ايماقتار • 23 ماۋسىم، 2021

الماتى اۋەجايى مەن تەمىرجول ۆوكزالدارىندا باقىلاۋ قايتا كۇشەيتىلدى

119 رەت كورسەتىلدى

الماتى قالاسىنىڭ اكىمدىگى حالىقارالىق اۋەجايدا جانە قالانىڭ تەمىرجول ۆوكزالدارىندا باقىلاۋدى كۇشەيتۋ بويىنشا شارالار قابىلداۋعا ءماجبۇر بولىپ وتىر، دەپ حابارلايدى Egemen.kz.

الماتى قالاسى اكىمىنىڭ ورىنباسارى ەرجان باباقۇماروۆ مەگاپوليستىڭ اۋماقتىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى، باس سانيتارلىق دارىگەر ج. بەكشينمەن جانە قالالىق قوعامدىق دەنساۋلىق باسقارماسىنىڭ باسشىسى ن. تابىنباەۆپەن بىرگە الماتى حالىقارالىق اۋەجايى مەن قالا ۆوكزالدارىنىڭ اۋماعىنداعى سانيتارلىق ەپيدەميولوگيالىق  قىزمەتتەردىڭ جۇمىسىن تەكسەردى.

تەكسەرۋ بارىسىندا مەگاپوليس اۋماعىنا ينفەكتسيا تارالۋ جاعدايلارىنىڭ الگوريتمىنە جانە بولدىرماۋدىڭ الدىن الۋ جونىندەگى ساقتىق شارالارىنا باسا نازار اۋدارىلدى. قر اۋماعىندا كوروناۆيرۋس ينفەكتسياسىنىڭ تارالۋىن بولدىرماۋ جونىندەگى ۆەدومستۆوارالىق كوميسسيانىڭ جانە قر دەنساۋلىق ساقتاۋ مينيسترلىگىنىڭ ەلدە «دەلتا» شتاممىنىڭ اينالىمىنا قاتىستى تاپسىرماسىن ەسكەرە وتىرىپ، جەرۇستى قىزمەتتەردىڭ كوروناۆيرۋستىق ينفەكتسيانىڭ تارالۋىنا قارسى دايىندىعى، ۇشۋ اۋماعىندا ينفەكتسيا سيمتومدارىن انىقتايتىن جولاۋشىلار ءۇشىن جەكەلەگەن ينفەكتسيالىق بوكستاردىڭ جۇمىسى تەكسەرىلدى.

اۋەجايعا كىرە بەرىستەگى Ashyq قوسىمشاسى ارقىلى تەستىلەۋگە دە نازار اۋدارىلدى. كۇزەت قىزمەتىنە ورتا ەسەپپەن اۋەجايعا كىرە بەرىستە «قىزىل» مارتەبەلى ەكى-ءۇش جولاۋشى تىركەلگەنى تۋرالى حاباردار ەتىلىپ، ينفەكتسيانىڭ ودان ءارى تارالۋىنا جول بەرمەۋ ءۇشىن بۇل ادامدار جەدەل وقشاۋلاندى.

اۋەجاي بازاسىندا اەروپورت بولىمشەلەرى باسشىلىعى مەن وكىلدەرىنىڭ قاتىسۋىمەن كوروناۆيرۋستىق ينفەكتسيانىڭ تارالۋىن بولدىرماۋ جونىندەگى قالالىق شتابتىڭ كوشپەلى وتىرىسى ءوتتى.

ەپيدەميولوگتاردىڭ ايتۋىنشا، دەلتا شتاممى جوعارى جۇقپالى ءارى انىقتالعان شتامدارعا قاراعاندا 60% جۇقپالى. ورتاشا العاندا، ءبىر ادامنان 5-6 ادام جۇقتىرادى، ال اينالىمداعى شتامداردان 3-4 ادام. شتاممنىڭ ينكۋباتسيالىق كەزەڭى جەتى كۇندى قۇرايدى. عالىمداردىڭ زەرتتەۋلەرى كوروناۆيرۋستىڭ ۇندىلىك شتاممى اۋرۋحاناعا جاتقىزۋ مەن ءولىم-ءجىتىمنىڭ ىقتيمالدىعى جوعارى ەكەنىن ايتتى.

ج. بەكشين ءۇندى شتامىنىڭ سيمپتومدارى باسقا، ۇيرەنشىكتى شتاممداردان وزگەشە دەدى. مىسالى ءيىس سەزۋ بولماۋى مۇمكىن. الايدا، اۋرۋدىڭ بەلگىلەرى بولعان كەزدە  دەرەۋ دارىگەردى شاقىرۋىڭىز كەرەك، ويتكەنى جاڭا شتامم  قاۋىپتى. وسىعان بايلانىستى قالا تۇرعىندارى ءوزىن-ءوزى ەمدەۋمەن اينالىسپاۋى كەرەك.

اكىم ورىنباسارى ە. باباقۇماروۆ سانيتارلىق-ەپيدەميولوگيالىق قورعاۋدىڭ بارلىق شارالارىن كۇشەيتۋدى، ونىڭ ىشىندە اۋەجاي قىزمەتكەرلەرىن ۆاكتسينالاۋعا شاقىردى. سونداي-اق اۋەجايدى دەزينفەكتسيالاۋ جۇمىستارى جالعاساتىن بولادى.

ايتا كەتسەك، الماتى ەپيدەميولوگتارى قاۋىپتى «دەلتا» شتاممىنان تۋىنداۋى مۇمكىن كوروناۆيرۋستىق ينفەكتسيانىڭ جاڭا تولقىنىن جوققا شىعارمايدى. الماتى قالاسىنىڭ كوروناۆيرۋستىق ينفەكتسيانىڭ تارالۋىنا جول بەرمەۋ جونىندەگى قالالىق شتابى تۇرعىنداردى ۆاكتسينالاۋعا، سونداي-اق بەتپەردە رەجيمى مەن الەۋمەتتىك قاشىقتىقتى ساقتاۋعا شاقىردى.

ەسكە سالساق، دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرى بويىنشا، 20 ماۋسىمداعى جاعداي بويىنشا SARS-CoV-2 «دەلتا» شتاممى الەمنىڭ 74 ەلىندە انىقتالدى.

 

 

الماتى

سوڭعى جاڭالىقتار

اينالما جولدىڭ ازابى

ايماقتار • كەشە

ۇقساس جاڭالىقتار