الماتىنىڭ باس سانيتارلىق دارىگەرى جانداربەك بەكشين قالادا اينالىمداعى 90%-عا جۋىق مۋتاتسيالانعان شتاممداردىڭ تارالۋىنا بايلانىستى قالاداعى ەپيدەميولوگيالىق جاعداي كۇردەلى ەكەنىن ايتتى.
«12-19 ماۋسىم ارالىعىندا مۋتاتسيالانعان شتاممداردىڭ اينالىمىن انىقتاۋ ماقساتىندا پتر-دياگنوستيكاسىن جۇرگىزدىك. 53 زەرتتەۋدىڭ ىشىنەن «بريتاندىق شتامم» 44-تە (83%), «وڭتۇستىكافريكالىق» ەكى جاعدايدا (4%) جانە بىرەۋىندە «نيۋ-يوركتىك» (1,8%) انىقتالدى. قالعان 11%-دا COVID-19 ۆيرۋسىنىڭ مۋتاتسياسى انىقتالمادى», دەدى ج. بەكشين.
سانيتارلىق-ەپيدەميولوگيالىق مەكەمە باسشىسىنىڭ ايتۋىنشا, 16 ماۋسىمنان باستاپ جۇقتىرۋ كورسەتكىشى 0,7-دەن 0,96-عا دەيىن وسكەن.
«بۇل دەمالىس ورىندارىنا بارۋمەن تۇرعىنداردىڭ بەتپەردە رەجيمىن ساقتاۋ بويىنشا ەپيدەمياعا قارسى شارالاردى ەلەمەۋى سالدارىنان بولدى», دەدى ج. بەكشين.
سونداي-اق COVID-19 اۋرۋىنىڭ ءوسۋىنىڭ نەگىزگى سەبەبى ينفەكتسيانىڭ تەز تارالۋىنا ىقپال ەتەتىن مۋتاتسيالانعان شتامداردىڭ پايدا بولۋىمەن دە بايلانىستى.
سوندىقتان 22 ماۋسىمدا ەپيدەميالىق جاعدايدى باعالاۋ ماتريتساسىندا الماتى تاعى دا «سارى» ايماققا ءوتتى. جۇقتىرۋ كورسەتكىشى جوعارى.
جانداربەك بەكشين ەپيدەميولوگيالىق جاعداي ۋشىققان جاعدايدا شەكتەۋ شارالارىن باقىلاۋ 5 كۇن ىشىندە جۇرگىزىلەتىنىن ءتۇسىندىردى («جاسىل» ايماقتان «سارىعا» نەمەسە «سارى» ايماقتان «قىزىلعا» كوشۋ). سوندىقتان الماتىدا «جاسىل» ايماق رەجيمى تاعى 5 كۇن, ياعني 27 ماۋسىمعا دەيىن ساقتالادى.
الماتى
