«كەشە جەرگىلىكتى ۋاقىت بويىنشا ساعات 22.15-تە كومپرەسسورلىق تسەحتە اۋا توڭازىتقىشى تۇتاندى. ءبىز دەرەۋ ءورتتى ءسوندىرۋ بويىنشا شارالار قابىلدادىق. زاۋىت بىردەن توقتاتىلدى. ءورتتى سوندىرۋگە جەكە ءورت ءسوندىرۋ توپتارى مەن تجد كۇشتەرى جۇمىلدىرىلدى. ساعات 22.52-دە ءورت ءسوندىرىلدى. ەڭ باستىسى قايتىس بولعاندار مەن زارداپ شەككەندەر جوق», دەدى ن. تولەپوۆ.
ونىڭ ايتۋىنشا, ساعات 23.30-دا ماماندار كاسىپورىندى شەكتەۋلى رەجيمدە ىسكە قوسۋعا كىرىستى. قازىر زاۋىتتىڭ جۇكتەمەسى شامامەن 30 پايىزدى قۇراپ وتىر. كاسىپورىندى تولىق قۋاتىنا شىعارۋ ءۇشىن قالپىنا كەلتىرۋ جۇمىستارى جالعاسىپ جاتىر.
سونىمەن قاتار ن. تولەپوۆ ءورتتىڭ سالدارىنان تەك اۋا توڭازىتقىشىنىڭ كوتەرگىش كونسترۋكتسياسى عانا ب ۇلىنگەنىن ايتتى. نەگىزگى جابدىققا زيان كەلمەگەن.
بۇعان قوسا, قازگوز ديرەكتورى وقيعا كەزىنەدە حيميالىق زاتتاردىڭ اعىپ كەتۋى تۋرالى الەۋمەتتىك جەلىلەردە تاراپ جاتقان اقپاراتتاردى جوققا شىعاردى. ول الاڭداۋعا نەگىز جوق ەكەنىن باسا ايتتى.
«بۇل جابدىق شيكى گازدى اۋا-سۋ ءادىسى ارقىلى سالقىنداتۋ ءۇشىن قولدانىلادى. بۇل جابدىقتا قانداي دا ءبىر حيميالىق زاتتار پايدالانىلمايدى. سوندىقتان جۇمىسكەرلەر جانە تۇرعىنداردىڭ ءومىرى مەن دەنساۋلىعىنا قاۋىپتىڭ جوق ەكەنىن سەنىممەن ايتا الامىن», دەدى ن. تولەپوۆ.
ونىڭ پىكىرىنشە, زاۋىتتىڭ قىزمەتى جاقىن ارادا تولىعىمەن قالپىنا كەلتىرىلەتىن بولادى جانە سۇيىتىلعان مۇناي گازىمەن قامتاماسىز ەتۋ بويىنشا اۋتقۋلار بولمايدى.
ايتا كەتەيىك, وسىعان دەيىن جاڭاوزەندە گاز وڭدەۋ زاۋىتى ورتەنگەنىن حابارلادىق.
