ايماقتار • 29 ماۋسىم، 2021

اقتاۋدا ۆاكتسينا الۋشىلار اراسىندا 2 بولمەلى پاتەر ۇتىسقا تىگىلدى

83 رەت كورسەتىلدى

ماڭعىستاۋ وبلىسىنىڭ اكىمى سەرىكباي ترۇموۆ وڭىردە ۆاكتسينا الۋشىلاردى ىنتالاندىرۋ شارالارى قالاي ۇيىمداستىرىلىپ جاتقانى تۋرالى مالىمەت بەردى، دەپ حابارلايدى Egemen.kz.

«كوروناۆيۋرسقا قارسى ۆاكتسينالاۋ جۇمىستارى جالعاسۋدا. بۇگىندە ءبىرىنشى كومپونەتپەن 57 800، ەكىنشى كومپونەنتپەن 33 350 ادام ەگىلدى. ونىڭ ىشىندە دەنساۋلىق ساقتاۋ سالاسى 99 پايىزعا، قۇقىق قورعاۋ ورگاندارىنىڭ قىزمەتكەرلەرى 100 پايىزعا ۆاكتسينالاندى»، دەدى سەرىكباي ترۇموۆ ۇكىمەت وتىرىسىندا.

اكىمنىڭ سوزىنە قاراعاندا، ۆاكتسينالاۋ جۇمىستارىن ودان ءارى كۇشەيتۋ ءۇشىن ارنايى شتاب قۇرىلىپ، باسقا دا ساناتتار بويىنشا ناقتى جۇمىستار جۇرگىزىلىپ جاتىر.

«جۇرگىزىلگەن جۇمىستاردىڭ ناتيجەسىندە وسى ايدىڭ ءبىرىنشى ونكۇندىگىندە ءبىرىنشى كومپونەنتپەن 3454 ادام ەگىلسە، ەكىنشى ونكۇندىكتە 5128-گە دەيىن ءوستى. سوڭعى اپتادا 8 مىڭعا جۋىق ادام ەكپە الدى. ءبىلىم بەرۋ جۇيەسىندە ۆاكتسينا العان قىزمەتكەرلەردىڭ ۇلەسى 38-دەن 45 پايىزعا دەيىن جەتكىزىلدى. جاڭا وقۋ جىلىنا دەيىن سالانىڭ بارلىق قىزمەتكەرلەرى ەكپە جۇمىسىن اياقتايدى. سونىمەن بىرگە قۇرىلىسى كومپانيالارىنىڭ قىزمەتكەرلەرىن ۆاكتسينالاۋ كەستەسى بەكىتىلدى. حالىقتى ۆاكتسينالاۋ ءۇشىن جىلجىمالى بريگادالاردىڭ جۇمىسى جانە اۋىلدى جەرلەردە ۇيلەردى ارالاۋ ارقىلى اقپاراتتىق ءتۇسىندىرۋ جۇمىستارى كۇشەيتىلدى»، دەدى وبلىس باسشىسى.

ءتۇسىندىرۋ جۇمىستارىنان بولەك، اپتا سايىن ءتۇرلى باعالى زاتتار ۇتىسقا تىگىلۋدە. اراسىندا ءتىپتى پاتەر دە بار.

«حالىقتى ۆاكتسينا الۋعا ىنتالاندىرۋ ءۇشىن وڭىردە 22 ماۋسىمنان باستاپ باستى جۇلدە - اقتاۋ قالاسىنداعى ەكى بولمەلى پاتەرگە ۇتىس ويىنى جاريالاندى. ۆاكتسينا الۋشىلار قارقىنىن ارتتىرۋ ءۇشىن اپتا سايىن تۇرمىستىق تەحنيكا، سمارتفوندار، توڭازىتقىشتار، تەلەديدار سياقتى باعالى سىيلىقتار ويناتىلىپ تۇرادى. جەڭىمپازدار ارنايى قۇرىلعان سايت ارقىلى تىكەلە ەفيردە انىقتالادى»، دەدى ماڭعىستاۋ وبلىسىنىڭ اكىمى.

سوڭعى جاڭالىقتار

جىل ءسوزى

الەم • كەشە

ۇقساس جاڭالىقتار