قازاقستان • 13 ماۋسىم، 2021

اسحات ايماعامبەتوۆ قازاقستاندىق ۇستازدارعا حات جازدى

3220 رەت كورسەتىلدى

قر ءبىلىم جانە عىلىم ءمينيسترى اسحات ايماعامبەتوۆ پاندەميادا وقۋ باعدارلاماسىنان قالىپ قويعان وقۋشىلارعا قولداۋ كورسەتۋدى سۇرادى، دەپ حابارلايدى Egemen.kz.

«قىمباتتى ارىپتەسىم! مىنە، بارشامىز ءۇشىن قيىن ءارى ەرەكشە بولعان وقۋ جىلى دا ءوز مارەسىنە جەتتى. بۇل وقۋ جىلى ايانباي قىزمەت ەتكەن ءار مۇعالىمنىڭ ەرەن ەڭبەگىمەن جانە ەرلىگىمەن ەسىمىزدە قالارى ءسوزسىز. مەكتەپتەرگە مۇلدەم جاڭا وقىتۋ ادىستەرىنە كوشۋ وڭايعا سوقپاعانىن ءبارى بىردەي تۇسىنە بەرمەيدى. وكىنىشكە وراي، ءبىز ءداستۇرلى وقىتۋ فورماتىنا تولىقتاي كوشە المادىق. پاندەميانىڭ سالدارى ءبىلىم بەرۋ جۇيەسىنە ءالى دە اسەر ەتەتىنى انىق»، دەپ جازدى مينيستر Facebook جەلىسىندە.

ءبىلىم ءمينيسترى مۇعالىمدەردىڭ بارلىق قيىندىق پەن سىن-تەگەۋرىندەرگە قاراماستان، ساباقتى ۇتىمدى ۇيىمداستىرىپ، مۇمكىندىگىنشە جاقسى ناتيجە كورسەتە العانىن اتاپ ءوتتى.

«سىزدەر ۇستاز ماماندىعىنىڭ سەزىمتالدىق، بالالارعا دەگەن قامقورلىق جانە ادامگەرشىلىك سىندى ەڭ جاقسى قاسيەتتەرىن تانىتۋدىڭ جارقىن ۇلگىسىنە اينالدىڭىزدار. الايدا، جۇمسالعان كۇش-جىگەرگە قاراماستان، قاشىقتان وقىتۋ كەزىندە ءارتۇرلى سەبەپتەرگە بايلانىستى ارتتا قالعان بالالاردىڭ ءبىلىمى مەن باسقا وقۋشىلاردىڭ ءبىلىم دەڭگەيىن سالىستىرعاندا الشاقتىق بايقالادى. بۇل جاعدايدىڭ ورىن العانىنا بالالار كىنالى مە؟ ارينە، بالالاردىڭ ەش كىناسى جوق. ولار ءداستۇرلى فورماتتا ءبىلىم السا، ءسىزدىڭ قولداۋىڭىزدى سەزىنىپ، وزدەرىن كورسەتە الار ەدى دەپ سەنەمىن. ولارعا بۇل ولقىلىقتاردىڭ ورنىن تولتىرۋ ءۇشىن مۇمكىندىك بەرۋىمىز كەرەك پە؟ البەتتە. مەن، ءسىزدىڭ ارىپتەسىڭىز رەتىندە، ماماندىعىمىزعا ءتان قاسيەت – ىزگىلىككە ۇمتىلىپ، شاكىرتتەرىڭىزگە كومەك قولىن سوزۋىڭىزدى سۇرايمىن»، دەدى ا. ايماعامبەتوۆ.

مينيستر پاندەميادا وقۋ باعدارلاماسىنان قالىپ قويعان وقۋشىلارمەن جۇمىس ىستەۋدىڭ وڭاي ەمەستىگىن جازدى.

«وقۋشىلاردىڭ ءبىلىمى بويىنشا ارتتا قالۋى ولاردىڭ مۇمكىندىكتەرى سونداي دەگەن ءسوز ەمەس. ءبىلىم بەرۋدەگى ولقىلىقتاردى قيىن جاعداي مەن وقۋشىلاردى جىگەرلەندىرۋ دەڭگەيىنىڭ جەتكىلىكسىزدىگىمەن سيپاتتاۋعا بولادى. مۇنداي بالالار قازىر بارلىق نازارىمىزدى قاجەت ەتەدى. ولاردىڭ الەۋەتى زور. سوندىقتان بالالارىمىزعا قولداۋ كورسەتۋىمىز كەرەك. بۇلدىرشىندەرىمىزدى ءوز قامقورلىعىڭىزعا الىپ، قيىندىقتارعا قاراماستان ولقىلىقتاردىڭ ورنىن قوسىمشا ساباقتار وتكىزۋ ارقىلى تولتىراسىزدار دەپ ۇمىتتەنەمىن. مەنىڭ بۇل ءوتىنىشىمدى قابىل الۋىڭىزدى سۇرايمىن»، دەيدى اسحات ايماعامبەتوۆ.

سونىمەن بىرگە ۆەدومستۆو باسشىسى مۇعالىمدەردى جازعى مەكتەپتەردىڭ جۇمىسىنا 26 مامىر - 20 ماۋسىم ارالىعىندا بەلسەنە قاتىسۋعا شاقىردى.

«وسى جىلى سوڭعى قوڭىراۋ مەرەكەسىندە ەرەكشە سەزىمگە بولەنگەنىڭىزدى بىلەمىن. ويتكەنى، ءبىر جاعىنان وقۋ جىلى اياقتالىپ جاتسا، ەكىنشى جاعىنان - جازعى مەكتەپتەر جۇمىس ىستەي باستادى. ءبىز مۇنداي جاعدايدىڭ قايتالانباۋى ءۇشىن قولدان كەلگەننىڭ ءبارىن جاسايمىز. قاشىقتان ءبىلىم بەرۋدە ارىپتەستەرىم الەۋمەتتىك جەلىلەردى بەلسەندى ءارى ەركىن مەڭگەرە باستاپ، ءوز ساباقتارىنا ويىن ەلەمەنتتەرىن ەنگىزە باستاعانىن ەرەكشە اتاپ وتكىم كەلەدى. ءبىز، ارينە، وسىنداي كاسىپقوي ماماندارىمىزدى ۇنەمى قولداپ، ولاردى باسقالار ءۇشىن ۇلگى ەتەمىز. بۇل ءۇردىس ۇمىتىلماي، كەرىسىنشە، ودان دا ۇلكەن اسەرگە يە بولادى دەپ ۇمىتتەنەمىن»، دەيدى اسحات ايماعامبەتوۆ.

سوڭعى جاڭالىقتار

الماتىداعى احۋال كۇردەلى

ايماقتار • بۇگىن، 19:45

بالالار Ashyq جۇيەسىنە ەنگىزىلە مە؟

قازاقستان • بۇگىن، 19:20

شىمكەنتتە كارانتين كۇشەيتىلەدى

ايماقتار • بۇگىن، 15:47

اتوم كولگە ساپار

ايماقتار • بۇگىن، 15:37

قازاقستاندا جاڭا تەلەارنا اشىلدى

قازاقستان • بۇگىن، 11:55

ۇقساس جاڭالىقتار