«شۋ-مەركى اۆتوجولىندا «اۋدي» ماركالى كولىگى توقتاتىلىپ, ونداعى 35 پەن 46 جاستاعى ازاماتتاردى جانە كولىكتى تەكسەرۋ كەزىندە جۇك سالعىشتان ءتورت قاپ تابىلىپ, ونىڭ ىشىنەن جالپى سالماعى 96 كەلى 900 گرامم «كەپتىرىلگەن ماريحۋانا» ەسىرتكى زاتى انىقتالدى», دەپ ءمالىم ەتتى جامبىل وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى اسقار جۇمابەكوۆ.
قر قىلمىستىق كودەكسىنىڭ 297-بابىنىڭ 3-بولىگى (ەسىرتكى زاتتارىن وتكىزۋ ماقساتىندا اسا ءىرى مولشەردە زاڭسىز ساقتاۋ) بويىنشا سوتقا دەيىنگى تەرگەۋ امالدارى باستالدى. اتالعان قىلمىس ءۇشىن مۇلكى تاركىلەنىپ, ون جىلدان ون بەس جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەن.
ۇستالعاندار كىناسىن مويىنداپ, شۋ قالاسىنىڭ ۋاقىتشا ۇستاۋ يزولياتورىنا قاماۋعا الىندى.
