سپورت • 13 ماۋسىم، 2021

دوپ دوداسى توسىن وقيعالارمەن باستالدى

86 رەت كورسەتىلدى

جۇمادان سەنبىگە قاراعان ءتۇنى يتاليا استاناسى – ريمدە فۋتبولدان 16-شى ەۋروپا چەمپيوناتىنىڭ شىمىلدىعى ءتۇرىلدى. كارى قۇرلىق بىرىنشىلىگى ء«ا» دەگەننەن كۇتپەگەن وقيعالارمەن باس­تالدى. چەمپيوناتتىڭ العاشقى گولىن تۇركيا قۇراماسىنىڭ فۋتبولشىسى ءوز قاقپاسىنا سوعىپ السا، دانيا-فينليانديا اراسىنداعى ماتچتىڭ ءبىرىن­شى تايمىندا دات فۋتبولشىسى كريستيان ەريكسەن ەسىنەن تانىپ، ستاديونعا جي­نالعان جانە ويىندى تەلەديدار ارقىلى تاماشالاعان ميلليونداعان جانكۇيەردى ۋايىمعا سالىپ قويدى.

سونىمەن بيىلعى ەۋروپا چەمپيوناتى تۇركيا جانە يتاليا قۇرامالارىنىڭ ارا­سىنداعى ويىننان باستاۋ الدى. جان­كۇيەرلەرمەن قاتار فۋتبولشىلاردىڭ وزدە­رى دە مۇنداي ءىرى دودانى قاتتى ساعىنىپ قالعان بولۋى كەرەك، بىرىنشىلىكتىڭ العاشقى كەز­دەسۋىنەن-اق تۋرنير تارتىستى باستالدى. ءوز توبىنىڭ كوشباسشىسى بولادى دەپ كۇتىلگەن ەكى ۇجىمنىڭ اراسىنداعى ويىن تەك ءۇش ۇپايعا عانا ەمەس، تاكتيكالىق كۇرەسكە دە تولى بولدى دەپ ايتا الامىز.  

كەزدەسۋدىڭ ءبىرىنشى تايمى 0:0 ەسەبىمەن تەڭ اياقتالىپ، ەكىنشى تايمدا يتاليا فۋتبولشىلارى تۇركيا قۇراماسىنىڭ قاقپاسىنا جاۋاپسىز ءۇش گول سوقتى. يتاليالىقتاردىڭ ءبىرىنشى تايمنىڭ سوڭىندا پەنالتيدەن  ەسەپتى اشاتىن مۇمكىندىكتەرى بولعان ەدى. الايدا تورەشى دەنني ماككەلي ەۋروپا چەمپيوناتىندا بيىل تۇڭعىش رەت قولدانىلىپ جاتقان VAR كومەگىنە جۇگىنىپ، تۇركيالىق فۋتبولشى ويىن ەرەجەسىن بۇزباعان دەپ تاپتى. ەكىنشى تايمنىڭ 53-مينۋتىندا دومەنيكو بەرارديدىڭ الىس­تان شىرەنە تەپكەن دوبى بايقاۋسىزدا «يۋۆەنتۋس» كلۋبىندا ونەر كورسەتەتىن تۇركيا قۇراماسىنىڭ قورعاۋشىسى مەريح دەميرالعا ءتيىپ، دوپ قاقپا تورىنان تابىلدى. وسىلايشا ەۋروپا چەمپيوناتىنىڭ تاريحىندا ءتۋرنيردىڭ العاشقى گولى اۆتوگول رەتىندە تىركەلدى. ماتچ يتاليادا وتسە دە، رەسمي تۇردە قوناق كوماندا بولىپ ويناعان يتاليا كەزدەسۋ سوڭىنا دەيىن تۇركيا قاقپاسىنا تاعى ەكى گول سوعىپ، ءبىرىنشى ماتچتا 3:0 ەسەبىمەن جەڭىسكە جەتتى.

