سپورت • 16 ماۋسىم، 2021

گرەك-ريم بالۋاندارىنىڭ الەۋەتى قانداي؟

36 رەت كورسەتىلدى

گازەتىمىزدىڭ وتكەن 8 ماۋسىم كۇنگى №106 سانىندا توكيو-2020-عا جولداما العان ەركىن كۇرەس بالۋاندارى جايلى ساراپتاما ماقالا جازعان ەدىك. بۇل جولى كۇرەستىڭ گرەك-ريم ءستيلى بويىنشا وليمپيادا كىلەمىندە ونەر كورسەتەتىن جىگىتتەردىڭ جەتكەن جەتىستىكتەرى مەن ولارعا قارسىلاس اتانۋشى سپورتشىلاردىڭ الەۋەتى تۋرالى باسىلىم وقىرماندارىن حاباردار ەتۋدى ءجون كوردىك.

رەتى كەلگەندە ايتا كەتسەك، گرەك-ريم كۇرەسى بالۋاندارى الەم چەمپيوناتىندا 10 سالماق دارەجەسىندە بەلدەسەتىن بولسا، وسىنىڭ التاۋى (60، 67، 77، 87، 97، 130 كيلو) وليمپيادالىق سايىس تۇرىنە جاتا­دى. ءبىزدىڭ جىگىتتەر وسىنداعى التى سالماقتىڭ ۇشەۋىنەن توكيوعا جولداما الىپ ۇلگەردى. سونىڭ ءبىرىنشىسى – 60 كيلو سالماق دارەجەسى. بۇل سالماق بويىنشا وليمپياداعا ۇمىتكەر ەكى بالۋانىمىز بار. ءبىرىنشىسى – اقتوبەلىك 27 جاستاعى سپورتشى مەيرامبەك ايناعۇلوۆ. بۇل جىگىت 2017 جىلى پاريجدە وتكەن الەم چەمپيوناتىندا 59 كيلو سالماقتا كۇمىس جۇلدەگەر اتانسا، ازيا بىرىنشىلىگىنىڭ ەكى دۇركىن (بانگكوك-2016، نيۋ-دەلي-2017) جۇلدەگەرى. 2018 جىلى 60 كيلوعا اۋىسىپ، دجاكارتادا وتكەن ازيا ويىندارىندا قولا مەدال ەنشىلەگەن ەدى.

2019 جىلى نۇر-سۇلتاندا جالاۋى­ن كوتەرگەن الەم چەمپيوناتىندا ونەر كورسەتكەن ايناعۇلوۆ العاشقى اينالىمدا برازيليا ءۇمىتى، پانامەريكا ويىن­دارىنىڭ قولا جۇلدەگەرى 35 جاس­تاعى مارات گاريپوۆتى قينالماي جەڭ­­سە، ەكىنشى اينالىمدا ليتۆالىق يۋ.پەترايكيۋستى 4:2 ەسەبىمەن ۇتىپ، شيرەك فينالدىق بەلدەسۋدە حورۆاتيالىق يۆان ليزاتوۆيكتى 10:0 ۇپايمەن ەركىن ەڭ­سەرگەن بولاتىن. قولا مەدال ءۇشىن ۋكراينالىق بالۋان لەنۋر تەميروۆپەن بەلدەسىپ، ونى 10:0 ەسەبىمەن جەڭىپ، قور­جىنىمىزعا جۇلدەمەن قاتار، ليتسەنزيا سالدى. ءبىر سوزبەن ايتقاندا، ول – الەم جانە قۇرلىقتىق جارىستاردان ولجا سالىپ جۇرگەن وتە تاجىريبەلى بالۋان.

بۇل سالماقتا تاعى ءبىر مىق­تى بالۋانىمىز بار. ول – 1996 جىلى تۋعان قىزىلوردالىق سۇلتانعالي ايدوس. ول 2018 جىلى بۋداپەشتتە وتكەن الەم چەمپيو­­ناتىندا جۇلدەگەر اتانسا، وتكەن جىلى ەل بىرىنشىلىگىندە جەڭىستىڭ ەڭ بيىك تۇعىرىنا كوتەرىلدى. سونىمەن قاتار كوك­­تەمدە الماتىدا ۇيىمداستىرىلعان ازيا چەمپيوناتىندا تاعى دا توپ جاردى. باپكەرلەر وتكەن ناۋرىز ايىندا يتاليادا ۇيىمداستىرىلعان تۋرنيرگە ەكى بالۋاندى قاتار الىپ بارعان ەدى. بۇل جارىستا سۇلتانعالي چەمپيون اتانسا، مەي­رامبەك جارىس جولىن ەرتە اياقتادى. بۇل ەكى بالۋاننىڭ قايسىسى توكيو تورىندە ونەر كورسەتەتىنى كەشىكپەي شەشىلەدى.

اتالعان سالماق بويىنشا الەمدە ەڭ مىقتى بالۋان – 2019 جىلعى الەم جەڭىم­پازى جاپونيالىق كەنينتيرو فۋميتا. بۇل جىگىتتەن م.ايناعۇلوۆ ەكى دۇركىن ۇتىلسا، س.ايدوستىڭ جولى ازىرگە تۇيىسە قويعان جوق. سونىمەن قاتار بۇل سالماقتا 2018 جىلعى الەم چەمپيونى رەسەيلىك سەرگەي ەمەلين، ريو وليمپياداسىنىڭ كۇمىس جۇلدەگەرى وزبەكستاندىق قازاق بالۋانى ەلمۇرات تاشمۇرادوۆ، الەمنىڭ ءۇش دۇركىن جۇلدەگەرى، ازيانىڭ بەس دۇركىن جەڭىمپازى يراندىق اليرەزا نەدجاتي وسال قارسىلاستار ەمەس. بۇلاردان باس­قا، 2018 جىلى الەم چەمپيوناتىنىڭ كۇمىس جۇلدەگەرى اتانعان مولداۆان با­لۋانى ۆيكتور چوبانۋدى دا ەستەن شى­عارۋعا بولمايدى. ءسوزىمىزدى تۇيىندەپ ايتار بولساق، مامانداردىڭ بولجاۋىنا قاراعاندا، ايدوستىڭ اتالعان سالماقتا وليمپيادا جۇلدەسىنە ىلىگۋ مۇمكىندىگى بار كورىنەدى.

ەكىنشى جولداما 77 كيلو سالماق دارەجەسىنە بۇيىرىپتى. بۇل ليتسەنزيا يەسى – 1986 جىلى تۋعان ساقا بالۋا­ن، 2018 جىلى 82 كيلو سالماقتا ازيا جە­ڭىمپازى اتانعان اسحات دىلمۇحامەدوۆ. ول 2019 جىلى نۇر-سۇلتاندا وتكەن الەم بىرىنشىلىگىنىڭ ءبىرىنشى اينالىمىندا چەحيا بالۋانى ولدريچ ۆارگانى ەكى مينۋتتىڭ ىشىندە 9:0 ەسەبىمەن ۇتىپ، ەكىنشى كەزەكتە رەسەيلىك اتاقتى بالۋان، ەكى دۇركىن وليمپيادا جانە الەم چەمپيونى، ءتورت دۇركىن ەۋروپا جەڭىمپازى رومان ۆلاسوۆپەن جولى تۇيىسكەن-ءتىن. كوپشىلىك ماماندار جەڭىستى الدەقاشان رەسەيلىكتىڭ قانجىعاسىنا بايلاپ تاستاعانداي ەدى. بىراق نامىسقا تىرىسقان اسحات اتاعىنان ات ۇركەتىن رەسەيلىكتى بالشىقشا يلەدى. ەسەپ – 3:0. وسىلاي جەڭىسكە جەتكەن دىلمۇحامەدوۆ جارتىلاي فينالدىق باسەكەدە سەربيا ماقتانىشى، 2017 جىلى پاريجدە وتكەن الەم چەمپيوناتىنىڭ جەڭىمپازى ۆيكتور نەمەشپەن بەلدەستى. كۇرەس تاع­­دىرى 4:3 ەسەبىمەن ءبىزدىڭ جىگىت­تىڭ پاي­داسىنا شەشىلدى. وسىلايشا، الەم­نىڭ ەكى مىقتىسىن جارىس جولىنان شىعارعان ول فينالدىق باسەكە جولىندا وليمپيادانىڭ كۇمىس جۇلدەگەرى ماجار تاماش لورينتستەن جەڭىلىس تاۋى­پ، جۇلدەلى ورىن ءۇشىن وزبەكستاندىق جالعاسباي بەردىمۇراتوۆپەن كۇرەسىپ، قارسىلاسىنا 3:1 ۇپايىمەن ەسە جىبەرگەن ەدى. ءسويتىپ، 5-ورىندى قاناعات تۇتۋمەن قاتار، وليم­پيادا جولداماسىن جەڭىپ العان بولاتىن.

بۇل سالماق بويىنشا الەمنىڭ مىقتى بالۋاندارىنىڭ باسىندا ەكى دۇركىن وليم­پيادا (لوندون-2012، ريو-2016) جانە الەم چەمپيونى رومان ۆلاسوۆ جانە 2018 جىلعى الەم چەمپيونى، ەۋ­روپا ويىندارى مەن ەۋروپا چەمپيونى الەكساندر چەحيركين تۇر. سونداي-اق تاعى ءبىر رەسەيلىك مىقتى سپورتشى، 2019 جىلى نۇر-سۇلتاندا وتكەن الەم چەم­پيوناتىندا 72 كيلو سال­ماقتا چەمپيون اتانعان ابۋيازيد مان­تسيگوۆ بار. ول بيىل 77 كيلوعا اۋىسىپ، رەسەي چەمپيو­نى اتاندى. بۇلاردان باسقا، لوندون وليمپياداسىنىڭ كۇمىس جۇلدەگەرى ماجارلىق توماش لورەنتس، الەم بىرىن­شى­لىگىنىڭ ەكى دۇركىن (2017، 2019) جۇلدە­گەرى يراندىق گەراەي مۇحامەدالي، 2018 جىلعى ازيا ويىندارىنىڭ جە­ڭىمپازى جانە الەم چەمپيوناتىنىڭ جۇل­دەگەرى وزبەكستاندىق جالعاسباي بەر­دىمۇراتوۆ جەڭىستى قولدان بەرە سالاتىندار ساناتىنان ەمەس.

بىراق اسحات ءۇشىن كانىگى قارسىلاستار – رەسەيلىكتەر. ەكى جىل بۇرىن دىلمۇ­حامەدوۆ اتاقتى ۆلاسوۆتى الەم چەمپيو­ناتىندا ۇتسا، 2019 جىلى چەحيرحيندى تۇرلىحانوۆ تۋرنيرىندە قاپى قالدىرعان بولاتىن. كۇرەس ماماندارىنىڭ پايىمىنا قاراساق، بۇل سالماقتان بىزگە جۇلدە الۋعا مۇمكىندىك بار.

ءۇشىنشى ليتسەنزيا 87 كيلو سالماققا بۇيىردى. ونى تاجىريبەلى بالۋان، 2014 جىلعى ازيا چەمپيونى جانە كۇمىس جۇلدەگەر (2015) نۇرسۇلتان تۇرسىنوۆ ءساۋىر ايىندا الماتى قالاسىندا وتكەن ازيا قۇرلىعىنىڭ وليمپياداعا ىرىكتەۋ تۋرنيرىندە جەڭىپ الدى. ول – قازاق كۇ­رەسىنەن «قازاقستان بارىسى» اتانعان مۇحيت تۇرسىنوۆتىڭ ءىنىسى. بۇل سالماقتا مىق­تىلاردىڭ ءبارى ەۋروپالىقتار. با­سە­كەنىڭ كۇشتىلىگى سونشالىق، رە­سەيلىكتەردىڭ ءوزى ليتسەنزياسىز قالدى. سوعان قاراعاندا، بىزگە جۇلدەنىڭ اۋىلى الىس سياقتى.

مامانداردىڭ ساراپتاۋىنا قا­را­­عاندا، بۇل سالماق بويىنشا وليم­پياد­ا جەڭىمپازى مەن جۇلدەگەرى بولۋعا لايىق بالۋاندار: ريو وليمپياداسىنىڭ ءفي­ناليسى جانە الەمنىڭ ەكى دۇركىن (لاس-ۆەگاس-2015، نۇر-سۇلتان-2019) جەڭىمپازى ۋكراينالىق جان بەلەنيۋك، ماجار جىگىتى، الەم چەمپيوناتىنىڭ كۇمىس جۇلدەگەرى ۆيكتور لورەنتس، وليمپيادا جانە الەم چەم­پيوناتىنىڭ جۇلدەگەرى، نەمىس بالۋانى دەنيس كۋدلا، سەربيا اتىنان كىلەمگە شىعىپ جۇرگەن ەۋروپانىڭ ءۇش دۇركىن چەمپيونى زۋراب داتۋناشۆيلي، ازيا­لىقتار اراسىنان الەم چەمپيوناتىنىڭ (نۇر-سۇلتان-2019) قولا جۇلدەگەرى، ازيا ويىندارىنىڭ جەڭىمپازى وزبەكستاندىق رۋستام اسسا­كالوۆ. بىراق اسساكالوۆتى تۇرسىنوۆ 2014 جىلعى ازيا بىرىنشىلىگىنىڭ فينالىندا تىزە بۇكتىرگەن بولاتىن.

سوڭعى جاڭالىقتار

شىعىس «قىزىل» ايماقتا

ايماقتار • كەشە

تسيفرلى تەڭگە جوباسى تالقىلاندى

ەكونوميكا • 23 شىلدە، 2021

اقپاراتتىق حابارلاما

ەگەمەن قازاقستان • 23 شىلدە، 2021

ۇقساس جاڭالىقتار