سپورت • 17 ماۋسىم، 2021

EURO-2020: بەلگيا جەڭىستى جورىقتى جالعاستىرادى

152 رەت كورسەتىلدى

توپتىق كەزەڭدەگى كوپشىلىك كۇتكەن ماتچتىڭ ءبىرى – دانيا مەن بەلگيا قۇرامالارىنىڭ كەزدەسۋى بولار. بەلگيا ءبىرىنشى ويىندا رەسەيدى تاس-تالقان ەتسە (3:0)، دانيا بەتاشار ماتچتا فينليانديادان ايلاسىن اسىرا الماعان بولاتىن، دەپ حابارلايدى Egemen.kz.

ءارى ءبىرىنشى كەزدەسۋدە دانيا قۇراماسىنىڭ كوشباسشىسى كريستيان ەريكسەن ەسىنەن تانىپ قۇلاپ، بۇكىل الەم حالقىن الاڭداتىپ قويعان ەدى. سول ءبىر اۋىر ءسات ويىنشىلارعا دا اسەرىن تيگىزىپ، تۋرنير اۋتسايدەرىنىڭ ءبىرى سانالعان فينلياندياعا ەسە جىبەرىپ العان. سودان بولار بۇگىنگى ماتچتى كاسپەر حيۋلماند شاكىرتتەرى اسا بەلسەندى باستادى. ءبىرىنشى مينۋتتان باستاپ كۋرتۋا قاقپاسىنا تىنىشتىق بەرگەن جوق. تايلى-تۇياعى قالماي شابۋىلدادى. قۇددى ءبىر ويىننىڭ سوڭعى مينۋتتارىندا جانتالاسىپ جاتقانداي جان الىپ، جان بەرىپ وينادى. ناتيجەسى دە كوپ كۇتتىرگەن جوق. ايىپ الاڭىنداعى قاربالاس ساتتە يۋسسۋف پوۋلسەن تەپكەن دوپقا تيبو كۋرتۋا جەتە العان جوق. دانيا بۇدان كەيىن دە قورعانىسقا قارايلاي قويمادى. شابۋىلداۋدى ودان ءارى جالعاستىردى. جالپى، ءبىرىنشى تايمدى دانيانىڭ تايمى دەسەك تە بولعانداي.

سونداي-اق قوس قۇراما ويىننىڭ 10 مينۋتىندا ماتچتى ءبىر ساتكە توقتاتىپ، قازىر اۋرۋحانادا جاتقان كريستيان ەريكسەنگە قۇرمەت كورسەتتى.

ويىننىڭ ەكىنشى جارتىسىندا بەلگيا قۇراماسىنىڭ كوزىرلەرى كەۆين دە بريۋينە مەن ەدەن ازاردىڭ الاڭعا كىرۋى ويىن كارتيناسىن وزگەرتتى. كەزەكتى شابۋىلداردىڭ بىرىندە لۋكاكۋ كەۆين دە بريۋينەگە، «مانچەستەر سيتي» ليدەرى تورگان ازارعا ادەمى پاس اسىرىپ، ازار دات قاقپاشىسى شمەيحەل توسقاۋىل بولا الماستاي سوققى جاساپ، گول سوعىپ كەتتى. وسىدان كەيىن اق بەلگيا قورعانۋشى پوزيتسيادان شابۋىلداۋشى پوزيتسياعا انىق ويىستى. 70 مينۋتتا كەۆين دە بريۋينەنىڭ ءوزى الىستان سوققى باعىتتاپ، ەسەپتى ەسەلەدى. ويىن سوڭىنا قاراي دانيانىڭ باستاپقى قارقىنى دا باسەڭدەي بەردى. كاسپەر حيۋلماند ويىن بىتۋگە 20 مينۋت قالعان ساتتەن باستاپ بىرنەشە تىڭ ويىنشىنى الاڭعا شىعاردى. الايدا بۇل روكيروۆكالار ەش ناتيجە بەرگەن جوق.

وسىلايشا ۆ توبىندا بەلگيا 6 ۇپايمەن سەنىمدى تۇردە كوش باستادى. ودان كەيىن ەنشىسىندە 3 ۇپايدان بار رەسەي مەن فينليانديا تۇر. دانيا قۇراماسىنىڭ قورجىنى بوس. كەلەسى تۋردا بەلگيا فينليانديامەن الادوپ الامانىن جاساسا، دانيا رەسەي قۇراماسىنان 3 ۇپاي الۋعا تىرىسادى.

سوڭعى جاڭالىقتار

ەرتەڭىن ويلاعان ەكپە الادى

كوروناۆيرۋس • بۇگىن، 16:53

ۇقساس جاڭالىقتار