COVID–19 ىندەتىنە قارسى ەكپە العان ستۋدەنتتەر جوعارى وقۋ ورىندارىنىڭ مۇمكىندىكتەرىنە بايلانىستى وقۋعا, جاتاقحانالاردا تۇرۋعا جەڭىلدىكتەر الىپ, ءتۇرلى سىيلىقتارعا يە بولادى.
وسىلايشا, جوعارى وقۋ ورىندارى حالىقتىڭ دەنساۋلىعىن قورعاۋ ءۇشىن ۆاكتسيناتسيالاۋ قارقىنىن كۇشەيتۋ جونىندەگى جۇمىستى قولدايدى. تەك ستۋدەنتتەر عانا ەمەس, سونىمەن قاتار جوعارى وقۋ ورىندارىنىڭ ەكپە سالدىرعان وقىتۋشىلارى دا ماتەريالدىق ماتەريالدىق ىنتالاندىرۋعا يە بولادى.
ءال-فارابي اتىنداعى قازۇۋ, ل.ن. گۋميلەۆ اتىنداعى ەۇۋ, اباي اتىنداعى قازۇپۋ, ق.ي. ساتباەۆ اتىنداعى قازۇتزۋ, م. اۋەزوۆ اتىنداعى وقۋ, م. وتەمىسوۆ اتىنداعى بقۋ, ح. دوسمۇحامەدوۆ اتىنداعى اتىراۋ ۋنيۆەرسيتەتى ۆاكتسيناتسيالاۋدى قولداۋ بويىنشا اكتسيالاردى باستاپ كەتتى. بىرقاتار جوعارى وقۋ ورنىنىڭ ستۋدەنتتەرى ءۇشىن وقۋعا, جاتاقحانالاردا تۇرۋعا جەڭىلدىكتەر, ساۋىقتىرۋ شيپاجايلارىنا تەگىن جولدامالار, تەگىن تاماقتانۋ جانە قوعامدىق كولىكتى پايدالانۋ تالوندارى قاراستىرىلعان.
سونداي-اق جوعارى وقۋ ورىندارى ۆاكتسيناتسيالانعان ستۋدەنتتەر ءۇشىن شەت تىلدەرى, كومپيۋتەرلىك ساۋاتتىلىق جانە كاسىپكەرلىك داعدىلاردى دامىتاتىن تەگىن كۋرستار ۇيىمداستىرۋدى جوسپارلاپ وتىر. سونىمەن قاتار ەكپە سالدىرعان كەيبىر ۋنيۆەرسيتەتتەردىڭ ستۋدەنتتەرى فيتنەس زالدارىنا, باسسەينگە, تەاترعا, كينوتەاترعا جانە كونتسەرتتەرگە تەگىن بارا الادى.
اتالعان جوعارى وقۋ ورىندارىنىڭ وقىتۋشىلارى دا نازاردان تىس قالمادى. ۆاكتسيناتسيالانعان وقىتۋشىلار قوسىمشا اقى نەمەسە اقىلى دەمالىس الادى.
«جوعارى وقۋ ورىندارىن كوروناۆيرۋستىڭ ەلدە تارالۋى الاڭداتىپ وتىر. ۆاكتسيناتسيا ماسەلەلەرى مەن ونىڭ شەشىلۋ جولدارىن جوعارى وقۋ ورىندارىنىڭ وزدەرى قابىلدايدى. ءمينيستردىڭ تاپسىرماسى بويىنشا جوعارى وقۋ ورىندارى ستۋدەنتتەر مەن وقىتۋشىلاردى ۆاكتسيناتسيالاۋعا شاقىرىپ, ىنتالاندىرۋ بويىنشا شارالار قابىلداپ جاتىر. بۇل اكتسيا ءبىزدىڭ ازاماتتاردىڭ ساناسىن وياتۋعا كومەكتەسەدى دەپ سەنەمىز. ءبىز بىرلەسە وتىرىپ, قاۋىپتى ۆيرۋستى جەڭە الامىز جانە كارانتين مۇمكىندىگىنشە تەز اياقتالادى دەپ ۇمىتتەنەمىز. باسقا جوعارى وقۋ ورىندارىن دا ۆاكتسيناتسيانى قولداۋ ءۇشىن ىنتالاندىرۋ شارالارىن ۇيىمداستىرۋعا شاقىرامىز. سەبەبى بۇل كوروناۆيرۋستىڭ تارالۋىن توقتاتۋدىڭ جالعىز جولى», دەپ اتاپ ءوتتى ءبىلىم جانە عىلىم ۆيتسە-ءمينيسترى قۋانىش ەرعاليەۆ.
