قحا پاۆلودار وبلىستىق فيليالىنىڭ مالىمەتى بويىنشا, وڭىرلىك كوميسسيا مۇشەلەرى مەن ونىڭ جۇمىس توپتارى جازىقسىز قۇربانداردى اقتاۋ ماسەلەلەرىن تالقىلادى.
وڭىرلىك كوميسسيا ءتورايىمى – وبلىس اكىمىنىڭ ورىنباسارى ايزادا قۇرمانوۆا ءبىرىنشى وتىرىستا بەرىلگەن تاپسىرمالاردىڭ ورىندالۋىنا سايكەس, تاريحشى عالىمدار, مۇراعاتشىلار جانە ولكەتانۋشىلار ەنگىزىلگەن بەس باعىت بويىنشا جۇمىس توپتارى قۇرىلعانىن اتاپ ءوتتى.
«باستى مىندەت – جازىقسىز قۋعىن-سۇرگىنگە ۇشىراعان ازاماتتاردىڭ ەسىمدەرىن انىقتاپ, ولار تۋرالى ەگجەي-تەگجەيلى اقپارات جيناۋ. زەرتتەۋ جۇمىسترىنىڭ قورىتىندىلارى بويىنشا ماتەريالدار وڭىرلىك كوميسسيانىڭ قاراۋىنا ەنگىزىلەتىن بولادى», دەدى ايزادا قۇرمانوۆا.
وڭىرلىك كوميسسيا مۇشەسى, اقىن, ولكەتانۋشى, «اقبەتتاۋ» جۋرنالىنىڭ شىعارۋشى رەداكتورى سايلاۋ بايبوسىننىڭ ايتۋىنشا, قۋعىن-سۇرگىنگە ۇشىراعان كوپتەگەن قوعام قايراتكەرىنىڭ ەسىمدەرى ۇمىتىلىپ بارادى.
«وسىنداي ساياسي قايراتكەرلەردىڭ ءبىرى – جەرلەسىمىز راحىمجان جامانقۇلوۆ. ول باياناۋىل اۋدانىندا دۇنيەگە كەلگەن. پاۆلودار پەدتەحنيكۋمىن بىتىرگەن. وتكەن عاسىردىڭ 30-جىلدارى «سوتسياليستىك قازاقستان» گازەتى رەداكتورىنىڭ ورىنباسارى قىزمەتىن اتقاردى. تۇتقىنعا الىنىپ, اتۋ جازاسىنا كەسىلگەنگە دەيىن «وڭتۇستىك قازاقستان» گازەتىنىڭ رەداكتورى بولىپ قىزمەت ەتكەن», دەدى سايلاۋ بايبوسىن.
ايزادا قۇرمانوۆا ادىسناماعا سايكەس جۇمىس توپتارىنىڭ ءبىرىنشى كەزەكتەگى مىندەتى اقتالماعان قۋعىن-سۇرگىنگە ۇشىراعان ازاماتتاردىڭ ەسىمدەرىن انىقتاۋ بولىپ تابىلاتىنىنا نازار اۋداردى.
«وسى ماقساتتا وبلىستىڭ ارنايى ورگاندارىنىڭ ۆەدومستۆولىق مۇراعاتتارىندا جۇمىس جۇرگىزۋ ءۇشىن جۇمىس توپتارىنىڭ بەس مۇشەسىنە №2 نىسان بويىنشا رۇقساتناما رەسىمدەلدى. ولار رەپرەسسيالار تۋرالى ىستەردىڭ جابىق قورلارىمەن جۇمىس ىستەيتىن بولادى. زەرتتەۋ جۇمىستارىنىڭ قورىتىندىلارى بويىنشا بارلىق ماتەريالدار مەن جۇمىس توپتارىنىڭ قورىتىندىلارى مەملەكەتتىك كوميسسيانىڭ قاراۋىنا بەرىلەتىن بولادى», دەدى وڭىرلىك كوميسسيا ءتورايىمى.
وتىرىس قورىتىندىسى بويىنشا ءوڭىر باسشىسىنىڭ ورىنباسارى جۇمىس توپتارىنىڭ مۇشەلەرىنە وتكەن عاسىردىڭ 30-جىلدارىنداعى ساياسي قۋعىن-سۇرگىندەر مەن اشتىققا بايلانىستى پاۆلودار وبلىسىنىڭ تاريحي ەستەلىكتەر ورىندارىنا كەشەندى ەكسپەديتسيا جۇمىسىن جالعاستىرۋدى جانە زەرتتەۋ جۇمىستارىنىڭ ماتەريالدارىن وڭىرلىك كوميسسيانىڭ قاراۋىنا ەنگىزۋدى تاپسىردى.
مادەنيەت, تىلدەردى دامىتۋ جانە ارحيۆ ءىسى باسقارماسىنا «ERTIS» مۋلتيمەديالىق مۇراجايىندا ساياسي قۋعىن-سۇرگىنگە بايلانىستى وقيعالاردى بەينەلەيتىن ەكسپوزيتسيا زالىنىڭ تۇجىرىمداماسىن ازىرلەۋ تاپسىرىلدى.
