سپورت • 23 ماۋسىم، 2021

EURO-2020: 23 ماۋسىم كۇنىنىڭ جارىس كەستەسى

26 رەت كورسەتىلدى

ەۋروپاداعى فۋتبول تويى بۇگىن، ياعني، 23 ماۋسىم كۇنى دە جالعاسىن تابادى. بۇگىنگە ءتورت ماتچ جوسپارلانعان. E جانە F توپتارىنىڭ قۇرامالارى پلەي-وفف جولداماسى ءۇشىن تالاسادى، دەپ حابارلايدى Egemen.kz.

نۇر-سۇلتان ۋاقىتىمەن 21:50-دە ە توبىنداعى سلوۆاكيا مەن يسپانيا، شۆەتسيا مەن پولشا قۇرامالارى كەزدەسەدى. بۇل ءتورت كوماندانىڭ دا كەلەسى كەزەڭگە شىعۋدان ءۇمىتى بار. توپتاعى ويىندار تاعدىرى وسى ءۇشىنشى تۋردا شەشىلگەلى تۇر. كوشباسشى شۆەتسيا وسىعان دەيىن سلوۆاكيانى جەڭىپ، يسپاندارمەن تەڭ وينادى. سلوۆاكيا بولسا پولشادان باسىم تۇسكەن ەدى. يسپانيا شۆەدتەرمەن دە، پولياكتارمەن دە تەڭ ويناپ قالدى. ەنشىسىندە 2 ۇپاي عانا بار. ءبىر كەزدەسۋدە جەڭىلىپ، ءبىر كەزدەسۋدە تەڭ ويناعان پولشا قۇراماسىندا ءبىر عانا ۇپاي بار. سوعان قاراماستان بۇگىن شۆەتسيانى جەڭىپ، پلەي-وففقا اياق سوزعىسى كەلەدى.

مۇنداي ينتريگا F توبىندا دا بار. نۇر-سۇلتان ۋاقىتىمەن 00:50-دە پورتۋگاليا مەن فرانتسيا، گەرمانيا مەن ۆەنگريا كەزدەسەدى. بۇل جاقتىڭ دا ويىندارىن بولجاپ بولمايسىڭ. پورتۋگاليادان 0:3 ەسەبىمەن جەڭىلگەنىنە قاراماستان، فرانتسيامەن 1:1 ەسەبىمەن تەڭ ويناپ ەرلىك جاساعان ۆەنگريا بۇگىن قالايدا گەرمانيانى جەڭۋى ءتيىس. سوندا عانا كەلەسى كەزەڭگە شىعۋدان ۇمىتتەنە الادى. الايدا گەرمانيانىڭ قانداي دەڭگەيدەگى كوماندا ەكەنىن، وتكەن تۋردا پورتۋگاليانىڭ ەكى اياعىن ءبىر ەتىككە قالاي تىققانىن (4:2) جانكۇيەرلەر ۇمىتا قويعان جوق. سوندىقتان ماجارلاردى بۇگىن اۋىر ماتچ كۇتىپ تۇر.

پورتۋگاليا مەن فرانتسيا ماتچىن فۋتبول سۇيەر قاۋىم «فينالعا دەيىنگى فينال» دەپ باعالاپ جاتىر. گەرمانيانى اۆتوگولدىڭ ارقاسىندا اۋپىرىمدەپ جەڭىپ، ۆەنگريامەن سەنساتسيالى تۇردە تەڭ ويناعان ديدە دەشام شاكىرتتەرى ازىرگە بۇل ءتۋرنيردىڭ جۇمباق كومانداسىنا اينالىپ تۇر. ويىندارى جۇرمەي جاتىر ما، الدە بۇل ادەيى جاسالعان ستراتەگيا ما، ونى تاپ باسىپ ايتۋ قيىن.

العاشقى جانە ءتورتىنشى ويىندى Qazsport تەلەارناسى كورسەتسە، ەكىنشى جانە ءۇشىنشى كەزدەسۋلەردى Qazaqstan ەفيرىنەن تاماشالاۋعا مۇمكىندىك بار.

كەشەگى ويىن كۇنىندە انگليا، حورۆاتيا جانە چەحيا قۇرامالارى پلەي-وففقا شىقتى. ۇشەۋى دە ءبىر توپتىڭ وكىلدەرى. انگليانىڭ نەبارى ەكى گول عانا سوعىپ، كەلەسى كەزەڭگە شىققانى دا تاڭعالارلىق جاعداي بولدى.

جالپى العاندا ءدال قازىرگى ۋاقىتتا پلەي-وفف كەزەڭىنە 9 قۇراما جولداما الىپ قويدى، ولار – يتاليا، ۋەلس، بەلگيا، نيدەرلاندى، اۆستريا، دانيا، انگليا، حورۆاتيا جانە چەحيا قۇرامالارى.

1/8 فينالدىڭ ماتچتارى 26-29 ماۋسىم ارالىعىندا وتەدى. ءار كۇنگە ەكى ويىننان جوسپارلانعان.  

سوڭعى جاڭالىقتار

عارىشتان انىقتالعان قوقىستار

ەكولوگيا • بۇگىن، 08:24

ۆيرۋس جۇقتىرۋ توقتاماي تۇر

كوروناۆيرۋس • بۇگىن، 08:16

ءورت سوندىرگەن وجەتتەر

ايماقتار • بۇگىن، 08:12

ەرلىككە بەرگىسىز ەڭبەك

قوعام • بۇگىن، 08:09

جاساندى جۇرەك سالىندى

الەم • بۇگىن، 08:02

ۇقساس جاڭالىقتار