دەنساۋلىق ساقتاۋ ءمينيسترى الەكسەي تسوي ءماجىلىس وتىرىسىندا مەديتسينالىق قىزمەتتەردىڭ قولجەتىمدىلىگى مەن ساپاسىن جاقسارتۋ ءۇشىن بولىنگەن قاراجاتتىڭ قانشالىق ءتيىمدى پايدالانىلعانىنا قاتىستى دەپۋتاتتىڭ سۇراعىنا جاۋاپ بەرىپ, حالىقتىڭ 53,3 پايىزىنىڭ مەديتسينالىق كومەكتىڭ ساپاسىنا ءالى دە كوڭىلى تولمايتىنى تۋرالى ستاتيستيكاعا پىكىر ءبىلدىردى.
«كوڭىل تولماۋ جاعدايىنا كەلەر بولساق, بۇل تاۋەلسىز ساراپتامالىق ۇيىمداردىڭ وبەكتيۆتى باعاسى. جالپى, دەنساۋلىق ساقتاۋ جۇيەسىنە قاناعاتتانۋ دەڭگەيى دامىعان ەلدەردە, ءتىپتى ەۋروپادا دا 65-70 پايىزدان اسپايدى», دەدى تسوي.
ءمينيسترىنىڭ بۇل جاۋابىنا ءماجىلىس سپيكەرى نۇرلان نىعماتۋلين دە پىكىر ءبىلدىرىپ, ءمينيستردى حالىققا جاقىن بولۋعا شاقىردى.
«قازىر دەنساۋلىق ساقتاۋ مينيسترلىگىنە وڭاي ەمەس ەكەنىن تۇسىنەمىز. بىراق حالىقپەن بايلانىس ورناتاتىن ۋاقىت كەلدى. جۋرناليستەر قويعان سۇراقتاردىڭ جارتىسىنا دا جاۋاپ بەرمەيسىز. كىم ءۇشىن جۇمىس ىستەپ ءجۇرسىز؟ بارىپ, ادامدارمەن سويلەسىڭىز! ول ادامدار ءبىزدى سايلايدى, ال پارلامەنت ءسىزدى تاعايىندادى. ەل باسشىلىعى, پارلامەنت ءسىزدى قولدادى. سىزگە قاراجات ءبولىندى. جۇمىس ىستەيتىن ۋاقىت كەلدى», دەدى ول.
ەسكە سالا كەتەيىك, ءماجىلىس سپيكەرى بۇعان دەيىن دە دەنساۋلىق ساقتاۋ ءمينيسترىنىڭ جۇمىسىن سىنعا العان ەدى.