ال باكۋدە وتكەن توپتاعى ەكىنشى كەزدەسۋدە ۋەلس ماتچ سوڭىنا قاراي تارازى با­سىن تەڭەستىرىپ، جەڭىلىستەن امان قالدى. ەكىن­شى تايمنىڭ 49-مينۋتىندا شۆەيتساريا قۇرا­ماسىنىڭ فۋتبولشىسى برەل ەمبولو ەسەپ اشسا، 74-مينۋتتا كيففەر مۋر ۋەلستىڭ قارىمتا گولىن سوعىپ، قۇراماسىنا ماڭىزدى ءبىر ۇپايدى اپەردى.

ۆ توبىنداعى دانيا مەن فينليانديا ارا­سىنداعى كەزدەسۋدە كۇتپەگەن وقيعا تىركەلدى. ويىننىڭ ءبىرىنشى تايمى اياقتالار تۇستا دانيا قۇراماسىنىڭ جارتىلاي قورعاۋشىسى كريستيان ەريكسەن ەسىنەن تانىپ قالدى. دارىگەرلەر كەلگەنشە فۋتبولشىعا ارىپتەستەرى العاشقى مەديتسينالىق كومەك كورسەتىپ، ەرلىك جاسادى. كەيىننەن دارىگەرلەر فۋتبولشىعا الاڭدا 15 مينۋتقا جۋىق ۋاقىت كومەك كور­سەتىپ، جاساندى تىنىس الۋ اپپاراتىمەن ەسىن جيعىزۋعا تىرىستى. ءبىر ايتا كەتەرلىگى، ەريكسەنگە مەديتسينالىق كومەك كورسەتىلىپ جاتقاندا دانيا فۋتبولشىلارى شەڭبەر قۇرىپ جينالا قالىپ، كورەرمەندەرگە قاي­عىلى جاعدايدى كورسەتپەۋگە تىرىستى. ويىن­شىلاردىڭ بۇل ءىس-ارەكەتىن دۇنيەجۇزى جانكۇيەرلەرى باس بارماقپەن باعالاۋدا. رەا­ني­ماتسيالىق ەم جاسالىپ بولعان سوڭ، ەريكسەندى جەدەل جاردەم كولىگىمەن اۋرۋحانا الىپ كەتتى. كەيىننەن ۋەفا رەسمي مالىمدەمە جاساپ، فۋتبولشى ەسىن جيعانىن جانە ءوزىن جاقسى سەزىنىپ جاتقانىن ايتتى.

ءدال وسى جاعدايعا ۇقساس وقيعا 2003 جىلى كونفەدەراتسيا كۋبوگىندا دا بولعان ەدى. كامەرۋندىق فۋتبولشى مارك-ۆيۆەن فوە كولۋمبيامەن وتكەن كەزدەسۋدىڭ 72-مينۋتىندا ەسىنەن تانىپ قۇلاپ، سول  كۇيى و دۇنيەگە اتتانىپ كەتكەن بولاتىن.

دانيا مەن فينليانديا اراسىنداعى ماتچ 1،5 ساعاتقا كەيىنگە شەگەرىلىپ، ەكى قۇ­راما فۋتبولشىلارىنىڭ وتىنىشىمەن قايتا جالعاستى. كەزدەسۋدىڭ ءفاۆوريتى سانالعان دانيا ەكىنشى تايمدا كۇتپەگەن جەردە ءوز قاقپاسىنا گول وتكىزىپ الىپ، 0:1 ەسەبىمەن جەڭىلىپ قالدى. ال ەۋروپا چەمپيوناتىنا تۇڭعىش رەت قاتىسىپ جاتقان فينليانديا ءبىرىنشى ماتچتىندا جەڭىسكە جەتىپ، ءتۋرنيردىڭ العاشقى سەنساتسياسىن جاسادى.

وسى توپتاعى ەكىنشى ويىندا رەسەي قۇراماسى سانكت-پەتەربۋرگتە بەلگيادان ويسىراي جەڭىلدى – 0:3.

سوڭعى جاڭالىقتار

ۇرلانعان 28 كولىك تابىلدى

وقيعا • بۇگىن، 15:11

اتىراۋدا 23 ادامدى شايان شاققان

ايماقتار • بۇگىن، 13:35

سپورت جاڭالىقتارىنا شولۋ

سپورت • بۇگىن، 09:11

ۇقساس جاڭالىقتار