مازمۇندى مادەني شارا قارشىعا اعامىزدىڭ ءومىرى مەن شىعارماشىلىعىنان سىر شەرتكەن بەينەفيلممەن باستالدى. وندا ۇلاعاتتى ۇستازدىڭ شاكىرتتەرىمەن اڭگىمەلەسىپ وتىرعان اسەرلى ءساتى مەن ساحناداعى قارا دومبىرانى كۇمبىرلەتكەن جارقىن بەينەسى كۇيشىنى جاقسى بىلەتىن كورەرمەندەردىڭ كوڭىلىن تولقىتىپ, كوزىنە جاس العىزدى.
كەش بارىسىندا ايتقالي جايىموۆ, عالىم احمەدياروۆ, دينا حامزينا, ازامات جىلتىركوزوۆ, رۋسلان بايمۋرزين, ايتجان توقتاعان, جۇمابەك قادىرقۇلوۆ, باتىرلان ابەنوۆ, ەدىل باسىعاراەۆ, دوسىم ماقسۇتوۆ, دارىن قۇدايبەرگەنوۆ جانە تاعى باسقا ونەرپازدار تالانتتى تۇلعانىڭ تۋىندىلارىن كوپشىلىككە تارتۋ ەتتى.
كونە عاسىردان جالعاسىپ كەلە جاتقان ۇلى كۇيشىلىك ونەردىڭ بىرەگەي وكىلىنە اينالعان قارشىعا اعامىز قۇرمانعازى اتامىزدان باستاپ, ءبىراز حالىق كۇيشىلەرىنىڭ شىعارمالارىن نوتاعا ءتۇسىرىپ, كەيىنگى جاس ۇرپاققا جەتكىزۋگە مول ۇلەس قوستى.
− قارشىعا احمەدياروۆ – ۇلتتىق مۋزىكامىزداعى اتى اڭىزعا اينالعان ادام. ول ونەردە كوپتەگەن سالانى باعىندىرسا دا, اسىرەسە ورىنداۋشىلىعىن ەرەكشە ايتۋعا بولادى. سونداي-اق اعامىزدىڭ قانشاما كۇيدى زەرتتەپ, زەردەلەۋى دە بولەك. ءبىر بويىنا ءتۇرلى كۇيشىلىك مەكتەپتىڭ ءداستۇرىن ۇشتاستىرىپ, سىڭىرە ءبىلىپ, كوپتەگەن ءدۇلدۇل دومبىراشىلاردى تاربيەلەپ شىعاردى. مەن ءوزىم كونسەرۆاتوريادا وقىعاندا سول كىسىدەن ءتالىم الدىم. سوندىقتان وسى كەشكە ديريجەر ءارى دومبىراشى رەتىندە قاتىسقانىمدى مارتەبە كورەمىن, قارشىعا اعامىز – ءبىز ءۇشىن شىعارماشىلىقتاعى باعىت-باعدار بەرۋشى تەمىرقازىعىمىز ەدى, − دەيدى رۋسلان بايمۋرزين.
