ەرلەر سايىسىندا جاپونيا قۇرماسى وزدى. كۇنشىعىس ەلىنىڭ جىگىتتەرى 2 التىن مەن 1 قولا مەدالدى ولجالادى. وسى ورايدا, جاپونداردىڭ ءبىرىنشى ءنومىرلى بالۋاندارى بۋداپەشتكە كەلمەگەنىن ايتا كەتۋگە ءتيىسپىز. ولار ەلدە قالىپ, كەلەسى ايدا الاۋى تۇتاناتىن وليمپيا ويىندارىنا ەش الاڭسىز دايارلانۋدى قۇپ كوردى. سوعان قاراماستان, ايتۋلى مەملەكەت ورەندەرىنىڭ قارقىنىنا ەشكىم شىداي المادى. ەكىنشى ورىندا – گرۋزيا. قاپ تاۋىنان كەلگەن قىراندار 1 التىن, 1 كۇمىس جانە 2 قولانى ەنشىلەدى. رەسەي قۇراماسى ءۇشىنشى ساتىعا جايعاستى. ولار 1 التىن, 1 كۇمىس جانە 1 قولا مەدالدى قورجىنعا سالدى. سونداي-اق, بەلگيا, يسپانيا جانە پورتۋگاليانىڭ دزيۋدوشىلارى ءبىر-ءبىر رەتتەن جەڭىس تۇعىرىنىڭ ەڭ بيىك ساتىسىنا كوتەرىلدى.
ايەلدەر اراسىندا دا جاپونيا قۇراماسىنا تەڭ كەلەر كوماندا تابىلمادى. ولار 3 التىن, 4 كۇمىس جانە 1 قولا جۇلدەنى قورجىنعا سالدى. ءبىر ايتا كەتەرلىگى, جاپون قىزدارى ەكى سالماق دارەجەسى بويىنشا فينالدىق سايىستا ءوزارا كۇش سىناستى. ەكىنشى ورىندا – فرانتسيا. وسىدان ەكى جىل بۇرىن توكيودا وتكەن الەم چەمپيوناتىندا ءوز ەلىنىڭ ءانۇرانىن ءۇش مارتە شىرقاتقان فرانتسۋزدار بۇل جولى 1 التىن پەن 1 كۇمىستى قاناعات تۇتتى. ءۇشىنشى ورىندى گەرمانيا قۇراماسى يەلەندى. نەمىستىڭ بۇرىمدىلارى 1 التىن مەن 1 قولاعا قول سوزدى. سونىمەن قاتار, كانادا مەن حورۆاتيانىڭ ارۋلارى دا ماجارستاننىڭ استاناسىندا التىننان القا تاعىندى.
ال قورجىنىندا جالعىز كۇمىس مەدالى بار قازاقستان قۇراماسى وسى جارىستىڭ جالپى كوماندالىق ەسەبىندە يتاليا, سلوۆەنيا جانە وزبەكستاننىڭ دزيۋدوشىلارىمەن بىرگە 13-16 ورىنداردى ءبولىستى.
