قازاقستان • 29 ماۋسىم، 2021

وتكەن اپتادا ۆاكتسينالاۋ قارقىنى 1،6 ەسەگە ارتتى — دسم

قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق جاعداي قارالدى. حالىقتى ۆاكتسينالاۋ بارىسى مەن قازىرگى جاعداي تۋرالى دەنساۋلىق ساقتاۋ ءمينيسترى الەكسەي تسوي، نۇر-سۇلتان قالاسىنىڭ اكىمى التاي كولگىنوۆ، باتىس قازاقستان وبلىسىنىڭ اكىمى عالي ەسقاليەۆ، اتىراۋ وبلىسىنىڭ اكىمى ماحامبەت دوسمۇحامبەتوۆ، ماڭعىستاۋ وبلىسىنىڭ اكىمى سەرىكباي ترۇموۆ باياندادى، دەپ جازادى Egemen.kz.

جانبولات كەنجەعۇل

ا. تسوي اتاپ وتكەندەي، اتىراۋ، باتىس قازاقستان، قاراعاندى وبلىستارىندا اتالعان وڭىرلەردىڭ ەپيدەميولوگيالىق تاۋەكەلى جوعارى ايماققا نەمەسە قىزىل ايماققا كوشۋىنە بايلانىستى قوسىمشا شەكتەۋ شارالارى قابىلداندى.

«بۇگىنگى كۇنى ەگۋ پۋنكتتەرىندە ۆاكتسينا دوزالارىنىڭ جەتكىلىكتى سانى بار: شامامەن ءبىرىنشى كومپونەنتتىڭ 800 مىڭ دوزاسى جانە ەكىنشى كومپونەنتتىڭ 1،4 ملن دوزاسى بار. ۆاكتسينا جەتكىزىلىپ جاتىر. وتكەن اپتادا ۆاكتسينالاۋ قارقىنىنىڭ 1،6 ەسە، وتكەن اپتادا 254 مىڭنان 405 مىڭعا دەيىن وسكەنىن اتاپ وتكەن ءجون»، دەدى ۆەدومستۆو باسشىسى.

باتىس قازاقستان وبلىسىنىڭ اكىمى عالي ەسقاليەۆ سوڭعى اپتادا 585 جاڭا جاعداي انىقتالعانىن حابارلادى. وتكەن تاۋلىكتە 101 جاڭا جاعداي تىركەلدى.

ۆيرۋستى جۇقتىرعانداردى بارىنشا انىقتاۋ ماقساتىندا تەستىلەۋ سانى ۇلعايتىلدى. وبلىستاعى 13 زەرتحانادا تاۋلىگىنە 2 مىڭنان استام پتر زەرتتەۋ جۇرگىزىلەدى.

وبلىس ينفەكتسيامەن اۋىرعاندار ءوسىمى بار رەسەيدىڭ 5 وڭىرىمەن شەكارالاس. رەسەي شەكاراسى ارقىلى كۇن سايىن وبلىس بويىنشا 2500 استام ادام وتەدى.

«قازىرگى ەپيدەميولوگيالىق جاعدايعا بايلانىستى وبلىستىڭ باس سانيتارلىق دارىگەرىنىڭ 2021 جىلعى 27 ماۋسىمداعى قاۋلىسىنا سايكەس ادامدار كوپ جينالاتىن ءىس-شارالار، ءارتۇرلى جارمەڭكەلەر وتكىزۋگە تىيىم سالىندى. وسى جىلدىڭ 1 قاڭتارىنان باستاپ مونيتورينگتىك توپتار 3 مىڭعا جۋىق رەيد جۇرگىزدى. ونىڭ بارىسىندا 18 ملن-عا جۋىق تەڭگەگە 267 حاتتاما تولتىرىلدى»، دەدى ع. ەسقاليەۆ.

«Ashyq» ءموبيلدى قوسىمشاسى بويىنشا 550-دەن استام كاسىپكەرلىك سۋبەكتىسى جۇمىس ىستەيدى. ەرەجە تالاپتارىن ساقتاماعانى ءۇشىن 35 نىسان «Ashyq» قوسىمشاسىنان الىنىپ تاستالدى. 10 ماۋسىمىنان باستاپ قوسىمشا ارقىلى وقشاۋلانۋعا ءتيىس 90 كەلۋشى انىقتالدى.

18 جۇقپالى اۋرۋلار ستاتسيونارى جۇمىس ىستەيدى، ونداعى توسەك-ورىنداردىڭ تولىعۋى 44،6% قۇرايدى. رەانيماتسيالىق توسەك-ورىنداردىڭ تولىعۋى 54،2%. رەزەرۆتە 1400-دەن استام توسەك ورىن بار.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز