حالىقتى توتەنشە جاعدايلار تۋرالى حابارلاندىرۋ جانە اقپاراتتاندىرۋ – نەگىزگى قاۋىپسىزدىك شاراسى. بۇل تۇرعىنداردى قانداي دا ءبىر اۆاريا نەمەسە تابيعي قۇبىلىستاردىڭ ءارتۇرلى فاكتورلارىنان بولاتىن قيراۋ سالدارىنان قورعايدى.
حابارلاندىرۋ جۇيەسىن تەكسەرۋ بارىسىندا ەلەكتر دابىلدار مەن دابىلدى سويلەۋ قۇرىلعىلارىن (داۋىس زورايتقىشتار) قىسقا ۋاقىتقا قوسۋ, تەلەديدار ەفيرلەرىن جانە راديو ارنالارىن ۇستاپ قالۋ, اقپاراتتى ينتەرنەت-رەسۋرستار مەن ءموبيلدى قوسىمشالارعا ورنالاستىرۋ جوسپارلانىپ وتىر.
«بارشانىڭ نازارىنا» دىبىستى سيگنال – بۇل ەسكەرتۋ دابىلى. بۇل توتەنشە جاعدايلار قاۋپى بولعاندا نەمەسە تۋىنداعاندا بارلىق شۇعىل حابارلاما جاساۋ الدىندا حالىقتىڭ نازارىن اۋدارۋ ءۇشىن بەرىلەدى.
دىبىستىق سيگنالدى ەستىگەن سوڭ قالىپتاسقان جاعدايدا الداعى ءىس-ارەكەتتەرى بويىنشا نۇسقاۋ الۋ ءۇشىن تەلەديدار مەن راديوقابىلداعىشتى قوسىپ, ينتەرنەت-رەسۋرستار مەن ءموبيلدى قوسىمشاداعى اقپاراتتى وقۋ قاجەت.
سونىمەن قاتار قاۋىپتى وندىرىستىك وبەكتىلەر مەن گيدروتەحنيكالىق قۇرىلىستارداعى جەرگىلىكتى قۇلاقتاندىرۋ جۇيەلەرىنىڭ جۇمىسى تەكسەرىلەدى.
رەسپۋبليكالىق حابارلاندىرۋ جۇيەسىن تەكسەرۋ قورىتىندىسى بويىنشا ەلىمىزدىڭ حالقىن ۋاقتىلى اقپاراتتاندىرۋ مەن قۇلاقتاندىرۋدى قامتاماسىز ەتۋ بويىنشا ءتيىستى شارالار پىسىقتالاتىن بولادى, دەپ حابارلادى تجم ءباسپاسوز قىزمەتى.
