قاشىقتان جۇمىس ىستەيتىن قىزمەتكەردىڭ جالاقىسى تومەندەتىلمەيدى

قوعام • 24 ماۋسىم، 2021

قاشىقتان جۇمىس ىستەيتىن قىزمەتكەردىڭ جالاقىسى ازايا ما؟

37 رەت كورسەتىلدى

پارلامەنت سەناتىنىڭ جالپى وتىرىسىندا «قازاقستان رەسپۋبليكاسىنىڭ ەڭبەك كودەكسىنە قاشىقتان جۇمىس ىستەۋدىڭ قۇقىقتىق رەتتەلۋىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكى وقىلىمدا قارالىپ، قابىلداندى، دەپ حابارلايدى Egemen.kz.

گاۋھار قاپاش

بۇل قۇجات پارلامەنت دەپۋتاتتارىنىڭ باستاماشىلىعىمەن ازىرلەندى.

«بۇگىنگى تاڭدا الەمدىك پراكتيكادا قاشىقتان جۇمىس ىستەۋ بەلسەندى دامۋ ۇستىندە، سونداي-اق جۇمىسكەردىڭ ارالاس جۇمىس ىستەۋ رەجيمىندە جۇمىس ىستەۋدى ۇيلەستىرۋىنىڭ قۇقىقتىق مۇمكىندىگى كەڭىنەن تارالعان. كوروناۆيرۋستىڭ تارالۋىنا دەيىن جۇرگىزىلگەن حالىقارالىق زەرتتەۋلەرگە سۇيەنسەك، 2020 جىلدىڭ باسىندا الەمدىك كومپانيالاردىڭ 16%-ى تولىعىمەن قاشىقتان جۇمىس ىستەدى، ال 40%-ى ارالاس جۇمىس رەجيمىن قولداندى. وزدەرىڭىزگە بەلگىلى، 2020 جىلى قازاقستان اۋماعىندا COVID-19 كوروناۆيرۋس ينفەكتسياسىنىڭ تارالۋى، قىزمەتكەرلەردىڭ ورتا ەسەپپەن 70%-ىن قاشىقتان جۇمىس ىستەۋگە اۋىستىرىپ، جۇمىس رەجيمىنىڭ وزگەرۋىنە الىپ كەلدى»، دەدى سەنات دەپۋتاتى ناريمان تورەعاليەۆ زاڭ جوباسىن ءبىرىنشى وقىلىمدا قاراۋ كەزىندە.

ونىڭ ايتۋىنشا، ەلىمىزدە قاشىقتان جۇمىس ىستەۋدى ۇيىمداستىرۋدىڭ قالىپتاسقان تاجىريبەسى، پاندەميا كەزەڭىندەگى ەڭبەك سالاسىنداعى ناقتى پروتسەستەر مەن ەڭبەك زاڭناماسى اراسىنداعى الشاقتىقتى كورسەتتى.

اتالعان ماسەلەلەر قولدانىستاعى ەڭبەك كودەكسىنىڭ 138-بابىمەن عانا رەتتەلدى، ول ءوز كەزەگىندە بۇگىنگى قاشىقتان جۇمىس ىستەۋ پروبلەمالارىن تولىققاندى شەشۋگە مۇمكىندىك بەرمەدى. انىقتالعان ولقىلىقتاردى ەسكەرە وتىرىپ دەپۋتاتتار بىرقاتار ۇسىنىس جاسادى.

