سپورت • 13 ماۋسىم، 2021

تەننيسشىلەردىڭ تاريحي جەتىستىگى

59 رەت كورسەتىلدى

تەننيستەن «ۇلكەن دۋلىعا» ساناتىنا ەنەتىن بيىلعى فرانتسيا اشىق چەمپيوناتى قازاقستاندىق سپورتشىلار ءۇشىن وتە تابىستى اياقتالدى. جەكەلەي سىندا سپورتشىلارىمىز جارتىلاي فينالعا دەيىن جەتسە، ەرلەر اراسىنداعى جۇپتىق سىندا ونەر كورسەتكەن الەكساندر بۋبليك پەن اندرەي گولۋبەۆ تۇڭعىش رەت رولان گارروس ءتۋرنيرىنىڭ فينالىندا باق سىنادى. قازاقستان تەننيسى تاريحىندا مۇنداي ءىرى دودانىڭ فينالىندا ويناۋ باقىتى بۇرىن-سوڭدى ەشبىر تەننيسشىگە بۇيىرماعان بولاتىن.

تاريحي تابىسقا قول جەتكىزگەن جەرلەستەرىمىز رولان گارروس جارىسىنىڭ باستاپقى باسەكەسىندە فرانتسيالىق جۇپ فابەن رەبۋل مەن ساديو دۋمبيانى ەكى سەتتە 7:6، 6:1 ەسەبىمەن جەڭىپ، ءتۋرنيردى ءساتتى باستادى. ەكىنشى اينالىمدا ولار ءدال وسىنداي ەسەپپەن حور­ۆاتيالىق يۆان دوديگ پەن سلوۆاكيالىق فيليپ پولاشەكتەن باسىم ءتۇستى. ال ءۇشىنشى اينالىمنان باستاپ قازاقستاندىق جۇپ ازۋلى قارسىلاستارمەن باق سىناسا باستادى. ماسەلەن، پلەي-وفف كەزەڭىندە فرانتسيا اشىق چەمپيوناتىنىڭ 11-راكەتكالارى، نيدەرلاندتىق ۋەس كولحوف پەن جان-جيۋلەن رويەرمەن كەز­دەسىپ، تارتىستى وتكەن ويىندا بۋبليك پەن گولۋبەۆ 7:6، 3:6، 6:4  ناتيجەسىمەن جەڭىسكە جەتتى.

جەرلەستەرىمىز رولان گار­روستىڭ شيرەك فينالىندا تاعى ءبىر تاجىريبەلى تەننيسشىلەر مو­ناكولىق حيۋگو نيس پەن گەر­مانيالىق تيم پيۋتسپەن كەز­دەستى. 1 ساعات 16 مينۋتقا جالعاس­قان ويىن­دا ا.بۋبليك پەن ا.گو­لۋ­بەۆ قارسىلاستارىنان ەش قيىن­دىقسىز باسىم ءتۇستى. ءبىرىنشى سەتتى قازاقستاندىق سپورتشىلار 6:4 ەسەبىمەن ءوز پايدالارىنا شەشسە، ەكىنشى سەتتە دە 6:4 ناتيجەسىمەن باسىمدىق تانىتتى. ءسويتىپ ءتۋر­نيردىڭ جارتىلاي فينالىندا ويناۋعا مۇمكىندىك الدى.

33 جاستاعى ا.گولۋبەۆ پەن ودان ون جاس كىشى ا.بۋبليك بۇ­عان دەيىن «ۇلكەن دۋلىعا» تۋر­نيرلەرىندە جۇپتىق سىندا ءبىر مارتە ونەر كورسەتكەن بولاتىن. مىنە، بيىل ەكىنشى رەت جارتىلاي فينالدا باق سىنادى. جەتى جىل بۇرىنعى باسەكەدە ا.گولۋبەۆ اۋستراليالىق سەم گروتپەن بىرگە رولان گارروس ءتۋرنيرىنىڭ جارتىلاي فينالىنا دەيىن جەتىپ، بولاشاق جەڭىمپازدار جيۋلەن بەننەتو مەن ەدۋارد روجە-ۆاسسلەنگە 6:3، 3:6، 4:6 ەسەبىمەن ەسە جىبەرگەن-ءدى.

