قازاقستان • 12 ماۋسىم، 2021

سالتانات بايقوشقاروۆا بالالى بولار الدىندا ەكپەنى ەستەن شىعارماۋدى سۇرادى

71 رەت كورسەتىلدى

الماتى رەپرودۋكتولوگى سالتانات بايقوشقاروۆا COVID-19 ۆاكتسيناسىنىڭ جوسپارلانعان جۇكتىلىككە اسەرى تۋرالى قاۋەسەتتى جوققا شىعاردى. ونىڭ ايتۋىنشا، ۆاكتسينا قاجەت، ويتكەنى بۇل انانى دا، بالانى دا قورعايدى، دەپ حابارلايدى Egemen.kz.

سالتانات بايقوشقاروۆا «پروبيركادان» شىققان تۇڭعىش بالانىڭ «اۆتورى» جانە قازاقستانداعى رەپرودۋكتولوگيانىڭ نەگىزىن قالاۋشى. ول اتا-انا بولۋعا دايىندالىپ جۇرگەندەرگە كوروناۆيرۋسقا قارسى ۆاكتسينا الۋعا كەڭەس بەردى. بۇل تۋرالى دارىگەر «الماتى» تەلەارناسىنا بەرگەن سۇحباتىندا ايتتى.

«ەگەر ايەل جۇكتىلىك كەزىندە COVID-19 اۋرۋىن جۇقتىرسا، قاۋىپتى اسقىنۋلار تۋىندايدى»، دەدى سالتانات بايقوشقاروۆا.

رەپرودۋكتولوگيا مەن ەمبريولوگيا سالاسىنداعى تانىمال كوشباسشى مامان ۆاكتسينا ايەلدى دە، ەر ادامدى دا بەدەۋلىككە اكەلمەيدى دەپ سەندىرەدى. سونداي-اق، مامان كۆي ۆاكتسيناسىنان كەيىن ەكو باعدارلاماسىنان باس تارتۋ جالعان ەكەنىن ايتتى.

«كوروناۆيرۋس ۆاكتسيناسىنان كەيىن ەشكىم ەكو-دان باس تارتپايدى. ۆاكتسينانىڭ ەكىنشى دوزاسىن الىپ ءبىر ايدان كەيىن جۇكتىلىكتى جوسپارلاپ، ەكو باعدارلاماسىنا بارۋعا بولادى»، دەدى س. بايقوشقاروۆا.

سونىمەن قاتار دارىگەر ۆاكتسينا ادامنىڭ رەپرودۋكتيۆتى جۇيەسىنە اسەر ەتپەيتىنىن ايتتى.

«كەرىسىنشە ۆاكتسينا العان ادامدا كوروناۆيرۋسقا قارسى يممۋنيتەت قالىپتاسادى سوندىقتان جۇكتىلىكتى جوسپارلاۋعا بولادى. ۆاكتسينا ەرلەردى دە، ايەلدەردى دە بەدەۋلىككە اكەلمەيدى. ءبىز ناۋقاستارعا الدىمەن ۆاكتسينا الۋدى، ءبىر-ەكى ايدان كەيىن جۇكتىلىكتى جوسپارلاۋدى ۇسىنامىز»، دەدى س. بايقوشقاروۆا.

ونىڭ ايتۋىنشا، ەگەر ايەل تابيعي جولمەن نەمەسە ەكو-مەن جۇكتى بولىپ، اۋرۋ جۇقتىرسا جۇكتىلىك كەزىندە اسقىنۋلار بولادى.

«ارينە، قايعىلى جاعداي بولعانىن قالامايتىنىمىز انىق، سوندىقتان ۆاكتسينا الۋ ماڭىزدى»، دەدى دارىگەر.

سوڭعى جاڭالىقتار

تۋريستكە دە ءتارتىپ بار

ايماقتار • بۇگىن، 18:06

دوللار قايتا قىمباتتاي باستادى

ەكونوميكا • بۇگىن، 11:47

ۇقساس جاڭالىقتار