بۇگىندە وڭىردە 128 ەكپە سالدىرۋ پۋنكتى جۇمىس ىستەيدى. سونداي-اق كوشپەلى ەگۋ بريگادالاردىڭ سانى – 80-گە جەتتى. مەديتسينالىق ۇيىمدارداعى دارىلىك زاتتار قورى 60 كۇنگە, ارنايى قورعانىش قۇرالدارى 55 كۇنگە جەتەدى. وڭىردە ءدارى تاپشىلىعى بايقالمايدى. اقپان ايىنان باستاپ جالپى 207 100 ۆاكتسينا, مامىر ايىندا «Hayat-Vax» ۆاكتسيناسىنىڭ 43 مىڭ دوزاسى جەتكىزىلدى. جالپى وڭىردە پاندەميا بەلەڭ العالى 766 مىڭنان استام ازاماتتان پتر-سىنامالارى الىنعان. وبلىس بويىنشا 1 200 ينفەكتسيالىق جانە 300 كارانتيندىك جانە 188 رەانيماتسيالىق توسەكتىك ورىن ۇيىمداستىرىلعان. «تۇركىستان وبلىسىندا پاندەميا باستالعاننان بەرى COVID-19 ىندەتىمەن تىركەلگەن جاعدايلار سانى 6 356 بولسا, جازىلىپ شىققاندار سانى – 5 910. كوروناۆيرۋس ينفەكتسياسىنىڭ ءارتۇرلى ستسەناريىنە بايلانىستى ينفەكتسيالىق توسەك-ورىن سانىن 5 610-عا دەيىن ۇلعايتۋعا مۇمكىندىك بار», دەيدى وبلىستىق قوعامدىق دەنساۋلىق باسقارماسىنىڭ باسشىسى مارات پاشيموۆ.
ەكپە سالۋدىڭ ماڭىزىن باعامداعان جۇرت ەرتەڭگى كۇننىڭ قامىن دا ەسكەرۋدە. ياعني ساقتاندىرۋ جۇيەسىنە دە سەنىم ارتۋشىلار قاتارى ارتقان. وبلىستىڭ 1,6 ملن تۇرعىنى مەديتسينالىق ساقتاندىرۋ جۇيەسىنىڭ قاتىسۋشىسى. جۇيەدە ءالى كۇنگە دەيىن ساقتاندىرىلماعان 400 مىڭعا جۋىق ادام اقىسىز قىزمەتتەردەن تىس قالىپ وتىر. ساقتاندىرىلماعانداردىڭ كوپشىلىگى تۇراقسىز تولەۋشىلەر. ياعني ولار ءۇشىن قانداي دا ءبىر اۋدارىمدار جانە جارنالار تۇراقتى تۇسپەيدى, نە بولماسا تولەم دۇرىس جۇرگىزىلمەگەن. سونىڭ سالدارىنان جۇيەدە قارىزى قوردالانىپ, مارتەبەسىنەن ايىرىلادى. دەمەك, تولەمدەردىڭ جۇيەلىلىگىن ساقتاۋ ماڭىزدى. «جۇيەگە قاتىساتىنداردىڭ ىشىندە 15 جەڭىلدەتىلگەن ساناتتار مەملەكەت تاراپىنان قامتاماسىز ەتىلگەن. الايدا اقپاراتتىق جۇيەلەردە اتالعان ساناتتاردىڭ الەۋمەتتىك مارتەبەلەرى انىقتالماعاندىقتان ساقتاندىرىلۋ قۇقىعىنان ايىرىلىپ قالىپ وتىر. وسى رەتتە, جەڭىلدەتىلگەن ساناتقا جاتاتىن ازاماتتار تىركەلگەن ەمحاناسىنا بارىپ الەۋمەتتىك مارتەبەلەرىن انىقتاعاندارى ءجون», دەيدى «الەۋمەتتىك مەديتسينالىق ساقتاندىرۋ قورى» كەاق تۇركىستان وبلىسى بويىنشا فيليالىنىڭ ديرەكتورى ا.بەيسەنباەۆ.
جىل باسىنان بەرى «Qoldau 24/7» ءموبيلدى قوسىمشاسىندا 174 شاعىن جانە ورتا بيزنەس قىزمەتكەرىنە, 3 380 جەڭىلدەتىلگەن ساناتتاعى تۇرعىندارعا ۋاقىتشا مارتەبە بەرىلگەن. بۇل مارتەبە ولارعا راستايتىن قۇجاتتاردى ۇسىنۋعا جانە جەڭىلدىك ساناتىنا ورالۋعا مۇمكىندىك بەرەدى. سودان كەيىن ولار ءۇشىن ءمامس جارنالارىن مەملەكەت تولەيدى.