سونداي-اق ا.بۋبليك تاعى ءبىر قازاقستاندىق تەننيسشى مي­حايل كۋكۋشكينمەن بىرگە 2020 جىلعى اۋستراليا اشىق چەمپيوناتىنىڭ جارتىلاي فينالىندا بولاشاق چەمپيوندار، امەريكالىق رادجيۆ رام مەن ۇلىبريتانيالىق دجو سولس­بە­ريدەن 6:4، 3:6، 4:6 ەسەبىمەن ۇتى­لىپ قالعان بولاتىن. بۇل جو­لى جەرلەستەرىمىز جارتىلاي فينالدا يسپانيالىق جۇپ پابلو اندۋحار مەن پەدرو مار­تينەسپەن كۇش سىناستى. ماتچ­تى قارقىندى باستاعان يسپانيالىق جۇپ ءبىرىنشى پارتيادا 6:1 ەسەبىمەن باسىم تۇس­كەنىمەن، كەيىنگى ەكى سەتتە جەر­لەستەرىمىز قارسىلاستارىن بەت قاراتقان جوق – 6:4، 6:4. قازاق­ستاندىق جۇپ – فينالدا!

فينالدىق سايىستا وتانداس­تارىمىز 99،9 پايىز جەرگىلىكتى جانكۇيەرلەردىڭ قولداۋىمەن ونەر كورسەتكەن كورت يەلەرى پەر-يۋگ ەربەر – نيكوليا مايۋمەن شەبەرلىك بايقاستى. ماتچ الدىندا تەننيس ماماندارى فرانتسيالىق جۇپتىڭ ەش قيىندىقسىز جە­ڭىس­كە جەتەتىنىن بولجاعان. سە­بەبى ەربەر مەن مايۋ «ۇلكەن دۋ­لىعا» ساناتىنا ەنەتىن ءتورت ءىرى جارىستىڭ (اقش اشىق چەمپيوناتى، اۋستراليا اشىق چەمپيوناتى، فرانتسيا اشىق چەمپيوناتى جانە ۋيمبلدون ءتۋرنيرى) بارىندە جۇپتىق سىندا توپ جار­عان تاجىريبەلى تەننيسشىلەر سانالادى.

فينالدىق سايىستىڭ ءبىرىنشى پارتياسىندا وتە سەنىمدى ويناعان قازاقستاندىق جۇپ العاشقى پارتيانى ءوز پايدالارىنا شەشتى – 6:4. ەكىنشى سەتتە دە بۋبليك پەن گولۋبەۆ جەڭىسكە جەتۋگە ءبىر تابان جاقىن تۇرعان-دى. الايدا ءجيى قاتەلىككە بوي الدىرعان جەر­لەستەرىمىز بۇل پارتيانى قارسى­لاستارىنا بەرىپ قويدى – 6:7. شەشۋشى سەتتە ەكى جۇپ تا وتە ساق ويناپ، ءوز مۇمكىندىكتەرىن ءتيىمدى پايدالانىپ وتىردى. تەك جەتىنشى گەيمگە كەلگەن كەزدە مايۋ مەن ەربەر جالعىز برەيك-پوينتتى ءتيىمدى پايدالانىپ، ءتۋرنيردىڭ باس جۇلدەسىن جەرلەستەرىمىزدەن تارتىپ الدى. قورىتىندى ەسەپ – 6:4، 6:7، 6:4. وسىلايشا، جەرلەس­تەرىمىز رولان گارروس جارىسىنىڭ جۇپتىق سىنىندا ۆيتسە-چەمپيون اتاندى.  

ايەلدەر اراسىنداعى جەكەلەي سىندا الەمدىك رەيتينگتە 33-ورىندا تۇرعان چەحيا سپورتشىسى باربورا كرەيچيكوۆانىڭ مەرەيى ۇستەم بولدى. ول فينالدا رەسەيلىك سپورتشى اناستاسيا پاۆليۋچەنكوۆانى ءۇش سەتتە 6:1، 2:6، 6:4 ناتيجەسىمەن قاپى قالدىردى. ايتا كەتەيىك، پاۆ­ليۋچەنكوۆا جارتىلاي فينالدا وتانداسىمىز ەلەنا رىباكينادان ايلاسىن اسىرىپ، فينالعا جولداما العان بولاتىن.

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار