سپورت • 17 ماۋسىم، 2021

رونالدۋدىڭ رەكوردى مەن نەمىستەردىڭ اۆتوگولى

21 رەت كورسەتىلدى

سەيسەنبىدەن سارسەنبىگە قاراعان ءتۇنى ەۋروپا بىرىنشىلىگىندە F توبىندا ونەر كورسەتەتىن كوماندالاردىڭ ويىندارىن تاماشالادىق. بۋداپەشتە ماجارستان مەن پورتۋگاليا قۇرامالارى كۇش سىناسسا، ميۋنحەندە گەرمانيا مەن فرانتسيانىڭ فۋتبولشىلارى شەبەرلىك بايقاستى. بۇل كەزدەسۋلەردىڭ ەكەۋى دە كوپشىلىك كوڭىلىنەن شىقتى دەگەن ويدامىز، دەپ جازادى Egemen.kz.

قازىرگى كەزدە پاندەمياعا بايلانىستى الەمنىڭ كوپتەگەن ستاديوندارىندا كورەرمەندەر سانىنىنا شەكتەۋ قويىلعانى بەلگىلى. الايدا بۇل اڭگىمەنىڭ ماجارستانعا ەش قاتىسى جوق. ءوز وتانداستارىنىڭ ويىنىن تاماشالاۋ ءۇشىن سول كەشتە بۋداپەشتەگى «پۋشكاش ارەناعا» 55 662 كورەرمەن جينالدى. بۇعان دەيىن ولار ءوزارا 13 مارتە كەزدەسىپ، توعىز كەزدەسۋدە پيرنەي تۇبەگىنىڭ تۇلەكتەرى باسىم بولعان ەكەن. تاعى ءتورت باسەكەدە تەڭ ەسەپ تىركەلدى. ياعني، ماجارستاندىقتار پورتۋگاليا قۇراماسىن بىردە-ءبىر رەت جەڭە الماپتى. بۇل جايتتىڭ بارلىعى جانكۇيەرلەردىڭ جادىندا. سول سەبەپتى دە ستاديون تولى كورەرمەن ماتچتىڭ باسىنان اياعىنا دەيىن ايعايعا باسىپ، جەرگىلىكتى فۋتبولشىلارعا بارىنشا قولداۋ كورسەتتى. سولاردىڭ دەمەۋىنىڭ ارقاسىندا الاڭ يەلەرى 83 مينۋت بويى ەۋروپا چەمپيوندارىنىڭ قارقىنىنا تويتارىس بەرىپ قانا قويماي، وزدەرى دە ارا-تۇرا قاۋىپتى شابۋىلدار ۇيىمداستىردى. تىپتەن، ولار العاشقى بولىپ ەسەپ تە اشتى. الايدا 80-مينۋتتا سابولچ ءشيوننىڭ سوققان گولى ەسەپكە الىنبادى. وففسايد!

تەك سودان كەيىن بارىپ قانا پورتۋگاليالىقتار ەس ءجيدى. بىردەن ەكى ويىنشىسىن الماستىرعان قوناقتار 84-مينۋتتا قارسىلاستارىنىڭ قاقپا كىلتىن تاپتى. رافاەل گەررەيرۋدىڭ سوققان دوبى قورعاۋشىلاردىڭ بىرىنە ءتيىپ، ءوز باعىتىن وزگەرتتى – 0:1. سودان كەيىن-اق جەرگىلىكتى فۋتبولشىلاردىڭ سالى سۋعا كەتتى. 86-مينۋتتا ولار ءوز ايىپ الاڭىندا ەرەجە بۇزدى. كريشتيانۋ رونالدۋ 11 مەترلىك نۇكتەدەن ءمۇلت كەتكەن جوق – 0:2. باسەكەنىڭ اياقتالۋىنا ساناۋلى سەكۋندتار قالعاندا رونالدۋ تاعى ءبىر مارتە نىسانانى ءدال كوزدەدى – 0:3.

وسىلايشا، پورتۋگاليا قۇراماسى بيىلعى «ەۋرو» دوداسىنداعى العاشقى ءۇش ۇپايىنا قول جەتكىزدى. ال كريشتيانۋ رونالدۋ بولسا، ءۇش بىردەي رەكوردتى جاڭارتتى. ءبىرىنشىسى، ول قارت قۇرلىقتىڭ باستى دوپ دوداسىندا بەسىنشى مارتە بوي كورسەتتى. ەكىنشىسى، الەم جانە ەۋروپا چەمپيوناتتارىن قوس العاندا، كريش 39 رەت جاسىل الاڭعا شىقتى. بۇعان دەيىنگى ەڭ ۇزدىك كورسەتكىش باستيان شۆاينشتايگەرگە تيەسىلى ەدى. گەرمانيا قۇراماسىنىڭ جارتىلاي قورعاۋشىسى 38 ويىنعا قاتىستى. ءۇشىنشىسى، پورتۋگاليانىڭ جۇلدىزى «ەۆرو» دودالارىندا 11 رەت نىسانى ءدال كوزدەپ، فرانتسيانىڭ سۇرمەرگەنى ميشەل ءپلاتينيدى باسىپ وزدى.

ميۋنحەندەگى «الليانتس ارەنادا» سوڭعى ەكى الەم چەمپيوناتىندا باس جۇلدەنى ولجالاعان قوس كوماندا – گەرمانيا مەن فرانتسيا كۇش سىناستى. العاشقىسىنىڭ 2014 جىلى برازيليادا باعى جانسا، ەكىنشىسى 2018 جىلى رەسەيدە قارسىلاس شاق كەلتىرمەگەن ەدى. بۇل كوماندالاردىڭ ەكەۋى دە 4-3-3 سحەماسىن ۇستاندى.

كەزدەسۋدىڭ العاشقى 10 مينۋتى الما-كەزەك شابۋىلمەن وتكەنىمەن، ودان كەيىن فرانتسۋزدار ويىن تىزگىنىن بىرتە-بىرتە ءوز قولدارىنا الدى. ناتيجە كوپ كۇتتىرگەن جوق. 20-مينۋتتا ديدە دەشام شاكىرتتەرىنىڭ ۇيىمداستىرعان جاقسى ءبىر كومبيناتسياسىنان كەيىن دوپ قاقپا تورىنان تابىلدى. قارسى جاقتان تونگەن قاۋىپتىڭ بەتىن قايتارماق بولعان ماتس حۋممەلس اۆتوگول اۆتورى اتاندى.

ەكىنشى تايمدا دا ەكى كوماندانىڭ دا گول سوعۋلارىنا تاماشا مۇمكىندىكتەرى بولدى. وسى ورايدا، الاڭ يەلەرىنە قاراعاندا فرانتسيا قۇراماسى الدەقايدا شيراق قيمىلداپ، كوبىرەك قاۋىپ توندىرگەنىن ايتا كەتكەن ابزال. اسىرەسە، ادريان رابو. كيليان مباپپە جانە كاريم بەنزەمانىڭ ەسەپتى ەسەلەۋگە تاماشا مۇمكىندىكتەرى بولدى. بىراق ولاردىڭ باعىتتاعان دوبى بىردە باعاناعا تيسە، ەندى بىردە «ويىننان تىس قالدىڭ» دەپ تورەشى سوعىلعان گولدى ەسەپكە المادى. ءسويتىپ، قوس مىقتىنىڭ تارتىسى فرانتسيا قۇراماسىنىڭ جەڭىسىمەن اياقتالدى – 1:0:

 

سوڭعى جاڭالىقتار

اقپاراتتىق حابارلاما

ەگەمەن قازاقستان • كەشە

دوللار تاعى دا ارزاندادى

ەكونوميكا • كەشە

ۇقساس جاڭالىقتار