«اتاپ ايتقاندا قاشىقتان جۇمىس ىستەۋگە اۋىسقان قىزمەتكەرلەردىڭ تاپ بولعان وتكىر ماسەلەلەرىنىڭ ءبىرى – كوممۋنيكاتسيا قۇرالدارىمەن، كومپيۋتەرلەرمەن جانە باسقا دا قۇرالدارمەن قامتاماسىز ەتۋ بولاتىن. وسىعان بايلانىستى زاڭ جوباسىندا كوزدەلگەن نورماعا سايكەس، توتەنشە جاعدايدى ەنگىزۋ، جاريالاۋ جانە شەكتەۋ ءىسشارالارىن، ونىڭ ىشىندە كارانتيندى ەنگىزۋ كەزەڭىندە ۋاقىتشا قاشىقتان جۇمىس ىستەۋ كەزىندە جۇمىسكەرلەردى كوممۋنيكاتسيا قۇرالدارىمەن قامتاماسىز ەتۋ جانە شىعىستاردى وتەۋ قاجەتتىلىگى جۇمىس بەرۋشىنىڭ اكتىسىندە ايقىندالادى. ەگەر جۇمىسكەر ءوزىنىڭ كوممۋنيكاتسيا قۇرالدارىن تۇراقتى نەگىزدە پايدالاناتىن بولسا، جۇمىس بەرۋشى وتەماقى تولەي الادى، ونىڭ مولشەرى، تولەۋ ءتارتىبى مەن مەرزىمدەرى تاراپتاردىڭ كەلىسۋى بويىنشا بەلگىلەنەدى»، دەپ ءتۇسىندىردى سەناتور.

كەلەسى تاعى ءبىر نورما، تاراپتاردىڭ كەلىسۋى بويىنشا قاشىقتان جانە قاشىقتان ارالاس جۇمىس ىستەۋ ۇعىمدارىن ەنگىزۋ تۋرالى. ارالاس جۇمىس ىستەۋ جۇمىس كەزەڭدەرىن جۇمىس بەرۋشى ورنالاسقان جەردە دە، ودان تىس جەردە دە كەزەكتەستىرۋگە مۇمكىندىك بەرەدى.

«جۇمىسكەرلەردىڭ ەڭبەك قۇقىقتارىن قورعاۋ ماقساتىندا ەڭبەك شارتىندا جۇمىس ۋاقىتىنىڭ تىركەلگەن ەسەبىن بەلگىلەۋ جونىندەگى نورما كوزدەلدى، وسى ۋاقىت ىشىندە جۇمىسكەر جۇمىس ۋاقىتىنىڭ كۇندەلىكتى ۇزاقتىعىنىڭ شەكتەۋلەرىن ساقتاي وتىرىپ، جۇمىس ۋاقىتى شەگىندە جۇمىس بەرۋشىمەن بايلانىستا بولۋ ءۇشىن قولجەتىمدىلىك رەجيمىندە بولۋعا ءتيىس. بۇل رەتتە، ەڭبەك شارتى تاراپتارىنىڭ كەلىسۋى بويىنشا قاشىقتان جۇمىس ىستەيتىن جۇمىسكەرلەر ءۇشىن جۇمىس ۋاقىتىنىڭ جيىنتىق ەسەبىن قولدانا وتىرىپ، يكەمدى جۇمىس ۋاقىتى رەجيمى بەلگىلەنۋى مۇمكىن.

سونىمەن بىرگە، ورىندالاتىن جۇمىس كولەمى ساقتالعان جاعدايدا جۇمىس بەرۋشىگە، قاشىقتان جۇمىس ىستەيتىن قىزمەتكەردىڭ جالاقىسىن تومەندەتۋگە مۇمكىندىك بەرمەيتىن نورما ەنگىزىلدى. جۇمىس بەرۋشىنىڭ، جۇمىسكەرلەر قاشىقتىقتان جۇمىس ىستەۋ كەزىندە پايدالاناتىن قۇپيا اقپاراتتى قورعاۋ تۋرالى شارت جاساسۋ قۇقىعى بەكىتىلدى»، دەدى ناريمان تورەعاليەۆ.

ونىڭ پايىمىنشا، زاڭ جوباسىنىڭ قابىلدانۋىمەن قاشىقتان جۇمىس ىستەۋدى ناقتى رەگلامەنتتەۋ جانە ەڭبەك شارتى تاراپتارىنىڭ قۇقىقتارى مەن مىندەتتەرىن بەكىتۋ ارقىلى جۇمىسكەرلەردىڭ ەڭبەك قۇقىقتارىن قورعاۋ قامتاماسىز ەتىلەتىن بولادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز