ شارالارى جەڭىلدەتىلمەگەنىمەن, «قىزىل ايماقتاعى» نۇر-سۇلتان قالاسىنىڭ توڭىرەگىندەگى اۋدانداردا ۆيرۋس جۇقتىرۋ دەرەگى ازايماي تۇر.
– ءبىز اي سايىن 10 تەست ناتيجەسىن سكرينينگ جاساۋعا جىبەرەمىز. ەگەر قازان ايىندا بريتان شتامى ءبىزدىڭ وڭىردە ءبىرىنشى انىقتالعانىن ەسكەرسەك, ءۇندى شتامىنىڭ انىقتالۋ ىقتيمالدىلىعى دا جوعارى ەكەنىن ايتا كەتكەن ءجون. ويتكەنى ءۇندى شتامىنىڭ بەلگىلەرى بىرنەشە ناۋقاستا بايقالدى, – دەيدى ا.مۋسينا.
دەرتتىڭ ورشۋىنە سەبەپ بولىپ وتىرعان – ادامداردىڭ وزدەرى. «جاسىل ايماققا» ءوتۋىمىز سول-اق ەكەن, مەيرامحانالاردا جاسىرىنىپ توي, جانازا وتكىزۋ, جالعا بەرىلەتىن ۇيلەردە قۇدا شاقىرۋ, بەسىك تويىن ۇيىمداستىرۋ تىم كوبەيىپ كەتتى. سالدارى بۇگىن بەلگىلى بولىپ جاتىر. ەگەر زيانى مول ادەتتەن ءبىرجولا تىيىلماساق, اۋرۋدىڭ الدىن الۋ مۇمكىن ەمەس.
اقمولا وبلىسى
