اقسۇلتان – جەزقازعان قالاسىنىڭ پوليتسيا باسقارماسى جەرگىلىكتى پوليتسيا قىزمەتىنىڭ ۋچاسكەلىك پوليتسيا ينسپەكتورى, پوليتسيا كاپيتانى. ارلان مەن ءالينۇر ەسىمدى قوس ق ۇلىنشاقتىڭ اكەسى. شاڭىراعىنىڭ جىلىلىعىن ساقتاپ, جارىعىن ەسەلەپ وتىرعان مەرەيدەي ارۋدىڭ ارقاسۇيەر ازاماتى. اكە جولىن ابىرويمەن جالعاستىرىپ كەلە جاتقان ۇل. ەڭ بيىگى ول – ەگەمەن ەل بولۋدىڭ, بوستاندىقتىڭ باقىتىن سەزىنىپ وسكەن, قادىرىن شىن تۇسىنگەن ۇرپاق. تاۋەلسىزدىكتىڭ تۋىن كوتەرگەن قۇرداسى!
اقسۇلتاننىڭ اكەسى دۋمان بوزاەۆ پوليتسيادا 20 جىل ەڭبەك ەتىپ, 2011 جىلى زەينەتكەرلىككە شىعادى. ءدال وسى جىلى ۇلى ەل الدىندا ادال قىزمەت ەتۋگە انت بەرىپ, ءتارتىپ ساقشىلارىنىڭ ساپىنا قوسىلادى.
«اكە جولىن جالعاستىرۋ – ءوز تاڭداۋىم» دەگەن ول بالا كەزدەن پوليتسيا قىزمەتكەرى بولۋدى ارمانداعانىن ايتادى. «بالا كەزىمنەن اكەمنىڭ فورماسىنا قاتتى قىزىعاتىنمىن. ول كىسىنىڭ جۇمىسىنا دەگەن ادالدىعى مەن جاۋاپكەرشىلىگىن ەرتە جاستان سەزىنىپ ءوستىم. «اكەمدەي پوليتسيا بولسام» دەگەن ارماننىڭ جەتەگىندە ءجۇرىپ ەر جەتتىم. ەس ءبىلىپ, اقىل توقتاتار جاسقا كەلگەندە مەن دە اسقار تاۋىمنىڭ جولىن جالعاستىرىپ, اعالارىمنىڭ ءىزىن باسامىن دەپ شەشتىم», دەيدى اعىنان جارىلعان اقسۇلتان.
«پوليتسيا قىزمەتكەرى بولۋ مەن ءۇشىن ابىروي عانا ەمەس, مىندەت جانە ەرلىككە پارا-پار. ويتكەنى وزگەلەرگە قاراعاندا بۇل سالادا مەنىڭ ۇلگى تۇتار اكەم مەن بويىم مەن ويىمدى تۇزەر اعالارىم بولدى. ەلگە ادال قىزمەت ەتۋدى وتباسىمدا قالىپتاسىپ قالعان وسىنداي قاعيداتتارعا قاراپ بويىما ءسىڭىردىم», دەگەن اقسۇلتان اناسى تۋرالى دا پەرزەنتتىك اق كوڭىلىن ءبىلدىردى.
«انام ايجان مەكتەپتە مۇعالىم بولىپ جۇمىس ىستەيدى. ول كىسىنىڭ اكەمە دەگەن قۇرمەتى ەرەكشە. ەكەۋىنىڭ سىيلاستىعىن, تاتۋلىعىن كورىپ وسكەندىكتەن بولار, ۇل-قىزدارىنىڭ اتا-اناعا دەگەن قۇرمەتى ومىردە قانداي جاعداي بولسا دا ورتايعان ەمەس. شىنداپ كەلگەندە, ءبىز اكەمىزدىڭ قاس-قاباعىنا قاراپ تاربيە الدىق, انامىزدىڭ مەيىرىمىنە شومىلىپ ەر جەتتىك. انامنىڭ «اكەڭ بىلەدى» جانە «اكەڭمەن اقىلداس» دەگەن ەكى اۋىز ءسوزىن ەستىپ, قۇلاققا قۇيىپ وستىك. ودان جامان بولعان جوقپىز», دەيدى پوليتسيا كاپيتانى.
«وتباسىمىزدا اكەم ءبىزدى ۇنەمى بىرلىك پەن تاتۋلىققا, سابىرلىق پەن تارتىپكە شاقىرىپ وتىرادى. اسىرەسە ول كىسى قىزمەتتى ادال ىستەپ, جۇمىستا تياناقتى بولۋعا, مىندەتتەرىمىزگە جاۋاپكەرشىلىكپەن قاراۋعا ەرەكشە ءمان بەرەدى. «پوليتسيا قىزمەتكەرى – ەلدىڭ الدىندا جۇرەتىن مامان. سوندىقتان نە ىستەسەڭدەر دە نيەتتەرىڭ اق, پەيىلدەرىڭ تازا بولسىن. ويتكەنى حالىقتىڭ قىراعى كوزى ءبارىن كورىپ, سەرگەك كوڭىلى جاقسى مەن جاماننىڭ بارلىعىن سۇزگىدەن وتكىزىپ وتىرادى» دەگەندى ءجيى ايتادى. ول كىسىنىڭ بىزگە ۇنەمى ايتاتىن ءبىر كەڭەسى بار. ول – «جەتى رەت ولشەپ, ءبىر رەت كەس» جانە «كەلىسىپ پىشكەن تون كەلتە بولمايدى» دەگەن سوزدەرى», دەگەن ۇلى كەز كەلگەن جاعدايدا ەڭ ءبىرىنشى اكەسىمەن اقىلداسىپ, بىرگە شەشىم شىعارۋدى ادەتكە اينالدىرعانىن دا ايتادى.
