كەزدەسۋدە نۇرسۇلتان نازارباەۆ قازاقستان مەن رەسەي اراسىندا بارلىق باعىت بويىنشا ىنتىماقتاستىقتى ودان ءارى نىعايتۋدىڭ ماڭىزدىلىعىن اتاپ ءوتتى.
– رەسەي – ءبىزدىڭ تاتۋ كورشىمىز ءارى ستراتەگيالىق سەرىكتەسىمىز. ءسىزدىڭ ساپارىڭىز پارلامەنتارالىق بايلانىستى دامىتىپ قانا قويماي, مەملەكەتارالىق قارىم-قاتىناستى دا نىعايتا تۇسەرى انىق, – دەدى قازاقستاننىڭ تۇڭعىش پرەزيدەنتى.
ۆالەنتينا ماتۆيەنكو نۇرسۇلتان نازارباەۆتى الداعى ەلوردا كۇنىمەن جانە بيىل اتاپ ءوتىلىپ جاتقان قازاقستان تاۋەلسىزدىگىنىڭ 30 جىلدىعىمەن قۇتتىقتادى.
– ءسىزدى كەلە جاتقان قالا كۇنى مەيرامىمەن شىن جۇرەكتەن قۇتتىقتايمىن. جاس قازاقستاننىڭ جاڭا استاناسىنىڭ بوي كوتەرۋىنە ءوزىڭىز تىكەلەي اتسالىستىڭىز. بيىل قازاقستان تاۋەلسىزدىگىنىڭ وتىز جىلدىعى اتاپ وتىلۋدە. وتىز جىل قاس-قاعىم ساتتەي وتە شىقتى. بۇگىندە قازاقستان – پوستكەڭەستىك كەڭىستىكتەگى ەڭ تابىستى ەلدەردىڭ ءبىرى. سىزدەر دامىعان مەملەكەتتىك ينستيتۋتتارى مەن نارىقتىق ەكونوميكاسى بار ەگەمەن ەل قۇردىڭىزدار. وسى جولدى ءجۇرىپ وتكەن قازاقستان وزىندىك كەلبەتى, ىشكى جانە سىرتقى ساياساتى بار, الەمدىك قوعامداستىقتا قۇرمەتكە يە مەملەكەتكە اينالدى, – دەدى فەدەراتسيا كەڭەسىنىڭ توراعاسى.
ۆالەنتينا ماتۆيەنكو ەلباسىنىڭ قازاقستان-رەسەي قاتىناستارىنىڭ قالىپتاسۋى مەن دامۋىنداعى ءرولىن ەرەكشە اتاپ ءوتتى.
– ءسىز رەسەي مەن قازاقستان اراسىندا بايلانىس ورناتۋدى ءاردايىم قولداپ كەلەسىز. ويتكەنى بۇل قازاقستاننىڭ ستراتەگيالىق, گەوساياسي جانە ۇلتتىق مۇددەلەرىنە ساي. ءسىزدىڭ كۇش-جىگەرىڭىزدىڭ ارقاسىندا ءبىز مەملەكەتارالىق قاتىناس ورناتۋدىڭ تابىستى جولىنان ءوتىپ, ءتيىمدى, تەڭ قۇقىلى, ءوزارا سىيلاستىققا نەگىزدەلگەن ىنتىماقتاستىق مودەلىن قۇردىق, – دەدى فەدەراتسيا كەڭەسىنىڭ توراعاسى.
