سقو سانيتاريالىق-ەپيدەميولوگيالىق باقىلاۋ دەپارتامەنتى ءباسپاسوز قىزمەتىنىڭ مالىمەتىنشە, تۋليارەميا – تابيعي وشاقتارى بار, اسا قاۋىپتى زوونوزدىق ينفەكتسيا, ياعني ونى اۋرۋ جانۋارلار تاسىمالدايدى.
«بۇل ىندەت اسىرەسە جاز بەن كۇزدە قوزادى. ماۋسىمدىق ينفەكتسيانى تىشقاندار, سۋ ەگەۋقۇيرىقتارى, سۋىرلار, كەنەلەر جانە قان سوراتىن جاندىكتەر تاراتادى. ينكۋباتسيالىق كەزەڭنىڭ ۇزاقتىعى شامامەن 1-20 تاۋلىكتى قۇرايدى, بىراق كوبىنەسە – 3-7 تاۋلىك. ادەتتە اۋرۋ تەز باستالادى, دەنە قالتىراپ, دەنە قىزۋى كوتەرىلەدى, دەنەنىڭ اۋىرسىنۋى, باس اۋرۋى, السىزدىك پايدا بولادى», دەيدى سقو سەبد اسا قاۋىپتى ينفەكتسيالاردى جانە تۋبەركۋلەزدى ەپيدەميولوگيالىق قاداعالاۋ ءبولىمىنىڭ باسشىسى يۋليا گايسينا.
مامانداردىڭ ايتۋىنشا, سقو اۋماعى القاپتى-باتپاقتى جەردە تۋليارەميانىڭ تابيعي وشاعىندا ورنالاسقان. بىرنەشە جىل بۇرىن بۇل اۋرۋ وڭىردە كەڭىنەن تارالعان ەكەن. قاۋىپتى ينفەكتسيانى جۇقتىرعاندار سوڭعى رەت 5 جىل بۇرىن انىقتالىپتى.
ايماقتا اتالمىش ينفەكتسيانىڭ الدىن الۋ ءۇشىن بىرقاتار ءىس-شارالار اتقارىلاتىن بولادى.
