ايماقتار • 25 ماۋسىم، 2021

ەلوردادا 100 مىڭداي كاسىپكەر سالىقتان بوساتىلدى

7 رەت كورسەتىلدى

نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا پاندەميا كەزىندە كاسىپكەرلەرگە جاسالعان جاعدايدى ايتا كەلە 97 مىڭنان استام كاسىپكەر جالپى سوماسى 31 ملرد تەڭگە بولاتىن سالىقتان بوساتىلعانىن ءمالىم ەتتى، دەپ حابارلايدى ەلوردا اكىمدىگىنىڭ رەسمي سايتى.

«بىزگە جۇكتەلگەن مىندەتتەردىڭ ءبىرى – كاسىپكەرلەرىمىزدى قولداۋ. قازىر وسى باعىتتا ءتيىستى جۇمىستار جۇرگىزىلىپ جاتىر. پاندەميا كاسىپكەرلەردىڭ جۇمىسىنا ايتارلىقتاي اسەر ەتكەنى بەلگىلى. مەملەكەت ءوز كەزەگىندە بۇل باعىتقا ۋاقىتىلى كومەك كورسەتتى: سالىقتار مەن نەسيەلەر تولەۋ كەيىنگە قالدىرىلدى; ەڭ كوپ زارداپ شەككەن نىساندار بيۋدجەتكە تولەنەتىن ءتيىستى تولەمدەردەن بوساتىلدى. وسىلايشا، 97 مىڭنان استام كاسىپكەر جالپى سوماسى 31 ملرد تەڭگە بولاتىن سالىقتان بوساتىلدى. تج رەجيمى كەزىندە ماڭىزدى سالالار ءۇشىن «جاسىل» ءدالىز ۇيىمداستىرىلدى. بۇل ولارعا قالانىڭ بلوك-بەكەتتەرىنەن كەدەرگىسىز وتۋىنە مۇمكىندىك بەردى. ال «Ashyq» باعدارلاماسى بويىنشا كوبىسى ءوز قىزمەتىن قايتا باستادى.

بۇدان باسقا، شىعىنداردى وڭتايلاندىرۋ كەزىندە 25،7 ملرد تەڭگەدەن اسا قارجى ەكونوميكانىڭ ناقتى سەكتورىن قولداۋعا جانە ينفراقۇرىلىمدى دامىتۋعا باعىتتالدى. بيزنەستىڭ جول كارتاسى بويىنشا كاسىپكەرلىك سالاسىندا جاعدايلار جەڭىلدەتىلدى. جىل باسىنان بەرى 20،7 ملرد تەڭگەگە مىڭنان استام جوبا قولداۋ تاپتى.

وڭىرلىك كاسىپكەرلەر كەڭەسىمەن كەزدەسۋدە بىرقاتار ماسەلە تالقىلاندى: جۇمىسشى كادرلاردىڭ تاپشىلىعى، ينجەنەرلىك جەلىلەردى جۇرگىزۋ پروتسەسى، ميب قۇرۋ جانە دامىتۋ. ال وتاندىق تاۋار وندىرۋشىلەردى قولداۋ، تۋريستىك سالا، «Ashyq» جوباسىن ودان ءارى دامىتۋ سەكىلدى ماسەلەلەر بولەك تالقىلاندى. بۇل قىسقا مەرزىمدە بىرقاتار ماڭىزدى پروبلەمانى شەشۋگە، ال ۇزاق مەرزىمدى جۇيەلى ماسەلەلەردى قولعا الۋعا مۇمكىندىك بەرەدى.

2019 جىلدىڭ كۇزىنەن باستاپ قالالىق دامۋ اكسەلەراتورى ىسكە قوسىلدى. بۇل بەلسەندى تۇرعىندار، قوعامدىق ۇيىمدار، ساراپشىلار قاتىساتىن توپ بولىپ ەسەپتەلەدى. وندا ماسەلەن ەكولوگيا، قوعامدىق كولىكتى دامىتۋ، پيك-تەن ميب-كە ءوتۋ مەحانيزمى سەكىلدى ءتۇرلى ماسەلەلەر قارالدى.

كەلىپ تۇسكەن ساۋالدار بىردەن قولعا الىندى»، دەپ جازدى ەلوردا اكىمى.

سوڭعى جاڭالىقتار

بالالار Ashyq جۇيەسىنە ەنگىزىلە مە؟

قازاقستان • بۇگىن، 19:20

شىمكەنتتە كارانتين كۇشەيتىلەدى

ايماقتار • بۇگىن، 15:47

اتوم كولگە ساپار

ايماقتار • بۇگىن، 15:37

قازاقستاندا جاڭا تەلەارنا اشىلدى

قازاقستان • بۇگىن، 11:55

ۇقساس جاڭالىقتار