سپورت • 29 ماۋسىم، 2021

«استانا» تاعى دا جەڭىلدى

20 رەت كورسەتىلدى

فۋتبولدان ەۋروپا چەمپيوناتىمەن قاتارلاسىپ ءوتىپ جاتقان قازاقستان بىرىنشىلىگى دە قارت قۇرلىق باسەكەسى سياقتى تۋر وتكەن سايىن تارتىسقا تولى جانە ءتۇرلى سەنساتسياعا باي بولۋدا. ماسەلەن، 16 ماتچ بويى بىردە-ءبىر ويىندا جەڭىلمەي كەلە جاتقان ەلوردانىڭ «استانا» كلۋبى قاتارىنان ەكى ويىندا جەڭىلىپ، تۋرنير كەستەسىندەگى كوشباسشىلىعىنان ايىرىلىپ قالدى. مۇنداي ۇرىمتال ءساتتى ءمۇلت جىبەرمەگەن «توبىل» مەن «قايرات» ءوز كەزەگىندە قاجەتتى ۇپايلارىنا قول جەتكىزدى. ناتيجەسىندە، قوستانايدىڭ كلۋبى جارىس كەستەسىندە ءبىرىنشى ورىنعا شىعىپ السا، الماتىلىق ۇجىم «استانامەن» اراداعى ۇپاي ايىرماسىن قىسقارتتى.

