27 ماۋسىمداعى دەرەك بويىنشا وبلىستا 73 ادامنان قاۋپى زور دەرت انىقتالدى. ونىڭ ىشىندە وبلىس ورتالىعىنان 54 ناۋقاس بار. ال «تەڭىز» كەنىشىندە 12 جۇمىسشى اتالعان ينفەكتسيانى جۇقتىرعان. سونداي-اق جىلىوي, يساتاي, ماحامبەت, قۇرمانعازى اۋداندارىندا جەتى ادامنان ىندەتتىڭ بەلگىسى تابىلدى.
وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ مالىمەتىنە قاراعاندا, اقپان ايىنان بەرى اتىراۋعا 111 200 دوزا ۆاكتسينا جەتكىزىلىپتى. ونىڭ ىشىندە 92 700 دوزا سپۋتنيك V, 2 000 دوزا Qazvac, 9 500 دوزا Hayat-Vax جانە 7 000 دوزا CoronaVac ۆاكتسيناسى بار. ەكپە سالۋ ءۇشىن 31 ستاتسيونارلىق, 10 جىلجىمالى بەكەت اشىلدى. تارقاتىپ ايتقاندا, تەڭىز كەڭ ورنىندا ەكى, «اتىراۋ», «بايزار» جانە «دينا» ساۋدا ورتالىقتارىندا ءۇش, قالا مەن اۋداندىق ەمحانالاردا 36 بەكەت جۇمىس ىستەپ تۇر.
– «تەڭىز» كەن ورنىندا ۆاكتسينا الۋشىلار كورسەتكىشى قالا مەن اۋداندارداعىدان 6 ەسەگە جوعارى بولىپ وتىر. قازىر ۆاكتسينانى كوپ العانداردىڭ كوشىن قۇقىق قورعاۋ ورگاندارىنىڭ قىزمەتكەرلەرى باستاپ تۇر. قازىر بۇل سالادا ۆاكتسينا العاندار 154 پايىزدى قۇرايدى. ەڭ تومەنگى كورسەتكىش سوزىلمالى اۋرۋلارى بار ناۋقاستار (2,7%), ستۋدەنتتەر (6,3%) مەن پەداگوگتەر (35,2%) اراسىندا بايقالادى, – دەيدى ا.بايدۋاليەۆ.
ال وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى-باس سانيتار دارىگەر مادەنيەت تاناۋوۆتىڭ دەرەگىنە سۇيەنسەك, كارانتيندىك شەكتەۋ شارالارىنىڭ ساقتالۋىنا 64 ءموبيلدى توپ مونيتورينگ جۇرگىزىلىپ كەلەدى. جىل باسىنان 21 ماۋسىمعا دەيىن 9 761 رەيدتىك تەكسەرىس وتكىزىلىپ, 40 469 نىسان قامتىلعان. ءموبيلدى توپتار 432 بۇزۋشىلىقتى انىقتادى. ناتيجەسىندە, شاعىن جانە ورتا بيزنەس نىساندارى مەن جەكە تۇلعالارعا 42 ملن 154 مىڭ 359 تەڭگەنى قۇراعان 312 ايىپپۇل سالىنىپتى.
وبلىستىق دەنساۋلىق ساقتاۋ باسقارماسىنىڭ مالىمەتى بويىنشا, اتىراۋ وبلىسىندا 397 ادام ءۇي جاعدايىندا ەم الۋ ءۇشىن وقشاۋلاندى. ال مودۋلدىك اۋرۋحانادا 131, №2 وبلىستىق اۋرۋحانادا 97, اۋداندارداعى ستاتسيونارلاردا 65 ادام حاتتاماعا سايكەس ەم قابىلداپ جاتىر. «تەڭىز» كەن ورنىندا ورنالاسقان ينفەكتسيالىق ستاتسيوناردا 47, فتيزيوپۋلمانولوگيالىق ورتالىقتا 5 پاتسيەنت ەمدەلىپ جاتىر.
مۇنايلى ءوڭىر «قىزىل ايماققا» قايتا ەنگەن سوڭ قانداي شارا قولعا الىنىپ وتىر؟ وسى ورايدا الدىمەن باس سانيتار دارىگەر مادەنيەت تاناۋوۆتىڭ كارانتيندىك شەكتەۋ شارالارىن كۇشەيتەتىن قاۋلىعا قول قويعانىن ايتۋعا بولادى. جاڭا قاۋلى 28 ماۋسىمدا كۇشىنە ەندى.
قاۋلىدا Ashyq جوباسىنا قاتىساتىن الەۋمەتتىك-ەكونوميكالىق وبەكتىلەردىڭ قىزمەتىن قوسپاعاندا ويىن-ساۋىق وبەكتىلەرىنىڭ, بانكەت زالدارىنىڭ, جابىق ءۇي-جايداعى, سونىڭ ىشىندە قوعامدىق تاماقتانۋ وبەكتىلەرىندەگى بالالار ويىن-ساۋىق ورتالىقتارى مەن اتتراكتسيونداردىڭ, ويىن الاڭدارىنىڭ (اۋلاداعىلاردى قوسپاعاندا), تۇنگى كلۋبتاردىڭ, كاراوكە, كومپيۋتەرلىك جانە ويىن كلۋبتارىنىڭ, كاليان, بيليارد, بوۋلينگتەردىڭ, بۋكمەكەرلىك كەڭسەلەردىڭ, مادەني نىسانداردىڭ, جەكە, توپتىق دايىندىقتاردى قوسا العاندا كينوتەاترلاردىڭ, تەاترلاردىڭ, كونتسەرت زالدارىنىڭ, فيلارمونيالاردىڭ, كورەرمەندەرى بار سپورتتىق ءىس-شارالاردى وتكىزۋگە تىيىم سالىنسىن» دەلىنگەن.
سونداي-اق سەنبى مەن جەكسەنبىدە ازىق-ت ۇلىك جانە ازىق-ت ۇلىك ەمەس جابىق بازارلاردىڭ, ساۋدا ۇيلەرى مەن ورتالىقتارىنا (پاۆيلوندار, بۋتيكتەر), ساۋدا جەلىلەرىنىڭ, سپورت كەشەندەرى, فيتنەس ورتالىقتار, سپورتتىق-ساۋىقتىرۋ وبەكتىلەرى, سپورت جانە جاتتىعۋ زالدارىنىڭ جۇمىس ىستەۋىنە تىيىم سالىندى. مۇنداي تىيىم ساۋنالار, سپا ورتالىقتارى, باسسەيندەردىڭ جۇمىسىنا قاتىستى بولىپ وتىر. بۇل نىسانداردىڭ كەيبىرىنىڭ كۇندەلىكتى جۇمىس كەستەسى تاڭعى ساعات 7.00-دە باستالىپ, كەشكى ساعات 19.00-گە دەيىن جالعاسادى. قوعامدىق تاماقتانۋ ورىندارى كەشكى ساعات 20.00-گە دەيىن ىستەيدى. ال سپورتتىق نىساندار مەن ساۋنالار, سپا ورتالىقتارىنا تۇنگى ساعات 22.00-گە دەيىن جۇمىس ىستەۋىنە رۇقسات بەرىلگەن.
اتىراۋ وبلىسى