سونداي-اق ءوڭىردىڭ دەنساۋلىق ساقتاۋ سالاسىندا جاڭا نىسانداردىڭ سالىنىپ, زاماناۋي قوندىرعىلارمەن جابدىقتالۋىن جۇرت بۇگىنمەن شەكتەلمەي ەرتەڭدى ويلاعان ارەكەتكە بالاۋدا. تۇركىستان قالاسىندا سالىنىپ جاتقان, جالپى اۋماعى 16 گەكتار 8 قاباتتى كوپسالالى, 570 توسەكتىك ورىنعا شاقتالعان, زاماناۋي ەمدەۋ كەشەنى ەلىمىزدەگى ەڭ ءىرى 20 اۋرۋحانانىڭ العاشقىسى بولماق. ينۆەستيتسيالىق جوبانى دەنساۋلىق ساقتاۋ مينيسترلىگى ارقىلى مەملەكەت-جەكەمەنشىك ارىپتەستىك اياسىندا «YDA Group» تۇرىك ينۆەستورى جۇزەگە اسىرۋدا. نىساننىڭ قۇنى 188 ملرد تەڭگەدەن اسادى. الدىڭعى جىلى باستالعان قۇرىلىستى 2022 جىلعا قاراي اياقتاۋ جوسپارلانۋدا. الەمدىك ستاندارتتارعا ساي سالىنىپ جاتقان اۋرۋحانا تولىق پايدالانۋعا بەرىلگەننەن كەيىن 2 مىڭنان استام مەديتسينا قىزمەتكەرى تۇراقتى جۇمىسپەن قامتىلادى. جوباعا سايكەس, مۇندا 13 بەيىندى بولىمشە, سونداي-اق جۇرەك-قانتامىر جانە كورونارلىق رەانيماتسيا, گەماتولوگيا, ونىڭ ىشىندە كۇيىكپەن ەمدەۋدىڭ 2 قارقىندى تەراپياسى (ICU) توسەگى جۇمىس ىستەيتىن بولادى. بۇدان باسقا كوپسالالى اۋرۋحانا قابىرعالارىندا – 16, ونىڭ ىشىندە 13 جوسپارلى جانە 3 شۇعىل كومەك كورسەتىلەتىن وپەراتسيالىق بولمە بار. سونداي-اق تۇركىستانداعى 200 توسەك ورىنعا ارنالعان جۇقپالى اۋرۋلار اۋرۋحاناسىنىڭ جوبالاۋ سمەتالىق قۇجاتتاماسى ازىرلەنىپ, مەملەكەتتىك ساراپتامادان وتكىزىلۋدە. مەملەكەتتىك ساراپتامانىڭ قورىتىندىسىن تامىز ايىندا الۋ جوسپارلانۋدا. اۋىسىمدا 500 ادام قابىلدايتىن 3 ەمحانا, جەدەل مەديتسينالىق جاردەم ستانساسى, انا مەن بالا ورتالىعى سالىنادى. ياعني وبلىس ورتالىعى 2018 جىلى شىمكەنت قالاسىنان تۇركىستانعا كوشىرىلۋىنە بايلانىستى, جاڭا مەديتسينالىق ورتالىقتار, اۋرۋحانا مەن ەمحانالار سالۋ ماسەلەسى باستى نازارعا الىنىپ, قارقىندى جۇمىستار اتقارىلىپ كەلەدى.
«تسيفرلى قازاقستان» مەملەكەتتىك باعدارلاماسى اياسىندا تۇركىستان وبلىسى بويىنشا مەديتسينالىق ۇيىمدار «دامۋمەد» مەديتسينالىق اقپاراتتىق جۇيەسىمەن جۇمىس اتقارۋدا. «قازىرگى تاڭدا وبلىس تۇرعىندارىنىڭ تۇگەلى ەلەكتروندىق پاسپورتپەن قامتىلىپ, دارىگەردىڭ قابىلداۋىنا الدىن الا جازىلۋ, دارىگەردى ۇيگە شاقىرۋ بويىنشا ەلەكتروندى تۇردە قىزمەت اتقارىلۋدا. زامان تالابىنا ساي مەديتسينالىق ۇيىمدارعا تسيفرلىق رەنتگەندەر, ەكسپەرتتىك ۋزي, ۆيدەوەندوسكوپيالىق اپپاراتتار ساتىپ الىنىپ وتا جاساۋعا وڭ ىقپالىن تيگىزۋدە. مەديتسينالىق ۇيىمدارعا تسيفرلى مەديتسينالىق اقپاراتتاردى, بەينەلەردى وڭدەۋ, ساقتاۋ جانە بەرۋ بويىنشا 7 مەديتسينالىق ۇيىم PACS جۇيەسىنە قوسىلعان جانە جۇيەگە ەنگىزۋ جۇمىستارى جۇرگىزىلۋدە. وكپەنى جاساندى جەلدەتۋ اپپاراتى 178-دەن 368-گە دەيىن ارتتى جانە جەدەل-جاردەم قىزمەتىنە 122 اۆتوكولىك جەتكىزىلدى. سونىمەن قاتار 12 جىلجىمالى مەديتسينالىق كەشەن جيىنتىعى ساتىپ الىنىپ, اۋدانداردى قامتاماسىز ەتۋ كورسەتكىشى 100% بولدى. بيىل وبلىستىق بيۋدجەت ەسەبىنەن 2 كومپيۋتەرلىك توموگرافيا الۋ جوسپارلانۋدا», دەيدى م.پاشيموۆ.
وسىنداي جانە دارىگەرلەردىڭ بىلىكتىلىگىن جەتىلدىرۋ, تۇرعىندارعا تۇسىندىرمە جۇمىستارىن جۇرگىزۋ سىندى باسقا دا اۋقىمدى شارالاردىڭ سەپتىگى تيگەن دە بولار, وڭىردە ىندەت جۇقتىرۋشىلار سانى ازايا تۇسۋدە. مىسالى, وتكەن تاۋلىكتە 8 ادامدا COVID-19 ىندەتى انىقتالدى.
تۇركىستان وبلىسى