18-تۋرعا جوسپارلانعان جەتى كەز­دەسۋدىڭ العاشقى ءۇش ماتچى جەكسەنبى كۇنى ءوتتى. پەتروپاۆلداعى ورتالىق ستا­ديوندا ۇيىم­داستىرىلعان ويىندا جەر­گىلىكتى «قىزىلجار» مەن ەل­وردا­نىڭ «استانا» كلۋبى كەزدەسىپ،
مات­چى الاڭ يەلەرىنىڭ پايداسىنا اياقتالدى – 3:2. وت­كەن تۋردا «استانا ارەنادا» وتكەن باسەكەدە استانالىقتار ءوز الاڭىندا «ور­دا­با­سىدان» جەڭىلىپ، جانكۇيەرلەرىنىڭ الدىندا ۇياتتى بولىپ ەدى. سول قاتەلىكتەرىن جۋىپ-شايۋى ءۇشىن بۇل ويىندا ەلىمىزدىڭ التى دۇركىن چەمپيوندارىنا قالايدا سىرت الاڭدا جەڭىسكە جەتۋ ماڭىزدى بولاتىن. الايدا بيىلعى بىرىنشىلىكتى جوعارى دارەجەدە وتكىزىپ جاتقان «قىزىلجار» فۋتبولشىلارى قارسىلاستارىنا ءۇش ۇپايدى وڭاي ۇستاتا قوي­مايتىنىن ويىن باسىندا-اق بىردەن اڭعارتتى. كەزدەسۋدىڭ 3-مينۋتىندا ۋكراينالىق جارتىلاي قورعاۋشى ماكسيم دراچەنكو ەسەپ اشىپ، جەرگىلىكتى جانكۇيەرلەردىڭ قۋانىشىنا بولەندى. ستاديونعا جينالعان كورەرمەندەر ءبىرىنشى گولعا قۋانىپ بولامىن دەگەنشە 9-مينۋتتا «قىزىلجاردىڭ» تاعى ءبىر ۋكراينالىق ويىنشىسى يۋري بۋشمان كەزدەسۋدىڭ ەسەبىن دە، جانكۇيەرلەردىڭ قۋانىشىن دا ەسەلەي ءتۇستى – 2:0. «ورداباسىمەن» وتكەن ويىنداعىداي ستسەناري قايتالانعاندىقتان با ەكەن، 10 مينۋتتا ەكى گول وتكىزىپ العان «استانا» ويىنشىلارى ابدىراپ قالدى. ءسويتىپ ءبىرىنشى تايمدا ەلوردالىق كلۋبتىڭ شابۋىلىنان ءسان، قورعانىسىنان ءمان كەتتى.
ءۇزىلىس كەزىندە باس باپكەر اندرەي تيحونوۆتان ءتيىستى اقىل-كەڭەس الىپ، الاڭعا شىققان «استانا» جىگىتتەرى تورەشىنىڭ ىسقىرىعىن ەستي سالا العا قاراي ۇمتىلدى. ماقساتتارى – ەكىنشى تايمنىڭ باسىندا قالاي دا تارازى باسىن تەڭەستىرىپ الۋ. ناتيجەسىندە ويىننىڭ 51-مينۋتىندا قوناقتار ءوز دەگەندەرىنە جەتىپ، ەسەپ ايىرماسىن قىسقارتتى. گول اۆتورى – يسلامبەك قۋات. بۇل جارتىلاي قورعاۋشىنىڭ «استانا» ساپىنا اراعا جەتى جىل سالىپ قايتا ورالعاننان كەيىنگى تۇڭعىش گولى بولدى. دەگەنمەن استانالىق جانكۇيەرلەردىڭ قۋانىشى ۇزاققا سوزىلمادى. ماتچتىڭ 68-مينۋتىندا چەرنوگوريالىق داركو زوريچ مەرگەندىگىمەن كوزگە ءتۇسىپ، ەسەپتى 3:1-گە جەتكىزدى. 86-مينۋتتا ابات ايىمبەتوۆ ەسەپ ايىر­ماسىن قىسقارتقانىمەن، «استاناعا» جەڭىس سىيلاي المادى.
وسىلايشا پەتروپاۆلدىڭ «قىزىل­جارى» ءوز تاريحىندا تۇڭعىش رەت ەل­ورد­الىق كلۋبتان باسىم ءتۇستى. بۇعان دەيىن ەكى ۇجىم جاسىل الاڭ­دا 9 رەت كەزدەسىپ، بارلىعىندا «استانا» فۋتبول­شىلارىنىڭ مەرەيى ۇستەم بولعان ەدى. وسى جەڭىسىنەن كەيىن «قىزىلجار» 25 ۇپاي جيناپ، تۋرنير كەستەسىندە بەسىنشى ورىنعا كوتەرىلدى. ال «استانا» 38 ۇپايمەن ازىرشە ەكىنشى ورىندا تۇر.
ال وتكەن تۋردا «استانانىڭ» جەڭىستى سەريا­سىنا نۇكتە قويعان «ورداباسى» بۇل تۋردا ءوز الاڭىندا تالدىقورعاننىڭ «جەتىسۋىن» قابىل­داپ، قارسىلاس كوماندانىڭ قاقپاسىنا جاۋاپسىز ءۇش گول سوقتى. بيىلعى چەمپيوناتتىڭ ۇزدىك سۇر­مەرگەنىنىڭ ءبىرى جواو پاۋلو مەن كوماندا كاپيتانى ەركەبۇلان تۇڭعىشباەۆ جاراقاتتارىنا بايلانىستى بۇل ويىندا «ورداباسىعا» كومەكتەسە المادى. سوعان قاراماستان الاڭ قوجايىندارى ءىرى ەسەپپەن جەڭىسكە جەتتى.
كەزدەسۋدىڭ 13-مينۋتىندا شابۋىلشى سەرگەي حيجنيچەنكو «ورداباسى» كلۋبىن العا شىعارسا، ءبىرىنشى تايمنىڭ سوڭىنا تامان كوماندالاسى ميرزاد مەحانوۆيچ ەسەپتى 2:0-گە جەتكىزدى. سونداي-اق بوسنيالىق فۋتبولشى ەكىنشى تايمدا ەكىنشى گولىن سوعىپ، ويىننىڭ نۇكتەسىن قويدى. «ورداباسى» ءۇشىن بۇل – قپل-داعى قاتارىنان ەكىنشى جەڭىس. وسى جەڭىستىڭ ارقاسىندا شىمكەنتتىكتەر تۋرنير كەستەسىندە 4-ورىنعا كوتەرىلدى. 10 ۇپايمەن سوڭعى ورىندا تۇرعان «جەتىسۋ» قاتارىنان ءتورتىنشى ماتچتا جەڭىلىپ قالدى. جالپى، بۇل تالدىقورعاندىقتار ءۇشىن چەمپيوناتتاعى 13-ءشى جەڭىلىس.
سونىمەن قاتار قاراعاندىلىق «شاحتەر» 18-تۋردا «اقتوبەنى» قابىلداپ، ءبىر دوپ ايىرماسىمەن جەڭىسكە جەتتى. بۇل – «شاحتەر» كلۋبىنىڭ بيىلعى چەمپيوناتتاعى قاتارىنان بەسىنشى جەڭىسى. قاراعاندىلىقتارعا ءۇش ۇپاي سىيلاعان ماتچتاعى جالعىز گولدى ويىننىڭ 67-مينۋتىندا جان-الي پيرۋز سوقتى.

سوڭعى جاڭالىقتار

ۇقساس جاڭالىقتار