مەملەكەت باسشىلارى دوستىققا, تاتۋ كورشىلىككە جانە ستراتەگيالىق سەرىكتەستىككە نەگىزدەلگەن قازاق-تۇرىكمەن قاتىناستارىنىڭ مىزعىماس سيپاتىن ناقتىلاپ, ەكىجاقتى ىقپالداستىقتىڭ اۋقىمدى ماسەلەلەرىن تالقىلادى.
گۋربانگۋلى بەردىمۇحامەدوۆ جان-جاقتى ىنتىماقتاستىققا تىڭ سەرپىن بەرۋ ماقساتىمەن قاسىم-جومارت توقاەۆتى بيىل تۇرىكمەنستانعا رەسمي ساپارمەن كەلۋگە شاقىردى. اتالعان ساپار اياسىندا بىرقاتار ماڭىزدى كەلىسىمدەرگە قول قويىلماق.
مەملەكەت باسشىسى شاقىرۋدى قابىل الدى جانە بيىل كۇزدە اشحابادتا وتەتىن VI كاسپي سامميتىنە قاتىسۋعا دايىن ەكەنىن جەتكىزدى.
سونىمەن قاتار تاراپتار وڭىرلىك ىقپالداستىقتى جانداندىرۋعا, ورتالىق ازياداعى تۇراقتىلىق پەن قاۋىپسىزدىكتى قامتاماسىز ەتۋگە قاتىستى الداعى ۇجىمدىق شارالار جايىندا پىكىر الماستى.
قاسىم-جومارت توقاەۆ ورتالىق ازيا مەملەكەتتەرى باسشىلارىنىڭ كەزەكتى كونسۋلتاتيۆتىك كەزدەسۋىن تۇرىكمەنستاندا وتكىزۋ جونىندەگى گۋربانگۋلى بەردىمۇحامەدوۆتىڭ ۇسىنىسىن قولدادى.
قاسىم-جومارت توقاەۆ گۋربانگۋلى بەردىمۇحامەدوۆتى تۋعان كۇنىمەن قۇتتىقتاپ, ونىڭ باۋىرلاس تۇرىكمەنستاندى وركەندەتۋ جولىنداعى اسا جاۋاپتى مەملەكەتتىك قىزمەتىنە تابىس تىلەدى.