اقسۇلتان بوزاەۆ جاۋاپتى ۋچاسكەلىك اۋماقتا بۇگىندە 3 مىڭنان استام حالىق تۇرادى. جىل باسىنان بەرى اۋماقتا ءبىر اۋىر قىلمىس تىركەلسە, 700-دەن استام ادام اكىمشىلىك قۇقىق بۇزۋشىلىق جاساعانى ءۇشىن جاۋاپقا تارتىلعان. «ۋچاسكەلىك ينسپەكتور رەتىندە مەنىڭ باستى مىندەتىم – قىلمىستىڭ الدىن الۋ, تۇرعىندار اراسىندا پروفيلاكتيكالىق جۇمىستار جۇرگىزۋ. قىزمەت بارىسىندا ءتۇرلى جاعدايلار بولادى. ءتۇرلى ادام, ءتۇرلى مىنەز, ءتۇرلى تاعدىر بار. اسىرەسە ىشىمدىك ءىشىپ الىپ, ءۇيىنىڭ بەرەكەسىن الاتىن ەسەرلەر كوپ. جاقىندارىنىڭ تىنىشتىعىن كەتىرىپ, وتباسىندا ءبىر-ءبىرىنىڭ قادىرىن بىلمەيتىن شاڭىراقتار دا, وكىنىشكە قاراي, از ەمەس. اراققا سالىنىپ, ار-ۇياتتان اتتاپ جۇرگەندەر تۋعان-تۋىستارىنىڭ تۇرماق, زاڭ وكىلى رەتىندە ءبىزدىڭ وزىمىزگە دە تارپا باس سالاتىن كەزدەر بولادى. ال تىركەلگەن قۇقىق بۇزۋشىلاردىڭ ىشىندە تۇرمىستىق زورلىق-زومبىلىق فاكتىلەر ءجيى ۇشىراسادى», دەيدى ءتارتىپ ساقشىسى.
اڭگىمەگە ارالاسقان اقسۇلتاننىڭ اكەسى دۋمان اقساقال: «ماماندىق تاڭداۋ – ادام ومىرىندەگى ەڭ ماڭىزدى قادامداردىڭ ءبىرى. سول سەبەپتى دە بۇل تاڭداۋدى جۇرەكپەن, جاۋاپكەرشىلىكپەن جاساۋ قاجەت. ىشكى ىستەر ورگاندارىنا مەن دە ءوز قالاۋىممەن كەلدىم. ءار كۇنى قىم-قۋىت, قيىندىعى مەن جاۋاپكەرشىلىگى قاتار جۇرەتىن پوليتسيادا مىندەتىمدى ابىرويمەن اتقاردىم. بۇگىندە مىنە, اللاعا شۇكىر بەينەتتىڭ زەينەتىن كورىپ وتىرمىن. وسىنىڭ ءوزى باقىت ەمەس پە؟!», دەيدى كەۋدەسىن ماقتانىش كەرنەپ. « ۇلىمنىڭ ءىزىمدى جالعاپ, وسى قىزمەتكە كەلگەنى – ارينە, مەن ءۇشىن زور ماقتانىش. الايدا ءار ۋاقىتتىڭ بۇل قىزمەتكە ارتار ءوز تالاپ-مىندەتى بولادى. ۇلىمنىڭ سول مەجەدەن تومەندەمەي, ابىرويلى قىزمەت ەتكەنىن تىلەيمىن» دەگەن دۋمان بوزاەۆ «پوليتسيا اۋلەتىندە ەڭ ءبىرىنشى تەمىردەي ءتارتىپ بولعانى دۇرىس» دەگەن پىكىرىن دە ءبىلدىردى.
«قازىرگى جاستار سپورتقا كوپ كوڭىل بولە بەرمەيدى. سۇيىكتى ىسىڭمەن اينالىسۋعا كوبىنە ۋاقىت تا جەتە بەرمەيدى. الايدا قازىرگى ۋاقىت تەحنولوگيانىڭ دامىعان زامانى عوي. بۇگىندە پوليتسيا قىزمەتكەرلەرى ءۇشىن بارلىق جاعداي جاسالعان. الەۋمەتتىك قولداۋ كورسەتىلىپ, جۇمىستى جەڭىلدەتۋ ءۇشىن بۇكىل شارالار جاسالىپ كەلەدى. قىزمەتتەگى جاس بۋىنعا تەك ءوز ىسىنە ادال بولىپ, ەڭبەك ەتۋ عانا قالىپ وتىر. سوندىقتان ارتىمىزدان ەرگەن جاس بۋىنعا تەك ابىروي تىلەيمىن. ال ابىرويلى بولۋ ءۇشىن جۇمىسىڭا ادال بولۋىڭ قاجەت. وتانىمىزدىڭ تىنىشتىعى ءۇشىن تىنباي ەڭبەك ەتىپ جۇرگەن بارشا ءتارتىپ ساقشىلارىن كاسىبي مەرەكەلەرى – پوليتسيا كۇنىمەن قۇتتىقتايمىن. ەڭ باستىسى, وتباسىلارىڭىز امان بولسىن!», دەپ ويىن اق باتامەن اياقتادى اقساقال.
