بىلتىر ىشكى ىستەر مينيسترلىگىندە وتكەن جيىندا پرەزيدەنت قاسىم-جومارت توقاەۆ «ۋچاسكەلىك ينسپەكتورلار – ناقتى اۋماقتاعى قىلمىستىڭ الدىن الۋداعى ەڭ ماڭىزدى تۇلعا» دەپ ولاردىڭ جۇمىسىنا جوعارى باعا بەرگەن ەدى.
پەتروپاۆل قالاسىنداعى ەكىنشى پوليتسيا بولىمشەسىنىڭ اعا ۋچاسكەلىك ينسپەكتورى ەسەن قوڭقاشەۆ سوڭعى 10 جىلدان بەرى وسىناۋ تىنىمسىز جۇمىستى ابىرويمەن اتقارىپ كەلەدى. «جۇمىسىم حالىققا پايداسىن تيگىزىپ جاتسا, قۋانامىن. حالىقتان العان ءاربىر العىس ءبىزدىڭ قىزمەتكە دەگەن ىنتامىزدى ارتتىرا تۇسەدى», دەيدى ول.
ەسەن ەسلام ۇلى – 1998 جىلدان بەرى پوليتسيا قاتارىندا قىزمەت اتقارادى. الدىمەن ول جەدەل قىزمەتتە ءبىراز جىل ەڭبەك ەتكەن. 2012 جىلدان بەرى اعا ۋچاسكەلىك ينسپەكتور قىزمەتىندە. ۋچاسكەدە ءتورت ينسپەكتور مەن ءبىر كومەكشى جۇمىس ىستەيدى. بىراق كومەك قاجەت بولعاندا بەلسەندى ستۋدەنتتەر مەن ۆولونتەرلەر كومەككە تارتىلادى. ە.قوڭقاشەۆ قىزمەت ەتەتىن ۋچاسكەسىنىڭ اۋماعىندا 14 520 ادام تۇرادى.
جوعارىدا اتالعان جيىندا پرەزيدەنت: «حالىقپەن اشىق اڭگىمە وتكىزىپ, ولاردىڭ پوليتسيادان نەنى كۇتەتىنىن ءبىلىپ وتىرۋ كەرەك جانە كومەك كەرەك بولعاندا ۇنەمى جاقىننان تابىلۋى كەرەك» دەگەن تالاپ قويعان ەدى.
ەسەن ەسلام ۇلى – ناق وسى تالاپتان شىعىپ, ءوزىنىڭ مىندەتىن تياناقتى ورىنداپ جۇرگەن ۋچاسكەلىك ينسپەكتورلاردىڭ ءبىرى. ونىڭ حالىق الدىندا بەرگەن ەسەبىنە بۇرىنعى وبلىستىق پوليتسيا دەپارتامەنتى باستىعى قاتىسىپ, جۇزدەگەن ادامنىڭ ينسپەكتوردىڭ جۇمىسىنا ايتقان العىسىن ءوز قۇلاعىمەن ەستىدى. وسى وقيعا دا سەبەپ بولعان شىعار, قالانىڭ ۋچاسكەلىك ينسپەكتورلارى اراسىندا ەسەن قوڭقاشەۆكە ءبىرىنشى بولىپ پودپولكوۆنيك اتاعى دا بەرىلدى. بۇل ەڭبەكتىڭ جوعارى باعالانعاندىعىنىڭ بەلگىسى.
ەسەن ءوزىنىڭ جۇمىسى تۋرالى ايتقاندا اعىل-تەگىل سويلەيدى. بارلىق ىسىنە ماقتانمەن ەمەس, كاسىبي بىلگىرلىكپەن باعا بەرىپ جاتقانىنا ريزا بولاسىڭ. ەكى ۇلى دا اكە جولىن قۋدى ماقسات ەتەدى. كەلىنشەگى جانسايا دا كۇيەۋىنىڭ تىنىمسىز جۇمىسىنا ابدەن ۇيرەنىپ الىپتى, وتباسىندا ەرىنە قاشاندا قولداۋ كورسەتىپ كەلەدى.
مىنە, ۋچاسكەلىك پوليتسەيلەر اراسىندا وتە سيرەك كەزدەسەتىن پودپولكوۆنيكتىڭ تىنىس-تىرشىلىگى قىسقاشا ايتقاندا وسىنداي.
