سەناتورلار – الەۋمەتتىك-مادەني دامۋ جانە عىلىم كوميتەتىنىڭ مۇشەلەرى كودەكس تۇجىرىمداماسىن تالقىلاۋ ءۇشىن ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلدەرىمەن كەزدەستى.
«قازىرگى ۋاقىتتا الەۋمەتتىك قامسىزداندىرۋ سالاسىنداعى قاتىناستار 16 زاڭمەن, 1 كودەكسپەن جانە بىرقاتار باسقا زاڭنامالىق اكتىلەرمەن رەتتەلەدى. نورماتيۆتىك قۇقىقتىق اكتىلەر ستيلىندەگى ايىرماشىلىقتار, الەۋمەتتىك قۇقىقتار نورمالارىنىڭ قايتالانۋى مەن بىتىراڭقىلىعى حالىقتىڭ الەۋمەتتىك زاڭنامانى ءتۇسىنۋىن قيىنداتادى», دەدى سەناتتىڭ الەۋمەتتىك-مادەني دامۋ جانە عىلىم كوميتەتىنىڭ حاتشىسى ناريمان تورەعاليەۆ.
ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ دەپۋتاتتارعا ۇسىنىلىپ وتىرعان زاڭ جوباسىنداعى نەگىزگى جاڭالىقتار تۋرالى ايتىپ بەردى. ماسەلەن, الەۋمەتتىك كودەكس تۇجىرىمداماسىنىڭ جوباسىنا سايكەس بىرىڭعاي الەۋمەتتىك ستاندارتتار مەن تاسىلدەردى ەنگىزۋ كوزدەلىپ وتىر. كودەكس جوباسىنا الەۋمەتتىك كومەك كورسەتۋدىڭ اتاۋلىلىعى, تاۋەكەلدەردىڭ الدىن الۋ جانە ەسكەرتۋ, الەۋمەتتىك ساياساتتىڭ ينكليۋزيۆتىلىگى قاعيداتتارىن ەنگىزۋ جوسپارلانۋدا.
بۇدان باسقا, انا مەن بالانى قولداۋعا, از قامتىلعان وتباسىلارعا كومەككە, الەۋمەتتىك قىزمەتتەر جۇيەسىن جەتىلدىرۋگە, ەرەكشە قاجەتتىلىكتەرى بار ادامداردى قورعاۋعا, الەۋمەتتىك قىزمەتكەر مارتەبەسىن ارتتىرۋعا جانە باسقا دا باعىتتارعا باسا نازار اۋدارىلاتىن بولادى.
سونداي-اق قر پارلامەنتى سەناتى جانىنداعى جاس ساراپشىلار كلۋبىنىڭ وكىلدەرى الەۋمەتتىك كودەكستى جاقسارتۋ جونىندەگى ۇسىنىستارىن ايتتى.
