ايماقتار • 10 ماۋسىم، 2021

نۇر-سۇلتاندا دزيۋدودان قازاقستان چەمپيوناتى ءوتىپ جاتىر

21 رەت كورسەتىلدى

قازاقستاننىڭ 300-دەن استام ۇزدىك دزيۋدوشىسى 2018 جىلدان بەرى العاش رەت ەل چەمپيوناتى اياسىندا تاتاميگە شىقتى. نۇر-سۇلتاندا 23 جاسقا دەيىنگى ەرلەر مەن ايەلدەر اراسىندا قازاقستان بىرىنشىلىگى باستالدى، دەپ حابارلايدى قالا اكىمدىگىنىڭ رەسمي سايتى.

چەمپيوناتتىڭ اشىلۋىندا قازاقستان دزيۋدو فەدەراتسياسىنىڭ پرەزيدەنتى قايرات قوجامجاروۆ 2021 جىل توكيو وليمپياداسىنا بايلانىستى سپورتشىلار ءۇشىن وتە ماڭىزدى ەكەنىن اتاپ ءوتىپ، سپورتشىلارعا الداعى جارىستا ساتتىلىك پەن جەڭىس تىلەدى.

«سوڭعى ءبىر جارىم جىل ىشىندە جارىستارعا، اسىرەسە شەتەلدەگى باسەكەلەرگە قاتىسۋ قيىنعا سوقتى. دەگەنمەن سوڭعى ۋاقىتتا قۇرامامىز الەمدىك جارىستارعا قاتىسىپ ءجۇر. بۇگىن 23 جاسقا دەيىنگى ەرلەر مەن ايەلدەر اراسىندا ەل بىرىنشىلىگى ءوتىپ جاتىر. جاتتىعۋعا قايتا ورالعاننان كەيىن دزيۋدوشىلارىمىز توكيو وليمپياداسىنا بەلسەندى دايىندالۋدا. جاستارىمىز ايگىلى سپورتشىلارىمىز سياقتى ارتىلعان ءۇمىتتى اقتايدى دەپ سەنەمىز»، دەدى قايرات قوجامجاروۆ.

ايتا كەتەيىك، دزيۋدودان قازاقستان چەمپيوناتى 2018 جىلى وتكەن بولاتىن. دزيۋدوشىلارىمىز بىلتىر پاندەمياعا بايلانىستى جارىسقا قاتىسا المادى. ال بيىل چەمپيونات سانيتارلىق نورمالاردى ساقتاي وتىرىپ، كورەرمەنسىز وتەدى.

«23 جاسقا دەيىنگى ەرلەر مەن ايەلدەرگە ارنالعان دزيۋدودان قر چەمپيوناتى جىل سايىن وتكىزىلەدى. بۇل جاستاردىڭ ەرەسەكتەر ساناتىنا اۋىساتىن چەمپيوناتى بولىپ سانالادى. بۇگىنگى تاڭدا جارىسقا بارلىق وڭىردەن 300-دەن استام سپورتشى كەلدى. دايىندىق دەڭگەيى جاقسى. مۇندا الەم چەمپيوندارى دا، ازيا چەمپيوندارى دا قاتىسادى. ءار وڭىردەن ءار سالماقتا 2 سپورتشى كەلدى. چەمپيونات بىلتىر دا ءوتۋى كەرەك ەدى، بىراق پاندەمياعا بايلانىستى وتكىزبەۋگە ءماجبۇر بولدىق. بيىل سانيتارلىق نورمالاردى ساقتاي وتىرىپ، ەلوردادا وتكىزىپ وتىرمىز»، دەدى نۇر-سۇلتان قالاسى اكىمدىگىنىڭ «وليمپيادالىق سپورت تۇرلەرى بويىنشا سپورتتى دامىتۋ ديرەكتسياسى» كمم باسشىسى باعدات دانياروۆ.

60 كەلىگە دەيىنگى سالماق دارەجەسىندەگى بىرىنشىلىك چەمپيوندارىنىڭ ءبىرى جامبىل وبلىسىنىڭ سپورتشىسى ەرنۇر سۇلەيمەن بولدى. فينالدىق جەكپە-جەكتەن كەيىن چەمپيون ءوز اسەرىمەن ءبولىستى.

«بۇگىن چەمپيون اتانعانىم ءۇشىن جاتتىقتىرۋشىلارىما ۇلكەن العىسىمدى بىلدىرەمىن. قارسىلاسىم مەنەن جاس بولعانمەن مىقتى دزيۋدوشىلاردىڭ ءبىرى ەكەن. ونى جەڭۋىم قيىن بولدى. چەمپيوندىق جولداعى جەكپە-جەكتىڭ بىرەۋى دە وڭاي بولعان جوق. كەلەسى ماقسات — الەم چەمپيونى جانە وليمپيادا چەمپيونى بولۋ»، دەدى ەرنۇر سۇلەيمەن.

سوڭعى جاڭالىقتار

ۇقساس جاڭالىقتار