بايدەن Washington Post باسىلىمىندا جارىق كورگەن ساپارعا قاتىستى مالىمدەمەسىندە «ەرتەڭىمىز بەلگىسىز ەلەڭ-الاڭ كەزەڭدە ءومىر ءسۇرىپ جاتقانىمىز بەلگىلى. بۇل – عاسىردا ءبىر كەزدەسەتىن پاندەميا كەزەڭى. ساپار اقش-تىڭ جاڭا جوسپارىن جۇزەگە اسىرۋعا, بۇل جولدا سەرىكتەستەر, جاقتاستارمەن بىرلەسۋگە, دەموكراتيانىڭ كۇشى جاڭا عاسىردىڭ توسىن سىن-قاتەرلەرىن ەڭسەرۋگە جەتەتىنىن كورسەتۋگە مۇمكىندىك اشادى», دەدى.
پرەزيدەنت, ەڭ الدىمەن, بريتانيادا وتەتىن G7 سامميتىنە قاتىسادى. ودان كەيىن بريۋسسەلگە ناتو جينالىسىنا قاتىسۋعا اتتانادى. بەلگيا استاناسىندا ەۋروپا وداعىنىڭ كوشباسشىلارىمەن كەلىسسوزدەر جوسپارلانعان. بۇل ءىس-شارا بارىسىندا اقش پەن ەۋروپا وداعىنىڭ سىرتقى ساياساتى تالقىلانادى.
ورتالىق جانە شىعىس ەۋروپا دا اقش-پەن بايلانىسىن نىعايتا تۇسۋگە مۇددەلى. گەرمانيا دا اقش دەلەگاتسياسىن ءوز جەرىندە قارسى الۋعا دايىن.
فرانتسيا قاۋىپسىزدىك ماسەلەسىنە كەلگەندە اقش جاقسى سەرىكتەس ەمەس دەگەن سەنىمىنەن الىستاماق راي تانىتپادى. «بەسىنشى رەسپۋبليكا» ۇلكەن ستراتەگيالىق جوسپاردا ەۋروپا وداعى جەكە-دارا دا جاقسى ناتيجە كورسەتە الادى دەگەن ويدا.
بايدەن باتىسەۋروپالىق ارىپتەستەرىمەن الداعى اپتا ىشىندە كەلىسىپ ۇلگەرۋى قاجەت. ويتكەنى جەنەۆادا وتەتىن كونفەرەنتسيا كەزىندە رەسەي پرەزيدەنتى ۆلاديمير پۋتينمەن كەلىسسوز جوسپارلانعان. بايدەن سونىمەن قاتار تۇركيا پرەزيدەنتى رەجەپ تايىپ ەردوعانمەن كەزدەسۋ وتكىزۋى كەرەك. بۇل جيىنداردىڭ تالاسسىز وتپەۋى مۇمكىن ەمەس, دەيدى ساراپشىلار. ويتكەنى تاراپتار اراسىندا تارتىستى ماسەلەلەر كوپ.
نەگىزى, بۇل ساپاردان اقش جاعى ناقتى ناتيجەگە قاراعاندا كەلىسسوز بەن ارىپتەستىككە كىرىسۋدى كۇتىپ وتىر. بايدەن بۇل ساپارىندا اقش-تىڭ سىرتقى ساياساتىنىڭ باعىتى وزگەرگەنىن, بۇعان دەيىنگى پرەزيدەنت دونالد ترامپ تۋعىزعان تەرىس كوزقاراستى وزگەرتۋگە تىرىسپاق.
